JAJI MKUU WA TANZANIA ATEMBELEA MAONESHO YA WIKI YA SHERIA DODOMA

Na Lydia Churi-Mahakama, Dodoma

Jaji Mkuu wa Tanzania Mhe. Prof. Ibrahim Hamis Juma amewataka wananchi wa mkoa wa Dodoma na Maeneo ya jirani kujitokeza kwa wingi kwenye Maonesho ya Wiki ya utoaji wa Elimu ya Sheria na kutumia nafasi hiyo kujifunza masuala mbalimbali yanayohusu Mahakama.

 Akizungumza na Waandishi wa Habari mara baada ya kutembelea maonesho hayo leo, Jaji Mkuu pia amewataka wananchi wenye malalamiko na maoni kuhusu utendaji kazi wa Mahakama ya Tanzania kujitokeza na kutoa hizo ili ziweze kujibiwa na watumishi mbalimbali wa Mahakama walioko kwenye Maonesho hayo.

Jaji Mkuu pia ameto wito kwa wananchi wa Dodoma kufika na kuiuliza maswali Mahakama hasa juu ya ucheleweshwaji wa kesi zao na kuahidi kuwa maswali hayo yatajibiwa kwa lengo la hakikisha wanapata haki kwa wakati.

“Nawakaribisha wananchi wenye nafasi kufika kwenye viwanja vya Nyerere Square ili waweze kuona Mahakama ya Tanzania inavyofanya kazi zake kwa kushirikiana na wadau, ni wakati mzuri wa kutathmini utendaji wa Mahakama katika kipindi cha mwaka moja yaani tangu 2018” alisema Jaji Mkuu.

Alisema katika kipindi cha mwaka mmoja, Mahakama ya Tanzania imepiga hatua hasa kutokana na matumizi ya Teknolojia ya Habari na Mawasiliano (Tehama) katika kesi.  Aliongeza kuwa kupitia Maonesho ya Wiki ya Sheria, wananchi watajifunza kuwasilisha kesi katika ngazi mbalimbali za Mahakama.

Akizungumzia mashauri kukaa kwa muda mrefu Mahakamani, Jaji Mkuu alisema Mahakama imekuwa ikilaumiwa kuchelewesha kesi lakini wakati mwingine kesi zimekuwa zikichelewa kwa kuwa ni lazima kesi ishughulikiwe na baadhi ya Taasisi wadau huku akitoa mfano kuwa kesi hupepelezwa na polisi lakini huendeshwa na Mwendesha Mashtaka.

Wiki ya Sheria imeanza jana Januari 31 jijini Dodoma na itamalizika Februari 5 ambapo siku ya Sheria nchini itaadhimishwa Februari 6, 2019 katika viwanja vya Chimala jijini Dar es salaam.

Jaji Mkuu wa Tanzania Mhe. Prof. Ibrahim Hamis Juma akisalimiana na Msajili Mkuu wa Mkurugenzi Msaidizi wa Utawala wa Mahakama Wanyenda Kutta mara baada ya kuwasili kwenye viwanja vya Nyerere Square kwenye Maonesho ya Wiki ya Sheria. Katikati ni Msajili Mkuu wa Mahakama ya Tanzania 

Mhe. Katarina Revocati. 

 Wananchi wa Dodoma wakipatiwa huduma kwenye banda la Maonesho la mahakama ya Tanzania lililopo kwenye viwanja vya Nyerere Square. 

Mchumi wa Mahakama ya Tanzania Bwn. Geofrey Mashaffi akifafanua jambo kuhusu Maboresho ya Mahakama hususan ujenzi wa majengo katika banda la kitengo cha Maboresho kwenye kwenye viwanja vya Nyerere Square katika Maonesho ya Wiki ya Sheria yanayoendelea.

 Jaji Mkuu wa Tanzania Mhe. Prof. Ibrahim Hamis Juma akisaini kitabu cha wageni alipotembelea banda la wizara ya Katiba na Sheria kwenye Maonesho ya Wiki ya Sheria. 

Jaji Mkuu wa Tanzania Mhe. Prof. Ibrahim Hamis Juma akiwa kwenye banda la Takukuru kwenye Maonesho ya Wiki ya Sheria. 


 Jaji Mkuu wa Tanzania Mhe. Prof. Ibrahim Hamis Juma akisalimiana na Msajili Mkuu wa Mkurugenzi Msaidizi wa Utawala wa Mahakama Wanyenda Kutta mara baada ya kuwasili kwenye viwanja vya Nyerere Square kwenye Maonesho ya Wiki ya Sheria. Katikati ni Msajili Mkuu wa Mahakama ya Tanzania Mhe. Katarina Revocati. 

 Meneja wa Kitengo cha Sayansi Jinai na Vinasaba(DNA) wa Ofisi ya Mkemia Mkuu wa Serikali bibi Hadija Mwema akifafanua jambo kwa Jaji Mkuu wa Tanzania Mhe. Prof. Ibrahim Hamis Juma alipotembelea banda hilo.