KESI NNE ZAENDESHWA NA MAHAKAMA YA RUFAA KWA NJIA YA MTANDAO

Na Magreth Kinabo na Dennis Buyekwa

Mahakama ya Rufani ya Tanzania kanda ya Mbeya na Dar es Salaam leo imesikiliza mashauri manne tofauti kwa njia ya Mtandao (Video Conferencing) ambayo yamehusisha mashauri ya mauaji na yale ya madai yote kutoka mkoani Mbeya.

Mashauri hayo yamesikilizwa  katika Kituo cha Mafunzo  kilichopo  Mahakama  ya  Hakimu Mkazi Kisutu  jijini Dar es salaam huku Majaji wa Mahakama hiyo  wakiwa Dar es Salaam na washitakiwa wakiwa  Jijini Mbeya.

Shauri la kwanza linamhusu askari mwenye namba E H/5842 D/C  Maduhu ambaye  anadaiwa kukabiliwa na shitaka la mauaji Katika kesi hiyo.

Katika shauri hilo mtuhumiwa ameieleza Mahakama kuwa alishindwa kuwasilisha vielelezo vinavyotakiwa na mahakama kwa sababu ya kutokuwa na mawasiliano mazuri baina yake na wakili wake kitendo kilichopelekea mtuhumiwa kushindwa kupata vielelezo muhimu vilivyokuwa kwa wakili wake.  Maduhu aliwasilisha maombi yake mbele ya Jaji wa Mahakama ya Rufani Mheshimiwa Rehema Mkuye.

Baada ya Wakili wa Serikali kusikiliza maombi ya upande wa mtuhumiwa, Wakili wa serikali Rosemary Mgeni alikubaliana na maombi hayo ya upande wa mtuhumiwa na kusema hana pingamizi lolote dhidi ya mtuhumiwa.

Kufuatia hatua hiyo Jaji wa Mahakama ya Rufani Mheshimiwa Mkuye ameomba kupewa muda ili akatafakari  maombi hayo  na Mahakama itawapa taarifa juu ya uamuzi uliofikiwa.

Katika shauri jingine la mauaji lililowakabili watuhumiwa wawili bwana Charles Kalungu na Charles Kalinga, watuhumiwa wameiomba mahakama hiyo ya Rufani kuweza kuongezewa muda baada ya kushindwa kuleta maombi yao ndani ya muda  uliopangwa wa siku 60 .

Baada ya wakili wa Serikali kukagua viapo vya watuhumiwa na Mheshimiwa Jaji kujiridhisha kuwa vinafanana, Mheshimiwa Jaji aliwaamuru watuhumiwa kuendelea na utetezi wao.

Wakitoa utetezi wao mbele ya Jaji wa mahakama hiyo, Mheshimiwa Mkuye, watuhumiwa hao wameieleza mahakama hiyo kuwa walishindwa kuwasilisha vielelezo hiyo kutokana na changamoto mbali mbali walizokutana nazo katika ofisi za Idara ya Magereza, moja ya changamoto iliyoelezwa na watuhumiwa hao ni kutokupata kiapo cha Afisa wa Magereza kwa sababu Afisa huyo alishinndwa kuwasilisha kiapo hicho mbele ya Jaji.

Kufuatia utetezi huo Wakili wa Serikali Saraji Eboru, ameiomba mahakama hiyo kutoyakubali maombi hayo kwa kuwa hayana sababu za msingi.

Baada ya Jaji wa Mahakama ya Rufani  Mheshimiwa  Mkuye kusikiliza utetezi wa pande zote mbili ameiomba mahakama hiyo kumpa muda ili akatafakari maombi hayo na mara baada ya hapo atawajulisha uamuzi uliofikiwa.

Katika Shauri jingine la madai lilimhusisha Oswadi Maruma dhidi ya Halmashauri ya Jiji la Mbeya, Oswadi ameiomba Mahakama ya Rufani mbele ya Mheshimiwa Jaji Sivangilwa Mwangesi iweze kupitia upya shauri lake ili iweze kusikilizwa na Mahakama ya Rufani.

 Wakili wa Serikali Hangi Chang’a ameiomba Mahakama hiyo itupilie mbali shaurili hilo kwa kuwa halina msingi wa kuendelea kusikilizwa na mahakama hiyo.

Baada ya Mheshimiwa Jaji kusilikiza utetezi wa pande zote mbili ameomba apatiwe muda wa kwenda kutafakari shauri hilo ili aweze kutoa uamuzi na aweze kupanga tarehe ya kusikiliza shauri hilo.

Shauri jingine limemhusisha Festo Sudi dhidi ya kijiji cha Iyombe, Wakili Simon Mwakolo kwa niaba ya mteja wake ameiomba Serikali iweze kumuongezea muda mteja wake ili aweze kuleta  maombi ya kukata  rufaa mahakama ya rufani nje ya muda wa siku 60 uliowekwa na mahakama hiyo.

Wakili huyo ameleta maombi hayo kwa kuzingatia kanuni namba 4 (2a) cha mwaka 2009, kwa kuzingatia shauri lililosikilizwa Mahakama kuu kanda ya Mbeya tarehe 24/10/1997, baada ya shauri hilo kusikilizwa na kutolewa maamuzi  mlalamikaji aliomba shauri hilo liwe katika shauri namba 28 la mwaka 1997 ambapo maamuzi yake yalikataliwa tarehe 16/07/1999.

Mwaka 2000 mlalamikaji alileta maombi mengine lakini Wakili wake wa wakati huo aliamua kuliondoa shauri hilo Mahakamani pasipo kumshirikisha mteja wake.

Kufuatia hatua hiyo mlalamikaji ameiomba mahakama hiyo iweze kumruhusu kuendelea na kesi hiyo kwa kile alichoeleza kuwa kwa sasa ana uelewa juu ya madai ya msingi wa kesi hiyo.

Mheshimiwa Jaji Sivangilwa Mwangesi baada ya kusikiliza upande wa mlalamikaji ameomba kupatiwa muda ili aweza kutafakari maombi hayo kwa ajili ya kutoa maamuzi juu ya shauri hilo.



Jaji wa Mahakama ya Rufaa Mhe. Sivangilwa Mwangesi(katikati)  akiendesha kesi kwa njia ya  Mtandao (Video Conferencing) katika kituo cha mafunzo kilichopo  Mahakama ya Hakimu Mkazi,Kisutu jijini Dar es Salaam.