WATUMISHI WA MAHAKAMA MUSOMA-MARA WAPEWA SOMO KUHUSU CHAMA CHA USHIRIKA CHA AKIBA NA MIKOPO CHA MAHAKAMA

Na Francisca Romanus, Mahakama ya Hakimu Mkazi Musoma-Mara

Chama cha Ushirika cha Akiba na Mikopo cha Mahakama kimetoa semina fupi kwa Watumishi wa Mahakama ya Hakimu Mkazi Musoma pamoja na wa Mahakama ya Wilaya Musoma juu ya shughuli na umuhimu wa chama hicho kwa watumishi wa Mahakama ya Tanzania.

Akitoa semina hiyo hivi karibuni, Katibu wa Chama hicho, Bi. Doris Mwamasage Chama hicho kina madhumuni mengi ikiwa ni pamoja na kutoa elimu juu ya mambo mbalimbali ya kijami, mazingira, kutoa mikopo yenye riba nafuu, kuwajengea wanachama tabia ya kuweka akiba na amana mara kwa mara, kukopa kwa busara na kulipa kwa wakati, kuepuka matumizi yasiyo ya lazima n.k

“Pamoja na madhumuni mengi yaliyopo katika chama, lakini kubwa zaidi ni kutoa huduma za kifedha kwa wanachama ili waweze kukidhi mahitaji mbalimbali ya kijamii, kiuchumi na kuinua hali ya maisha yao,” alisema Bi. Mwamasage.

Pamoja na madhumuni hayo, Bi Doris pia alisema kuwa Chama hiki kimekuwa msaada mkubwa sana kwa watumishi wanapokumbwa na majanga mbalimbali na hasa kwa watumishi wanaokaribia kustaafu, kwani akiba na amana zao walizokuwa wakijiwekea zimewasaidia sana kuendesha maisha yao baada ya kustaafu wakati wakiwa wanasubiri taratibu za malipo yao ya pensheni kukamilika.

Bi. Mwamasage, aliwaomba watumishi wa Mahakama kujiunga kwa wingi ili kupata faida mbalimbali ikiwa ni pamoja na mikopo yenye riba nafuu.

Hata hivyo; Watumishi waliopata nafasi ya kushiriki katika semina hiyo, waliupongeza Uongozi wa Chama hicho kwa kuweza kuwaletea mjumbe ambae ametoa elimu juu ya chama hicho ambapo wengi walikiri hawakuwa na uelewa nacho.

Aidha; Watumishi waliahidi kujiunga kwani waliona kuwa Chama hicho ni mkombozi kwao, vilevile walishauri elimu hii pia itolewe na kwingine ili Watumishi waweze kufaidika na Chama hicho. 

Kwa mujibu wa Katibu huyo, Chama cha Ushirika cha Akiba na Mikopo cha Mahakama kilianzishwa rasmi Januari 08, 1970 na ofisi zake zinapatikana katika Mahakama ya Biashara mkoani Dar es Salaam. 

 Katibu wa Chama cha  Ushirika cha Akiba na Mikopo cha Mahakama, Bi Doris Mwamasage, akitoa elimu juu ya chama hicho kwa Watumishi, kulia ni Afisa Tawala, Mahakama ya Hakimu Mkazi Musoma Bw, Kandana Lucas.

Baadhi ya Watumishi wa Mahakama ya Hakimu Mkazi Musoma na Mahakama ya Wilaya Musoma wakisikiliza kwa makini elimu inayotolewa.

Baadhi ya watumishi wakijaza fomu za kujiunga katika Chama hicho.

(Picha na Francisca Romanus, Mahakama ya Hakimu Mkazi, Musoma-Mara)