Jamii imeshauriwa kujifunza
kuhusu sheria ili iwe na uelewa wa masuala hayo kwa kuwa maisha ya binadamu kwa
kiasi kikubwa yanaratibiwa na sheria, kanuni
na taratibu.
Kauli hiyo imetolewa
leo na Jaji Mkuu wa Tanzania Mhe. Prof. Ibrahim Hamis Juma alipokuwa
akizungumza na wanafunzi wa shule ya sekondari ya Lake iliyopo jijini Mwanza
alipowatembelea kuzungumza nao kuhusu masuala ya maadili na Mahakama.
Mahakama ya Tanzania imeanzisha
mpango maalum wa kuzitembelea shule mbalimbali za sekondari pamoja na vyuo ili
kuzungumza na wanafunzi kwa lengo la kuwaandaa kuwa na maadili mema katika
jamii.
Akizungumza na
wanafunzi hao, Jaji Mkuu alisema endapo baadhi ya wanafunzi watataka kuwa
wanasheria hapo baadaye hawana budi kuwa na maadili mema kwa kuwa kazi ya
utoaji haki ni ya msingi na inahitaji
mtu kuwa na weledi wa hali ya juu.
Kwa mujibu wa Jaji
Mkuu, licha ya mtu kutokuwa Mwanansheria bado jamii inapaswa kufahamu mambo ya
msingi kuhusu sheria kwa kuwa utawala wa sheria msingi wake huanzia nyumbani,
kwenye maeneo ya kazi na maeneo mengine na pia sheria, kanuni na taratibu
huisaidia jamii kuishi kwa amani.
Alisema mtu kusomea
fani nyingine nje ya sheria hakumzuii kujifunza mambo ya msingi kuhusu sheria. “Katika
jamii hakuna fani bora kuliko nyingine, ukielewa fani zaidi ya moja unakuwa
kwenye nafasi nzuri hasa katika karne hii ya 21 ambayo ili kuendelea ni muhimu
fani zote kushirikiana”, alisema Jaji Mkuu.
Jaji Mkuu aliwashauri
wanafunzi hao pia kujifunza mambo ya msingi ili waweze kuendana na karne ya 21
yenye ushindani mkubwa. Aliwataka kujifunza kuhusu teknolojia pamoja na kusoma
na kuifahamu Dira ya Taifa ya Maendeleo 2025 ili wafahamu nchi yao inapokwenda.
Akizungumzia Mahakama
ya Tanzania, Mhe. Prof. Juma alisema inakabiliwa na changamoto nyingi katika
utoaji wa haki. Baadhi ya changamoto hizo ni haki kutokupatikana kwa wakati, upungufu na
uchakavu wa baadhi ya majengo ya Mahakama, pamoja na wananchi wengi
kutokufahamu sheria na taratibu za kimahakama.
Alisema licha ya kuwapo
kwa changamoto hizo, Mahakama hivi sasa iko katika maboresho ya huduma zake
kupitia Mpango Mkakati wa miaka mitano ambao unalenga kusogeza huduma karibu zaidi
na wananchi kwa kujenga majengo ya Mahakama, kumaliza mashauri kwa wakati, na kuwaelimisha
wananchi kuhusu sheria na taratibu za kimahakama.
Mahakama ya Tanzania
hivi sasa inaendelea na ujenzi wa majengo mapya ambapo hadi kufikia mwezi Juni
mwaka 2019 jumla ya majengo 52 ya Mahakama yatakuwa yamekamilika kwenye maeneo
mbalimbali nchini yakiwemo yale ya Mahakama za Mwanzo, Wilaya, Mahakama za
Hakimu Mkazi na Mahakama Kuu.
Jaji Mkuu leo
amehitimisha ziara yake ya siku nne katika mkoa wa Mwanza ambapo amefanikiwa
kutembelea baadhi ya Mahakama zilizopo Ukerewe, Sengerema, Kwimba na Mwanza
mjini na kukagua shughuli za Mahakama pamoja na kuzungumza na wafanyakazi. Jaji
Mkuu pia alitembelea shule mbili za sekondari za Nyampulukano Sengerema na Lake
ya jijini Mwanza.
Wanafunzi wa shule ya
sekondari Lake pamoja na Waalimu wao wakiimba wimbo wa Taifa mara baada ya Jaji Mkuu wa Tanzania Mhe. Prof. Ibrahim Hamis Juma kuwasili shuleni hapo kwa ajili ya kuzungumza na wanafunzi kuhusu Maadili.
Jaji Mkuu wa Tanzania Mhe. Prof. Ibrahim Hamis Juma akizungumza na wananfunzi wa Lake sekondari kuhusu Maadili. Wa pili kushoto ni Jaji Mfawidhi wa Mahakama Kuu ya Tanzania kanda ya Mwanza Mhe. Sam Rumanyika na wa kwanza kushoto ni Jaji wa Kanda ya Mwanza Mhe. Mohamed Gwae na wa kwanza kulia ni Jaji wa kanda hiyo Mhe. Agnes Bukuku.
Baadhi ya Watumishi wa Mahakama wakiimba wimbo wa Taifa walipokuwa katika shule ya sekondari Lake ya jijini Mwanza.
Jaji Mkuu wa Tanzania Mhe. Prof. Ibrahim Hamis Juma (katikati), Jaji Mfawidhi wa Mahakama Kuu ya Tanzania kanda ya Mwanza Mhe. Sam Rumanyika wakiwa katika picha ya pamoja na Viongozi wa Mahakama pamoja na wa shule ya Sekondari Lake ya jijini Mwanza mara baada ya Mhe. Jaji Mkuu kuzungumza na wanafunzi wa shule hiyo.
Hakuna maoni:
Chapisha Maoni