WANANCHI JITOKEZENI MPATE ELIMU YA SHERIA- JAJI MKUU MSTAAFU

Jaji    Mkuu Mstaafu, Mhe.Mohamed Chande Othman amewataka wananchi kujitokeza kwa wingi katika Maonesho ya Wiki ya utoaji elimu ya sheria yanayoendelea nchini ili kupata elimu na taratibu mbalimbali za Mahakama.

Kauli hiyo imetolewa leo Februari 02, mwaka huu na  Jaji huyo Mstaafu akiwa mgeni rasmi  wa  siku ya matembezi ya uzinduzi wa Wiki  ya Elimu ya Sheria yanaendelea kufanyika kwenye  Viwanja vya Mnazi Mmoja jijini Dar es Salaam.

“ Natoa wito  kwa wananchi kujitokeza na kushiriki katika maonyesho haya kwani kuna  mambo mengi sana yenye manufaa  katika maisha yetu ya kujifunza na kuyafahamu kwa ustawi  wa shughuli binafsi na taifa kwa ujumla,”alisema   Jaji Mstaafu Othman.

Matembezi hayo yalianzia katika Mahakama ya Hakimu Mkazi Kisutu kupitia  barabara ya Ocean hadi kwenye viwanja vya Mnazi Mmoja.

Kauli mbiu ya mwaka huu ni “utoaji  haki kwa wakati  wajibu wa Mahakama na wadau.”

Aidha Jaji Mstaafu huyo alisisitiza kwamba   huduma zinazotolewa zielekezwe zaidi maeneo ya vijijini kuliko na wananchi wengi wenye uhitaji   wa msaada wa huduma za kisheria. 

Mathalani taratibu ufunguaji mashauri, uendeshaji mashauri rufaa  mamlaka  na taasisi zinazohusika kuwakamata wahalifu, kufanya upelelezi,kuendesha mashauri ya jinai mahakamani, na taratibu za ufunguaji na uendeshaji wa mashauri ya madai mahakamani.

Kwa upande wake Jaji Mfawidhi wa Kanda ya Dar es Salaam, Mhe. Beatrice Mutungi alisema elimu ya kisheria itatolewa kwenye vituo  vilivyo mtaani katika Manispaa zote za jiji la Dar es Salaam.

Maonesho haya yanadhimishwa nchini  katika maeneo mbalimbali na kitaifa yanafanyika katika Viwanja vya Nyerere ‘Square’ jijini Dodoma ambapo  Mgeni Rasmi ni Waziri Mkuu, Mhe. Majaliwa Kassim Majaliwa. 

Kilele cha Maadhimsho kitafanyika  Februari 6,mwaka huu kwenye viwanja vya Chimala na mgeni rasmi anatarajiwa kuwa Rais wa Jamhuri ya Muungano wa Tanzania, Mhe.John Pombe Magufuli.

 Jaji Mkuu Mstaafu, Mhe. Mohamed Chande Othman (katikati) akiongoza Matembezi maalum ya ufunguzi wa Wiki ya Utoaji Elimu ya Sheria kwa upande wa Mahakama Kuu, Kanda ya Dar es Salaam. Maonesho haya yanaendelea nchini nzima, kitaifa yanafanyika katika Viwanja vya Nyerere Square jijini Dodoma na kwa upande wa Dar es Salaam maonesho haya yanafanyika katika Viwanja vya Mnazi Mmoja. Walioongozana na Mhe. Jaji ni baadhi ya Wahe. Majaji wa Mahakama ya Rufani, Watumishi wa Mahakama pamoja na Wageni waalikwa.

Picha mbalimbali za Watumishi wa Mahakama na Wadau wakiwa katika Matembezi maalum ya kuashiria ufunguzi rasmi ya Maonesho ya Wiki ya Utoaji Elimu ya Sheria kwa upande wa Mahakama Kuu, Kanda ya Dar es Salaam yaliyofanyika mapema Februari 2 mwaka huu.

Jaji Mkuu Mstaafu, Mhe. Mohamed Chande Othman akifungua rasmi Maonesho ya Wiki ya Utoaji elimu ya Sheria mapema Februari 02, katika Viwanja vya Mnazi Mmoja jijini Dar es Salaam, katika hotuba yake, Mhe. Jaji Chande amewataka Wananchi kutembelea Maonesho hayo ambayo yanaendelea nchi nzima ili waweze kupata elimu juu ya taratibu mbalimbali za Kimahakama.

Jaji Mfawidhi, Mahakama Kuu Kanda ya Dar es Salaam, Mhe. Beatrice Mutungi akizungumza na Watumishi na Wageni waalikwa walioshiriki katika uzinduzi rasmi wa Wiki ya Utoaji wa elimu ya Sheria.

Sehemu ya Watumishi wa Mahakama kutoka katika ngazi mbalimbali za Mahakama mkoani Dar es Salaam wakifuatilia sherehe za uzinduzi rasmi wa Maonesho ya Wiki ya Utoaji wa Elimu ya sheria.

Meza Kuu wakifuatilia kinachojiri katika sherehe hizo.

Kwaya ya Mahakama ikitumbuiza katika sherehe hizo.

Mgeni rasmi, Mhe. Jaji Mstaafu Chande akipatiwa maelezo kutoka kwa Naibu Msajili, Mahakama Kuu Kanda ya Dar es Salaam, Mhe. Fovo pindi alipotembelea mabanda hayo ili kujuzwa zaidi huduma zitakazotolewa.

Hakimu wa Mahakama ya Hakimu Mkazi Kisutu ambaye pia ni Naibu Msajili, Mhe.Augustine Rwizile (aliyeshika kipaza sauti) akifafanua jambo kwa Mhe. Mgeni rasmi pindi alipotembelea katika banda la Mahakama ya Hakimu Mkazi Kisutu.

Mhe. Mgeni rasmi akisaini kitabu cha wageni katika banda la Wizara ya Mambo ya Ndani ya Nchi na la Baraza la Usuluhishi (CMA) ambao pia wanashiriki katika Maonesho hayo, Wadau wengine wanaoshiriki katika Maonesho hayo pamoja na Mahakama Kanda ya Dar es Salaam ni Chama cha Wanasheria Tanganyika (TLS), Baraza la Ardhi la Wilaya ya Ilala, Polisi n.k.

Mhe. Mgeni rasmi akizungumza na Waandishi wa Habari waliohudhuria katika sherehe hizo.

Jaji Mkuu msatafu wa Tanzania (katikati), Mhe. Mohamed Chande Othman akiwa katika picha ya pamoja na Wahe. Majaji wa Mahakama ya Rufani na Mahakama Kuu walioshiriki katika sherehe hizo.

  Picha ya pamoja kati ya Mgeni rasmi Wahe. Majaji na baadhi ya Watumishi wa Mahakama-  Dar es Salaam.

(Habari na picha na Magreth Kinabo na Mary Gwera, Mahakama)