JAJI KIONGOZI AANZA ZIARA YA KIKAZI MAKAHAMA KUU IRINGA

Na Lusako Mwang’onda-Mahakama Kuu Iringa

Jaji Kiongozi wa Mahakama Kuu ya Tanzania Mheshimiwa Dkt. Eliezer Feleshi leo amewasili mkoani Iringa kuanza rasmi ziara ya kikazi ambapo atakagua shughuli za Mahakama Kuu ya Tanzania kanda ya Iringa.

Kwa mujibu wa ratiba iliyotolewa na ofisi ya Msajili wa Mahakama Kuu ya Tanzania kanda hiyo, Jaji Kiongozi atakuwepo hapa mkoani Iringa mpaka mwisho wa wiki, kabla ya kwenda mkoani Njombe.

Mheshimiwa Jaji Kiongozi alifika mjini Iringa Majira ya saa 5 asubuhi na kupokelewa na viongozi mbalimbali wa Mahakama kuu kanda ya Iringa wakiongozwa na Jaji Mfawidhi wa kanda hiyo Mheshimiwa Penterine Kente.

Kwenye ziara yake hii mheshimiwa Jaji Kiongozi atafanya shughuli mbalimbali za kikazi ikiwemo kushiriki kumuaga kitaaluma aliyekuwa Jaji Mfawidhi wa Mahakama Kuu kanda ya Iringa mheshimiwa Mary Simbo Shangali, ambaye anaagwa rasmi kesho siku ya Ijumaa tarehe 5 April, 2019.

Mheshimiwa Jaji Kiongozi katika ziara yake pia anatarajiwa kuzungumza na watumishi wa Mahakama na kukagua maendeleo ya ujenzi wa jengo la Mahakama mkoani humo.

Jaji Kiongozi wa Mahakama Kuu ya Tanzania Mhe. Dkt. Eliezer Feleshi akizungumza na Viongozi wa Mahakama Kuu ya Tanzania kanda ya Iringa(hawapo pichani)mara baada ya kuwasili mkoani humo kuanza rasmi ziara ya kikazi.