JUDICIARY OF TANZANIA: WAZIRI MKUU AIPONGEZA MAHAKAMA KWA MATUMIZI YA TEHAMA

Na Lydia Churi- Mahakama, Dodoma

Waziri Mkuu wa Jamhuri ya Muungano wa Tanzania Mhe. Majaliwa Kassim Majaliwa ameipongeza Mahakama ya Tanzania kwa kuanza kutoa huduma zake kwa njia ya Tehama na kusema kuwa hatua hiyo itarahisisha upatikanaji wa haki na kumpunguzia mwananchi mzigo wa kufuata huduma za mahakama.

Akizindua wiki ya Sheria leo jijini Dodoma Waziri Mkuu amesema matumizi ya Tehama ndani ya Mahakama ya Tanzania pia yatasaidia kuleta uwazi katika utoaji wa huduma na kuwataka viongozi wa Mahakama kutokatishwa tamaa na changamoto za teknolojia zilizopo.

“Naunga mkono kwa dhati uamuzi wa Mahakama ya Tanzania wa kutumia Tehama katika shughuli zake na serikali ya awamu ya tano itafuatilia kwa karibu changamoto zitakazotokana na matumizi ya Teknolojia kwa Mahakama na kuzipatia ufumbuzi”, alisema.

Akizungumzia Maonesho ya Wiki ya Sheria, Mhe. Majaliwa aliwataka wananchi wa Dodoma kujitokeza kwa wingi katika Maonesho hayo ili waweze kujifunza mambo mbalimbali yanayohusu upatikananji wa haki zao. Alisema wananchi wengi wana uelewa mdogo wa masuala ya sheria na taratibu za kimahakama.

Aidha, Waziri Mkuu ameitaka Mahakama ya Tanzania kuusambaza nchi nzima mfumo waliouanzisha wa kutoa elimu ya Sheria kwa wanafunzi wa Shule za Sekondari na vyuo ili kuongeza uelewa wa sheria kwa vijana na pia kuwajenga katika maadili yanayofaa.

Kuhusu kuwashirikisha wadau katika shughuli zake, Waziri Mkuu amesema anavutiwa na Mahakama kwa hatua ya kuwashirikisha wadau wake na kuwataka kuuendeleza ushitrikiano huo ili wananchi wapate haki zao kwa wakati.

Naye Jaji Mkuu wa Tanzania Mhe. Prof. Ibrahim Hamis Juma amesisitiza umuhimu wa Serikali kutumia ushauri wa kisheria wa Ofisi ya Mwanasheria wa Serikali kwa kuwa hakuna jambo lolote linalofanywa na serikali ambalo haliongozwi kwa sheria.

Alisema viongozi wamekuwa wakitoa amri na maagizo yanayosababisha migongano ya kisheria na hasara kwa Serikali hivyo ni muhimu kwa viongozi hao kufuata ushauri wa wanasheria.

Aidha, Jaji Mkuu amewakumbusha viongozi wa Serikali kuanzia ngazi ya vijiji, kata, tarafa, wilaya, mikoa, Idara na Wizara, wabunge, Majaji, Mahakimu na watumishi wa Umma kuwa Mamlaka ya Mihimili mitatu ya dola yanatokana na nguvu ya Sheria, na kuwa nguvu hiyo haimuonei mwananchi yeyote”alisema.

Jaji Mkuu ametoa wito kwa wakuu wa wilaya na mikoa ambao ni wenyeviti wa kamati za Maadili kwenye wilaya na mikoa yao kujenga maadili na kuimarisha utawala wa sheria unaoheshimu nafasi pamoja na uhuru wa Mahakama.

Alisema kutokana nafasi zao katika kamati za Maadili, wakuu wa wilaya na mikoa wanayo nafasi ya kuomba ushauri wa wanansheria wa Serikali kuhusu jambo lolote lililo kwenye himaya ya Mahakama.

Alisema viongozi wa ngazi mbalimbali wanapaswa kulinda na kusimamia Sheria za nchi ili kulinda amani na utulivu katika nchi.

Kuhusu Maonesho ya wiki ya sheria, Jaji Mkuu amewataka wananchi kutumia nafasi hiyo kujifunza na kuelewa namna sheria zinavyofanya kazi, haki zao kisheria, taratibu za kudai haki zao kwa mujibu wa sheria na maboresho yanayofanyika ndani ya Mahakama yatakayosababisha sheria na mifumo ya utoaji haki itumike kwa manufaa na ustawi wa wananchi.

Waziri Mkuu wa Jamhuri ya Muungano wa Tanzania Mhe. Majaliwa Kassim Majaliwa akiongoza Matembezi ya Uzinduzi wa Wiki na Siku ya Sheria nchini jijini Dodoma leo. Kulia kwake ni Jaji Mkuu wa Tanzania Mhe. Prof. Ibrahim Hamis Juma akifuatiwa na Mkuu wa Mkoa wa Dodoma Mhe. Binnilith Mahenge anayefuatiwa na Naibu Waziri wa Ardhi, Nyumba na Maendeleo ya Makazi Mhe. Angelina Mabula. Wa kwanza kushoto ni Naibu Spika wa Bunge la Tanzania Mhe. Tulia Akson

Waziri Mkuu wa Jamhuri ya Muungano wa Tanzania Mhe. Majaliwa Kassim Majaliwa akiongoza Mazoezi ya viungo mara baada ya Matembezi ya Uzinduzi wa Wiki na Siku ya Sheria nchini jijini Dodoma leo.

Waziri Mkuu wa Jamhuri ya Muungano wa Tanzania Mhe. Majaliwa Kassim Majaliwa akipata Maelezo kutoka kwa Meneja wa kitengo cha Vinasaba (DNA) wa Ofisi ya Mkemia Mkuu wa Serikali bibi Hadija Mwema alipotembelea banda hilo.

Mtendaji Mkuu wa Mahakama ya Tanzania Mhe. Hussein Kattanga akimuelezea Waziri Mkuu wa Jamhuri ya Muungano wa Tanzania Mhe. Majaliwa Kassim Majaliwa kuhusu Maboresho ya huduma za Mahakama hususan ujenzi wa Miundombinu ya Majengo.

Waziri Mkuu wa Jamhuri ya Muungano wa Tanzania Mhe. Majaliwa Kassim Majaliwa akielezea jambo kuhusu Maboresho ya Mahakama alipotembelea banda la Kitengo cha Maboresho cha Mahakama.