JAJI KIONGOZI AWASILI MKOANI IRINGA KUANZA ZIARA YA KIKAZI KATIKA KANDA HIYO NA KANDA YA MBEYA

Na Mary Gwera, Mahakama-Iringa

Jaji Kiongozi, Mahakama Kuu ya Tanzania, Mhe. Dkt. Eliezer Mbuki Feleshi mapema leo Aprili 04, 2019 amewasili Mkoani Iringa kuanza rasmi ziara ya kikazi katika Mahakama Kanda ya Iringa pamoja na Kanda ya Mbeya.

Katika ziara yake Mhe. Jaji Kiongozi, anatarajiwa kuongoza hafla ya kumuaga rasmi kitaaluma, Jaji Mstaafu wa Mahakama Kuu ya Tanzania, Kanda ya Iringa, Mhe. Jaji Mary Simbo Shangali itakayofanyika Aprili 05, 2019 katika Ukumbi ya Mahakama Kuu-Iringa.

Aidha; Mhe. Jaji Dkt. Feleshi atapata wasaa wa kutembelea Mahakama ya Hakimu Mkazi Njombe ambayo pia ni sehemu ya Kanda ya Iringa na vilevile atazungumza na Watumishi pamoja na kukagua miradi mbalimbali ya ujenzi wa Mahakama inayoendelea katika Kanda hizo mbili.

Lengo la ziara ni kujua  hali ya maendeleo ya utekelezaji wa maboresho ya huduma mbalimbali za  Mahakama na vilevile kuwakumbusha Watumishi wa Mhimili huu kuendelea kutekeleza jukumu la msingi la utoaji haki nchini kwa ubora wa hali ya juu kwa manufaa ya wananchi ambao ndio walengwa wakuu. 

Jaji Kiongozi, Mahakama Kuu ya Tanzania, Mhe. Jaji Dkt. Eliezer Mbuki Feleshi (kushoto) akisalimiana na Jaji Mfawidhi, Mahakama Kuu-Kanda ya Iringa, Mhe. Panterine Kente pindi alipowasili mkoani humo.

Mhe. Jaji Kiongozi (wa tatu kulia) akifurahia jambo na Wenyeji wake waliofika kumlaki, wa pili kulia ni Jaji Mfawidhi, Mahakama Kuu-Kanda ya Iringa, Mhe. Panterine Kente na wa kwanza kulia ni Jaji wa Mahakama Kuu, Kanda ya Iringa, Mhe. Immaculate Kajetan Banzi, na wa kwanza kushoto ni Hakimu Mkazi Mfawidhi, Mahakama ya Wilaya Iringa.

Jaji Kiongozi, Mahakama Kuu ya Tanzania, Mhe. Dkt. Eliezer Mbuki Feleshi akisaini kitabu cha wageni pindi alipowasili katika nyumba ya kupumzikia Majaji  ‘Judges’ Lodge’ .

(Picha na Mary Gwera, Mahakama)