KITUO JUMUISHI CHA UTOAJI HUDUMA ZA MAHAKAMA MBEYA CHAANZA KUTOA ELIMU KWA WANANCHI

Na Rajabu Singana, Mahakama Kuu Mbeya

Kituo Jumuishi cha utoaji huduma za Mahakama Mbeya, kimeanzisha utaratibu wa kuongea na wananchi wanaofika kwa ajili ya kupata huduma za Mahakama asubuhi kabla kuanza kwa Mahakama.  

TY66O

Akizungumza katika ufunguzi wa tukio hilo, Jaji wa Mahakama Kuu, Kanda ya Mbeya, Mhe. Jaji, Dkt. Mary Caroline Levira alisema kuwa jitihada hizi zinalenga kuisogeza Mahakama karibu na kuwajengea imani wananchi juu ya utendaji kazi wa Mhimili huu muhimu.

Aidha; wananchi walitangaziwa juu ya uwepo wa huduma ya kusambaziwa nyaraka za Mahakama ijulikanayo kama Posta Mlangoni ambayo hutolewa na Shirika la Posta kwa kuwapelekea wananchi taarifa za Mahakama popote wanapopatikana. 

Mhe. Jaji Levira pia aliwasisitiza wadau wote wa Mahakama pamoja na wananchi kufanya kazi kwa kushirikiana ili kufikia dira ya Mahakama isemayo Utoaji wa Huduma kwa Wote na kwa Wakati. 

Vilevile wananchi waliaswa kuwasilisha taarifa zao sahihi pale wanapofika Mahakamani ili kufanya utekelezaji wa Posta Mlangoni kuwafikia kwa urahisi. 

Mbali na hilo, Wananchi walijulishwa juu ya kuanzishwa kwa Huduma za Kibenki katika jengo hilo.

“Hatua hii inafuatia mazungumzo yaliyofanyika kati ya uongozi wa Mahakama Kuu Kanda ya Mbeya na uongozi wa NMB. Hatua hii ni muhimu kutokana na kuwapunguzia wananchi pamoja na wadau wengine adha ya kusafiri umbali mrefu kutafuta huduma za kibenki. Huduma hizi zinatolewa kupita Wakala wa NMB ambaye atakuwa akifanya kazi muda wote wa saa za kazi,” alisema Mhe. Jaji Dkt. Levira.

Kwa ujumla, walipatiwa elimu kuhusu taratibu mbalimbali za Mahakama pamoja na kukumbushwa juu ya utaratibu wa mavazi wanayotakiwa kuvaa wanapokuja mahakamani, namna ya kufungua mashauri, muda wa kukata rufaa,  mamlaka za Mahakama (Mwanzo, Wilaya na Mahakama ya Hakimu Mkazi). 

Naye Bw. Masache Kasaka ambaye ni Afisa TEHAMA aliwaambia wananchi na wadau wa Mahakama juu ya uwepo wa tovuti ya Mahakama (www.judiciary.go.tz) ambayo kupitia tovuti hiyo wanaweza kupata fomu mbalimbali zinazoonesha ada za mahakama, kuona na kupakua jarida la Mahakama ambalo huonesha taarifa mbalimbali.

Utaratibu wa kutoa elimu utakuwa ukifanywa kila siku za jumanne, jumatano na alhamisi. 

Wadau muhimu waliohudhuria katika uzinduzi wa zoezi hilo ni pamoja na Mawakili wa Serikali, Mawakili wa Kujitegemea, Polisi, Magereza na wengineo.

Mbali na Mbeya zoezi la utoaji elimu kwa wananchi na kuwasikiliza wateja wanaofika katika Mahakama nchini tayari limeshaanza katika Kanda mbalimbali za Mahakama, ikiwa ni pamoja na Mahakama Kuu Kanda ya Dar es Salaam, Mwanza, Tabora, Dodoma na kadhalika.

Mahakama ya Tanzania kupitia Mpango Mkakati wake imejiwekea nguzo kuu tatu moja ya nguzo hizo ni ya Kurejesha imani ya jamii na Ushirikishwaji wa Wadau ambapo kupitia nguzo hii Mahakama inafanya jitihada mbalimbali  ili wananchi waweze kujua zaidi huduma na maboresho yanayojiri kwa manufaa ya wananchi kwa kuwa wao ndio wadau wakubwa wa Mhimili huu.

 Jaji wa Mahakama Kuu, Kanda ya Mbeya aliyesimama mbele, Mhe. Jaji Dkt. Mary Caroline Levira akizungumza wakati wa uzinduzi wa huduma ya utoaji elimu kwa wananchi.

Baadhi ya Watumishi wa Mahakama Kanda ya Mbeya walioshiriki katika uzinduzi wa utoaji elimu kwa wananchi wanaofika Mahakama kupata huduma.

Mtendaji wa Mahakama Kuu, Kanda ya Mbeya, Bw. Moses Mwidete akiongea jambo na Wananchi/Watumishi waliohudhuria katika hafla hiyo.

Afisa Tehama, Mahakama Kuu, Kanda ya Mbeya, Bw. Masache Kasaka akitoa elimu kuhusu TEHAMA Mahakamani.

Muonekano wa Ofisi ya kutoa huduma za kibenki iliyopo ndani ya jengo la Mahakama Kuu, Kanda ya Mbeya.

(Picha na Rajab Singana, Mahakama Kuu, Mbeya)