RAIS WA IRMCT AKUTANA NA JAJI MKUU

Na Mary Gwera, Mahakama

Rais wa Taasisi ya Kimataifa inayoshughulikia mabaki ya shughuli za Mahakama za Makosa ya Jinai ‘International Residual Mechanism for Criminal Tribunals-IRMCT’, Mhe. Jaji. Carmel Agius amekutana na Mhe. Jaji Mkuu wa Tanzania kwa lengo la kujitambulisha.

Rais huyo wa IRMCT, Mhe. Jaji Argius aliteuliwa rasmi kushika wadhifa huo na Katibu Mkuu wa Umoja wa Mataifa (UN) Januari 19 mwaka huu.

Katika mazungumzo yao yaliyofanyika Machi 07, kwenye Ofisi ya Mhe. Jaji Mkuu, Mahakama ya Rufani jijini Dar es Salaam, Rais huyo alimshukuru Mhe. Jaji Mkuu kwa kwa kukubali ombi la yeye kukutana nae na vilevile alimpongeza kwa kazi kubwa ya kuondoa mlundikano wa mashauri katika Mahakama ya Tanzania.

Jaji. Agius alimuelezea Mhe. Jaji Mkuu jinsi Taasisi hiyo inayojishughulisha na Makosa ya jinai inavyofanya kazi, ambapo ameishukuru Tanzania kwa ushirikiano ambao inaipatia taasisi hiyo.

Kwa upande wake, Jaji Mkuu wa Tanzania, Mhe. Prof. Ibrahim Hamis Juma alimueleza Rais huyo na ujumbe ulioambatana nae juu ya ngazi za Mahakama ya Tanzania ambazo ni tano (5) na jinsi zinavyofanya kazi.

“Mahakama ya Tanzania imegawanyika katika ngazi mbalimbali, kuna Mahakama za Mwanzo zilizopo takribani 900, katika ngazi hii mashauri mengi hufunguliwa, aidha idadi ya Mahakama zilizopo katika ngazi hii bado haitoshelezi hali inayoleta changamoto kwa wananchi waliopo baadhi ya maeneo yasiyokuwa na Mahakama hizo, lengo ni kila kata kuwa na Mahakama ya Mwanzo,” alieleza Mhe. Jaji Mkuu.

Mhe. Prof. Juma aliendelea kuueleza ujumbe huo kuwa Mahakama imejiwekea muda maalum wa kesi kusikilizwa hadi kumalizika katika kila ngazi ya Mahakama, ambapo Mahakama ya Mwanzo kesi husikilizwa kwa muda wa miezi sita (6), Mahakama ya Wilaya na Mkoa/Hakimu Mkazi mwaka mmoja (1), Mahakama Kuu na Mahakama ya Rufani miaka miwili (2).

Aidha; Mhe. Jaji Mkuu alizungumzia mikakati iliyowekwa na Mahakama katika kushughulikia mlundikano wa mashauri mojawapo ikiwa ni kukasimisha mamlaka ya nyongeza kwa baadhi ya Mahakimu ‘Magistrates with extended jurisdiction’ inayowawezesha kusikiliza mashauri ya Mahakama Kuu ambayo kwa kawaida husikilizwa na Majaji wa Mahakama Kuu.

Taasisi ya IRMCT yenye Ofisi zake ‘The Hague’ nchini Uholanzi ina tawi pia Arusha nchini Tanzania ambalo hushughulikia mabaki ya shughuli za iliyokuwa Mahakama ya Kimataifa ya Mauaji ya Kimbari ya Rwanda ‘ICTR’.

Jaji Mkuu wa Tanzania Mhe. Prof. Ibrahim Hamis Juma akiwa na wageni wake kutoka Taasisi ya Kimataifa inayoshughulikia Mabaki ya shughuli za Mahakama za Makosa ya Jinai (International Residual Mechanism for Criminal Tribunals- IRMCT) Mhe. Jaji Carmel Agius (kushoto) walipomtembelea ofisini kwake leo jijini Dar es Salaam.

 Rais wa Taasisi ya Kimataifa inayoshughulikia Mabaki ya shughuli za Mahakama za Makosa ya Jinai (International Residual Mechanism for Criminal Tribunals- IRMCT) Mhe. Jaji Carmel Agius akisoma kitabu cha Mpango Mkakati wa Miaka Mitano wa Mahakama ya Tanzania alichokabidhiwa na Jaji Mkuu wa Tanzania Mhe. Prof. Ibrahim Hamis Juma. 

 Jaji Mkuu wa Tanzania Mhe. Prof. Ibrahim Hamis Juma akiwa katika picha ya pamoja na Rais wa Taasisi ya Kimataifa inayoshughulikia Mabaki ya shughuli za Mahakama za Makosa ya Jinai (International Residual Mechanism for Criminal Tribunals- IRMCT) Mhe. Jaji Carmel Agius (kushoto) alipofika ofisini kwa Jaji Mkuu kumtembelea leo jijini Dar es salaam. Kulia ni Msajili wa Taasisi hiyo Mhe. Olufemi Elias.

(Picha na Lydia Churi, Mahakama)