NAIBU WAKILI MKUU WA SERIKALI ATEMBELEA KITENGO CHA MABORESHO CHA MAHAKAMA YA TANZANIA

Na Lydia Churi-Mahakama

Naibu Wakili Mkuu wa Serikali Mhe. Dkt. Ally Possi leo amekitembelea kitengo cha Usimamizi wa Utekelezaji wa Maboresho ya Mahakama ya Tanzania (Judiciary Delivery Unit-JDU) na kusema kuwa endapo ofisi yake itakuwa na uelewa wa kutosha kuhusu maboresho yanayofanyika ndani ya Mahakama ya Tanzania ni wazi kuwa utekelezaji wa shughuli za Taasisi hizo utaimarika.   

Akizungumza katika kikao kilichowakutanisha baadhi ya watendaji wakuu wa ofisi hizo, Dkt. Possi amesema kikao hicho ni muhimu kwa kuwa Mahakama ya Tanzania ni miongoni mwa wadau wakubwa wa Ofisi ya Wakili Mkuu wa Serikali.

Akiwa katika kikao hicho, Dkt. Possi alipata nafasi ya kuelezewa kuhusu Mpango Mkakati wa Miaka Mitano wa Mahakama ya Tanzania pamoja na Mradi wa Maboresho ya Huduma za Mahakama kupitia Mada iliyotolewa na Mkuu wa Kitengo hicho cha Maboresho Mhe. Zahra Maruma.

Aidha, Naibu Wakili huyo Mkuu wa Serikali pia alipata nafasi ya kuelezewa masuala mbalimbali kuhusu namna Mahakama ya Tanzania inavyojipanga katika kushughulikia Mashauri kupitia Mada iliyotolewa na Mkurugenzi wa Menejimenti ya Mashauri Bibi Eva Nkya.

Kuhusu Mahakama inavyotekeleza azma yake ya kuingia katika matumizi ya Teknolojia kwenye kazi zake, Mhe. Dkt. Possi pia alipatiwa maelezo ya namna Mfumo wa Kielekitroniki wa Takwimu za Mashauri (JSDS) wa Mahakama ya Tanzania unavyofanya kazi.

Mahakama ya Tanzania pamoja na Ofisi ya Wakili Mkuu wa Serikali zimekubaliana kushirikiana katika kubadilishana Taarifa mbalimbali muhimu, kupitia upya sheria zinazorahisisha umalizaji wa kesi kwa wakati Mahakamani pamoja na hatua za kuleta ufasini katika masuala ya biashara.

  Naibu Wakili Mkuu wa Serikali Mhe. Dkt. Ally Possi akiwa katika kikao cha pamoja kati ya Ofisi yake na Mahakama ya Tanzania kuzungumzia masuala mbalimbali juu ya utekelezaji wa kazi za Mahakama pamoja na Ofisi ya Wakili Mkuu wa Serikali katika ofisi za Kitengo cha Usimamizi wa Utekelezaji wa Maboresho ya Huduma za Mahakama.  

  Baadhi ya wajumbe wa kikao baina ya Naibu Wakili Mkuu wa Serikali na Mahakama ya Tanzania

  Naibu Wakili Mkuu wa Serikali Mhe. Dkt. Ally Possi akiwa kwenye kikao hicho.

  Baadhi ya wajumbe wa kikao hicho wa Mahakama ya Tanzania.

  Mkuu wa Kitengo cha Usimamizi wa Utekelezaji wa Maboresho ya Huduma za Mahakama Mhe. Zahra Maruma akitoa Mada kuhusu Mpango Mkakati wa Miaka Mitano wa Mahakama ya Tanzania kwenye kikao hicho. 

 Naibu Wakili Mkuu wa Serikali Mhe. Dkt. Ally Possi (waliokaa-katikati)akiwa katika picha ya pamoja na wajumbe wa kikao hicho mara baada ya kumaliza kikao.  Kutoka kulia waliokaa ni Mkurugenzi wa Idara ya Menejimenti ya Mashari wa Mahakama ya Tanzania Bibi Eva Nkya.

 (Picha kwa Hisani ya JDU)