MAHAKAMA MBEYA, YAWAKARIBISHA RASMI MAJAJI WAPYA WALIOHAMIA KATIKA KANDA HIYO

Na Rajabu Singana, Mahakama Kuu Mbeya

Majaji wa Mahakama Kuu waliohamishiwa Kanda ya Mbeya, Mhe. Robert Makaramba na Mhe. Paul Ngwembe wamekaribishwa rasmi na watumishi pamoja na wadau wa Mahakama.

Waheshimiwa Majaji hao walikaribishwa rasmi katika tafrija fupi iliyofanyika mwishoni mwa wiki katika ukumbi wa hoteli ya Usungilo jijini Mbeya.

Pamoja na kuwakaribisha wageni tafrija hiyo pia ililenga kutambulisha Wadau muhimu wanaohusika katika shughuli nzima ya utoaji haki ambapo ilisisitizwa kufanya kazi kwa ushirikiano baina ya pande zote katika kutekeleza jukumu la utoaji haki. 

Akifungua tafrija hiyo mwishoni mwa wiki, Jaji wa Mahakama Kuu Kanda ya Mbeya, Mhe. Dkt. Mary Levira kwa aliwakaribisha Majaji wageni na kuwaelezea sifa mbalimbali za Mkoa wa Mbeya kama vile wingi wa vyakula, ukarimu wa wenyeji pamoja na hali ya hewa nzuri. 

Mara baada ya kukaribishwa rasmi, Jaji Mfawidhi wa Mahakama Kuu Kanda ya Mbeya, Mhe. Robert Makaramba alipata fursa ya kuzungumza ambapo katika hotuba yake fupi aliwapongeza Mahakimu wa Mahakama za mwanzo ambao kwa muda mrefu wamekuwa wakifanya kazi kwa kujituma. 

 “Kazi ya Jaji au Hakimu sio kuamua tu bali wana jukumu la kufundisha mawakili mahakamani, vilevile Wanasheria wa Serikali na wa Kujitegemea pia wana jukumu kubwa katika utoaji haki kwa kuwa wanaweza kuchelewesha au kupelekea haki kutolewa kwa wakati.,”. Aliongeza Mhe. Jaji Makaramba.

Naye, Mwenyekiti wa Chama cha Mawakili Tanganyika tawi la Mbeya, Mhe. Joyce Kasebwa aliwakaribisha Majaji hao na kuahidi kuwa Chama cha Mawakili kitaendelea kutoa ushirikiano kwa viongozi hao ili kufanikisha jukumu kuu la Mhimili wa Mahakama la utoaji haki kwa wakati.

Aliongeza kwa kusema Majaji pamoja na Mahakimu wasisite kuwaelekeza na kuwafundisha Mawakili pale wanapoonekana kwenda kinyume na matakwa ya sheria, kanuni na taratibu katika uendeshaji wa shughuli za Mahakama. 

  Mhe. Jaji, Dkt. Mary Levira akitoa neno katika ufunguzi wa tafrija ya kuwakaribisha rasmi Wahe. Majaji waliohamia katika Kanda hiyo.

Majaji wageni (katikati), Jaji Mfawidhi, Mahakama Kuu Kanda ya Mbeya na Mhe. Jaji  Paul Ngwembe wakiwa katika picha ya pamoja na sehemu ya Mahakimu walioshiriki katika hafla hiyo.

(Picha na Rajab Singana, Mahakama Kuu, Mbeya)