MAWAKILI WA KUJITEGEMEA MBEYA WAPATIWA MAFUNZO YA USHAHIDI WA KISAYANSI

Na Rajabu Singana, Mahakama Kuu -Mbeya

Mawakili wa Kujitegemea Mkoani Mbeya wamepatiwa Mafunzo ya Ushahidi wa Kisayansi ili kuhakikisha huduma wazitoazo zinawasaidia wananchi ipasavyo katika utatuzi wa matatizo ya kisheria na uwakilishi Mahakamani .

Akitoa Mafunzo hayo Oktoba 20, Jaji Mfawidhi, Mahakama Kuu -Kanda ya Mbeya Mhe. Robert Makaramba alisema Mafunzo hayo yalilenga kuwajengea uwezo wa namna ya kukusanya, kutoa na kuweka pingamizi Mahakamani hususani katika ushahidi wa kisayansi. 

Katika mafunzo hayo, Mhe. Jaji Makaramba aliwaeleza Mawakili hao kuwa mara nyingi ushahidi wa kisayansi hutumika kwenye makosa ya jinai ambapo katika mashauri hayo wataalamu waliobobea katika taaluma husika hutakiwa kuithibitishia Mahakama kwa kutumia utaalamu wao kuhusiana na tuhuma zilizo mbele ya Mahakama. 

Aidha; Mhe. Jaji Mfawidhi aliwataka Mawakili hao wanapokuwa wanasimamia mashauri yanayohitaji ushahidi wa kisayansi kuhakikisha wanapeleka Wataalamu waliobobea katika taaluma husika.  

Kwa upande wake, Wakili wa Kujitegemea, Mhe. Simon Mwakolo aliyezungumza kwa niaba ya wenzake aliishukuru Mahakama na kusema kuwa mafunzo hayo yametolewa kwa wakati muafaka kwani mawakili wengi walikuwa hawana ufahamu juu ya namna bora ya kushughulika na ushahidi wa kisayansi. 

Mhe. Mwakolo aliendelea kusema kuwa kwa sasa watakuwa na uwezo mkubwa wa kukusanya, kuandaa na kuweka pingamizi za kisheria ili wananchi wanaowasaidia wapate haki zao inavyostahili.

Baada ya marekebisho ya Sheria ya Ushahidi ya mwaka 1967 kutambua ushahidi wa kisayansi yaliyopelekea sheria mbalimbali kutungwa na zingine kufanyiwa marekebisho ili kukidhi matakwa.

Baadhi ya sheria ambazo huhitaji ushahidi wa kisayansi ni pamoja na  Sheria ya Makosa ya Mitandaoni ya mwaka 2015,  Sheria ya Vinasaba vya Binadamu Namba 8 ya mwaka 2009, Sheria ya Wanyamapori ya mwaka 2009, Sheria ya Utafiti wa Kimahakama juu ya Vifo vyenye Utata namba 24 ya mwaka 1980 pamoja na Sheria ya Miamala ya Kielektroniki ya mwaka 2007.   

 Jaji Mfawidhi, Mahakama Kuu- Kanda ya Mbeya, Mhe. Robert Makaramba akiwasilisha mada.

 Baadhi ya washiriki wakimsikiliza Mhe. Jaji Makaramba alipokuwa akitoa Mada husika.