MAHAKAMA KUU, DIVISHENI YA ARDHI NA MKAKATI WA KUMALIZA MASHAURI YA MLUNDIKANO

Na Dhillon John- Mahakama Kuu (Ardhi)

Mahakama kuu ya Tanzania, Divisheni ya Ardhi imefanikiwa kusikiliza na kumaliza mashauri 73 kati ya 92 yenye umri wa zaidi ya miaka mitano katika vikao Maalum (Sessions) viwili vilivyofanyika kuanzia Oktoba Mosi mpaka Novemba 23, 2018.

Vikao hivyo maalum vya kumaliza mashauri ya muda mrefu vilihusisha Majaji sita (6) wa Divisheni hiyo na wengine watatu (3) kutoka nje ya Divisheni na kufanya idadi ya Majaji waliosikiliza mashauri hayo kuwa tisa (9).

Kwa mujibu wa Taarifa iliyotolewa kwenye kikao cha mwisho wa mwaka cha Divisheni hiyo kilichofanyika hivi karibuni mashauri 73 kati ya 92 yaliyopangwa kusikilizwa yalisikilizwa na kutolewa maamuzi ambayo ni sawa na aslimia 79.

Taarifa hiyo ilifafanua kuwa mashauri 19 ambayo ni sawa na asilimia 21 ndiyo yaliyobaki na Majaji wanaendelea kuyasikiliza nje ya utaratibu wa vikao (session) na wanakusudia kuyamaliza yote.

Katika kuhakikisha mashauri yenye umri wa kuanzia miaka mitano na kuendelea yanaisha, Divisheni ya Ardhi pia imeandaa kikao kingine cha tatu mbele ya Mhe. Jaji Amour Mohamed kilichoanza Novemba 26, 2018 kinacholenga kusikiliza na kutolea uamuzi mashauri sita (6) ambayo pia yatamalizika. Kikao hicho maalum kinatarajiwa kukamilika Disemba 14 mwaka huu.

Kuhusu Mfumo wa Uboreshaji wa Kumbukumbu za Mahakama (Judicial Statistical Dashboard System- JSDS), Divisheni ya Ardhi imehamisha mashauri 3176 kutoka JSDS I kwenda JSDS II.

Hadi kufikia Disemba 12, 2018 Divisheni ilikuwa imehuisha mashauri 1474 na kusajili mashauri mapya 2707 kwenye mfumo wa JSDS II. Aidha, mashauri 1702 hayakuweza kuhuishwa kutokana na changamoto za kimfumo na mashauri 378 kujirudia (Duplicate) ambapo suala hilo linafanyiwa kazi.

Awali akifungua kikao hicho, Jaji Mfawidhi wa Divisheni ya Ardhi aliwapongeza watumishi kwa ushirikiano mkubwa waliouonesha ambao umewezesha kutekeleza malengo yaliyowekwa na kuwaomba kuendeleza ushirikiano huo.

Kikao cha kumaliza mwaka cha Divisheni kiliongozwa na Jaji Mfawidhi Mhe. Rehema Kerefu na pia kuhudhuriwa na Majaji wengine wakiwemo Waheshimiwa Leila Mgonya  Salma Maghimbi na Awadh Mohamed. Kikao hicho pia kilihudhuriwa na Mtendaji wa Mahakama, Naibu Msajili pamoja na Watumishi wengine.

  Jaji Mfawidhi wa Mahakama kuu ya Tanzania Divisheni ya Ardhi Mhe. Rehema Kerefu akifungua kikao cha mwisho wa mwaka cha Divisheni ya Ardhi.

  

 Majaji wa Mahakama Kuu ya Tanzania Divisheni ya Ardhi wakiwa kwenye kikao hicho. Wa pili kulia ni Jaji Mfawidhi wa Divisheni hiyo Mhe. Rehema Kerefu, wa Kwanza kulia ni Mhe. Salma Maghimbi.  Wa kwanza kushoto ni Mhe. Awadh Mohamed akifuatiwa na Mhe. Leila Mgonya. 

 Mtendaji wa Mahakama Kuu ya Tanzania Divisheni ya Ardhi Bwn. Benjamin Mlimbila akizungumza kwenye kikao hicho.

Baadhi ya Watumishi wa Mahakama Kuu ya Tanzania Divisheni ya Ardhi wakiwa kwenye kikao hicho.