MAFUNZO KWA MAHAKIMU, WAJUMBE WA MABARAZA YA KATA YATOLEWA MKOANI TABORA

Na Aisha Abdallah,  Mahakama Kuu Tabora

Jaji Mfawidhi, Mahakama Kuu, Kanda ya Tabora, Mhe. Salvatory Bongole amefungua rasmi Mafunzo ya Mahakimu na Wajumbe wa Mabaraza ya Kata mkoani humo yanayolenga kuwajengea uwezo wa kuyasimamia mabaraza ya kata katika utekelezaji wa majukumu kwa mujibu wa sheria.

Akifungua Mafunzo hayo mapema Oktoba 08, katika Ukumbi wa Katibu Tawala, Ofisi ya Mkuu wa Mkoa wa Tabora, Mhe. Jaji Bongole aliwaelezea washiriki  kuwa mafunzo hayo ni muhimu kwa sababu yataleta uelewa wa pamoja kati ya Mahakama na Mabaraza ya Kata juu ya mamlaka ya Mahakama na Mabaraza katika utoaji haki.

Aidha katika hotuba yake ya ufunguzi, Mhe. Jaji Mfawidhi alisisitiza pia kuhusu umuhimu wa kumsikiliza mtu/mteja kabla ya kutoa maamuzi na kuwaasa wanasemina kuyatekeleza mambo yote watakayojifunza katika semina hiyo.

“Kama sehemu ya utekelezaji wa Mpango Mkakati wa Mahakama suala la ushirikishwaji wa Wadau limepewa kipaumbele ili tuweze kufanikisha huduma ya utoaji haki”, alisema Mhe. Jaji Bongole. 

Katika semina hiyo, Mahakama imewashirikisha Wanasheria kutoka Ofisi ya Mkuu wa Mkoa Tabora na Halmashauri ya Manispaa-Tabora kama viongozi wa Mabaraza ya Kata.

Mafunzo hayo ya siku tatu yameandaliwa na Mahakama ya Tanzania na kuendeshwa na Chuo cha Uongozi wa Mahakama Lushoto (IJA).

Washiriki ni Mahakimu wa Mahakama za Mwanzo kutoka Tabora Mjini, Urambo, Nzega na Igunga pamoja na wajumbe wa Mabaraza ya Kata na Wanasheria wa Halmashauri ya Manispaa na wa Ofisi ya Mkuu wa Mkoa wa Tabora.

Sehemu ya Washiriki wakiwa katika Mafunzo hayo.

Jaji Mfawidhi, Mahakama Kuu Kanda ya Tabora, Mhe. Salvatory Bongole (aliyeketi katikati) akiwa katika picha ya pamoja na baadhi ya Mahakimu na Wajumbe wa Mabaraza ya Kata wanaoshiriki katika Mafunzo ya siku tatu, Oktoba 08, 2018 hadi Oktoba, 10, 2018.

Wengine walioketi wa kwanza kulia ni Mkurugenzi wa Sheria kutoka Chuo cha Uongozi wa Mahakama Lushoto (IJA), Bw. Justus Mulokozi, wa pili kulia ni Naibu Msajili Mfawidhi-Mahakama Kuu, Kanda ya Tabora, Mhe. Hussein Mushi, wa kwanza kushoto ni Mtendaji wa Mahakama Kuu, Kanda ya Tabora, Bw. Sumera Manoti, na wa pili kushoto ni Mkufunzi kutoka Chuo cha Uongozi wa Mahakama Lushoto (IJA), Bw. Fahamu Mtulya.

 Jaji Mfawidhi wa Mahakama Kuu, Kanda ya Tabora, Mhe. Salvatory Bongole (katikati) ambaye pia alikuwa Mhe. Mgeni rasmi wa Mafunzo hayo, akiwa katika picha ya pamoja na Wanasheria wa Manispaa ya Tabora (waliosimama).