WATUMISHI WA MAHAKAMA WILAYANI RUNGWE WATAKIWA KUFANYA KAZI KWA BIDII.

Na Rajabu Singana, Mahakama Kuu Mbeya

Jaji Mfawidhi wa Mahakama Kuu-Kanda ya Mbeya, Mhe. Robert Makaramba amewaasa Watumishi wa Mahakama ya Wilaya Rungwe kuwa na mahusiano mazuri katika ufanyaji kazi kwa kuwa muda mwingi wanautumia wakiwa katika maeneo ya kazi kuliko sehemu nyingine. 

Akiwa katika ziara ya kikazi katika Mahakama ya Wilaya hiyo Oktoba 19, 2018, Mhe. Jaji Makaramba alifanya mazungumzo na watumishi wa wilaya hiyo na kuwataka Watumishi hao kufanya kazi kwa kushirikiana kama timu.

“Tunataka Mahakama safi na yenye watu safi sio usafi wa suti pekee. Na mnatakiwa kufanya kazi kama hakuna kesho,” alisema Jaji Mfawidhi huyo.

Mbali na kuzungumza na Watumishi katika ziara yake, Mhe. Jaji Makaramba alifanya ukaguzi wa ujenzi wa jengo la Mahakama ya Wilaya Rungwe ambalo linajengwa na Kampuni ya Moladi Tanzania Limited. 

Ujenzi huo unafuatia jitihada zinazoendelea kufanywa na Mahakama ya Tanzania kupitia Mpango Mkakati wa miaka mitano (2015/2016-2019/2020). 

Akitoa taarifa ya ujenzi huo, Mwakilishi wa Mkandarasi, Mhandisi Erick Muro alisema ujenzi huo unatarajiwa kukamilika ndani ya kipindi cha mwaka mmoja.

Katika hatua nyingine ili kujenga mahusiano mazuri ya kitaasisi, Mhe. Makaramba alimtembelea Mkuu wa Wilaya ya Rungwe Mhe. Chalya Julius na kufanya nae mazungumzo. 

Mhe. Makaramba alitoa shukrani kwa ofisi ya Mkuu wa Wilaya hiyo kwa kuipatia Mahakama jengo la kuendeshea shughuli zake kwa muda mrefu. Mazungumzo yao yaligusia  uboreshaji wa Kamati ya Maadili ya Mahakimu ambayo ipo chini ya Mkuu wa Wilaya na walikubaliana kuandaa semina elekezi itakayohusu namna bora ya kushughulikia maadili ya Mahakimu.

 Mhandisi Erick Muro (mwenye fulana nyeusi) akimuelekeza jambo Mhe. Robert Makaramba alipokuwa akikagua ujenzi wa jengo la Mahakama ya Wilaya Rungwe.

Muonekano wa  jengo la Mahakama ya Wilaya Rungwe linaloendelea kujengwa.

Baadhi ya Watumishi wa Mahakama ya Wilaya Rungwe, wakimsikiliza Jaji Mfawidhi, Mahakama Kuu, Kanda ya Mbeya, Mhe. Robert Makaramba (hayupo pichani) alipokuwa akizungumza nao.