WANANCHI WA TARAFA YA MDANDU MKOANI NJOMBE WAANZA KUPATA HUDUMA ZA MAHAKAMA

Na Ezra Kyando- Mahakama ya Hakimu Mkazi Njombe

Wananchi wa Tarafa ya Mdandu wilaya ya Wanging’ombe mkoani Njombe wameanza kupata tena huduma za kimahakama baada ya kufungwa kwa huduma hizo miaka kumi na tisa (19) iliyopita kufuatia uchakavu wa jengo la Mahakama hali iliyowasababishia kufuata huduma hizo umbali mrefu zaidi.

Jengo hilo la Mahakama ya Mwanzo Mdandu lilifunguliwa rasmi Agosti 4 mwaka huu na Jaji Mfawidhi wa Mahakama Kuu ya Tanzania Kanda ya Iringa Bibi Mary.

Aidha, wakati wa ufunguzi wa jengo hilo baadhi ya wananchi wa Tarafa ya Mdandu waliipongeza Mahakama ya Tanzania kwa kuwaondolea adha ya kusafiri umbali mrefi kwa ajili ya kufuata huduma za kimahakama.

Jengo la Mahakama ya Mwanzo Mdandu wilayani Wanging’ombe mkoani Njombe lilijengwa mwaka 1940 na watawala wa Kijerumani ambapo mwaka 1999 lilifungwa kutokana na kuchakaa.

Kufuatia utekelezaji wa Mpango Mkakati wa miaka mitano wa Mahakama ya Tanzania pamoja na Mradi wa Maboresho ya Huduma za mahakama, Mahakama ya Tanzania inaendelea na uboreshaji wa miundombinu ya mahakama kwa kujenga majengo mapya ya mahakama na kuyafanyia ukarabati yale yaliyochakaa ili kusogeza huduma za Mahakama karibu zaidi na wananchi.

Hivi sasa Mahakama ya Tanzania tayari inaendelea na ujenzi wa majengo 16 ya Mahakama za wilaya, majengo matano ya Mahakama za Hakimu Mkazi na Majengo mawili ya Mahakama Kuu katika mikoa ya Mara na Kigoma.

 Jengo la Mahakama ya Mwanzo Mdandu lililozinduliwa rasmi baada ya kufanyiwa ukarabati. Jengo hili lilijengwa mwaka 1940 na watawala wa Kijerumani na baada ya kutumika kwa muda mrefu na kuchakaa, Mahakama ya Tanzania ilisitisha huduma na kulifunga mwaka 1999. Aidha, jengo hili limefanyiwa ukarabati na huduma zake kurejeshwa tena.

  Jaji Mfawidhi wa Mahakama Kuu ya Tanzania Kanda ya Iringa Mhe. Mary Shangali akizungumza na Wananchi wa Mdandu (hawapo pichani) wakati wa ufunguzi wa Mahakama ya Mwanzo Mdandu.

Wananchi wa Tarafa ya Mdandu wakimsikiliza Jaji Shangali wakati wa ufunguzi wa Mahakama ya Mwanzo Mdandu.

 
  Jaji Mfawidhi wa Mahakama Kuu ya Tanzania Kanda ya Iringa Mhe. Mary Shangali akiwa katika picha ya pamoja na Watumishi wa Mahakama Mkoa wa Njombe mara baada ya kufungua Mahakama ya Mwanzo Mdandu.