MAJAJI WA MAHAKAMA ZA UJERUMANI NA TANZANIA WABADILISHANA UZOEFU

Na Ibrahim Mdachi IJA - Lushoto

Majaji wa Mahakama na Waendesha Mashtaka kutoka nchini Ujerumani wapo nchini Tanzania kwa lengo la kubadilishana uzoefu na Majaji pamoja na Waendesha Mashtaka wa Tanzania.

Akifungua Programu ya siku tano (5) iliyoanza rasmi Machi, 25, 2019 Jaji Mfawidhi, Mahakama Kuu Kanda ya Arusha, Mhe. Jaji Moses Mzuna, katika hotuba yake aliwakaribisha wageni hao kwa niaba ya Mahakama na kuwaeleza namna ambavyo Mahakama imefurahishwa na ujio wao na kwamba wana matarajio makubwa ya kunufaika na programu hiyo.

Mhe. Jaji Mzuna alisema Programu hii inafanyika ikiwa ni sehemu ya utekelezaji wa mpango wa kubadilishana uzoefu kati ya Mahakama ya Ujerumani na Mahakama za Afrika (German and Africa Judiciaries Exchange Programme).

Programu hii ambayo inatarajiwa kumalizika Machi 29, 2019 inafanyika kwa mara ya kwanza Jijini Arusha katika Ukumbi wa wazi wa Mahakama ya Biashara ambapo washiriki kumi (10) wakiwemo Majaji na Waendesha wameshiriki.

Naye, Jaji wa Mahakama Kuu Kanda ya Arusha, Mhe. Jaji Issa Maige mmoja wa washiriki aliwasilisha mada kuhusu mfumo wa sheria na Mahakama nchini ikianzia Mahakama ya Mwanzo hadi ngazi ya Mahakama ya Rufani. Vilevile alieleza jinsi gani Jaji wa Mahakama anavyopatikana sambamba na utaratibu unaotumika.

Kwa upande wa Ujerumani Mhe. Jaji Evelyn Oltmans Jaji wa Mahakama ya Rufani ya Mjini Stuttgart huko Ujerumani alielezea mfumo mzima wa kiutendaji wa Mahakama ya Ujerumani zikiwemo taratibu za kumpata Jaji wa Mahakama ya Ujerumani, ambapo kupitia maelezo yake Majaji pamoja na Waendesha Mashtaka wa Watanzania waliweza kujifunza na kuona utofauti ya ngazi za Mahakama na pia hata jinsi Jaji anavyopatikana.

                         

Mhe. Jaji Oltmans alieleza kuwa, kwa upande wa Ujerumani Jaji anaweza akafanya kazi kwa muda na kisha kwenda kuwa Mwendesha Mashtaka na baadaye kurudi tena kuwa Jaji kitu ambacho ni tofauti na mfumo wa Tanzania.

 “Si Majaji wote wanaosikiliza mashauri ya jinai au madai, wapo Majaji maalumu kulingana na aina ya mashauri, vilevile hata kwa upande wa Mawakili na Waendesha Mashtaka wamegawanyika kwa utaratibu huo" alieleza Mhe. Oltmans.

Hali kadhalika, Mwendesha Mashtaka wa Ujerumani, Dr. Eike Fesefeld aliwaelezea Washiriki juu ya taratibu na kanuni zinazotumika katika kuendesha mashauri ya jinai ambapo alieleza kuwa kila jimbo nchini Ujerumani lina katiba yake ambayo inatumika kuongoza uendeshwaji wa mashauri lakini pia ipo katiba ya Jamhuri ya Ujerumani ambayo inatumika kuongoza uendeshaji mashauri katika ngazi ya Mahakama ya Juu ‘Supreme Court’.

Katika kipindi watakachokuwepo nchini Majaji hao watapata fursa ya kutembelea Mahakama Kuu kanda ya Mwanza na Arusha vile vile Mahakama za Hakimu Mkazi, Mahakama ya Afrika Mashariki pamoja na kusikiliza mashauri katika mahakama hizo. Vile vile washiriki watapata wasaa wa kuambatana na washiriki wenzao katika utendaji wa kazi wa kila siku.

Katika kutekeleza mpango huo, inatazamiwa kuwa washiriki kutoka Tanzania watapata fursa pia ya kwenda Ujerumani ikiwa ni mwendelezo wa utekelezaji wa zoezi hilo la ubadilishanaji uzoefu.

Programu hii imeandaliwa na Mahakama ya Tanzania, Mahakama ya Ujerumani kwa ushirikiano na Mahakama ya Afrika Mashariki na kuratibiwa na Chuo cha Uongozi wa Mahakama Lushoto (IJA). 

 Jaji Mfawidhi wa Mahakama Kuu Kanda ya Arusha ambaye pia ni Mgeni rasmi wa ufunguzi wa Programu hiyo, Mhe. Jaji Moses Mzuna, akitoa hotuba fupi.

Mhe. Jaji Venerander Alexander akitoa maelezo kuhusu mfumo wa utoaji elimu ya sheria nchini Ujerumani.

 Hakimu Mfawidhi Mkoa wa Arusha, Mhe Nikku Mwakatobe  akiwaeleza jambo wageni hao.

Ujumbe wa Wawakilishi kutoka Mahakama za Ujerumani na Tanzania katika picha ya pamoja  na Wawakilishi kutoka Tanzania.