JUDICIARY OF TANZANIA: JAJI KIONGOZI AKUTANA NA MKUU WA MKOA WA IRINGA

Na Mary Gwera, Mahakama-Iringa

Katika mwendelezo wa ziara yake ya Mahakama Kanda ya Iringa, Jaji Kiongozi, Mahakama Kuu ya Tanzania, Mhe. Jaji Dkt. Eliezer Mbuki Feleshi amekutana na kufanya mazungumzo na Mkuu wa Mkoa wa Iringa, Mhe. Ally Hapi.

Katika mazungumzo yake na Mkuu huyo wa Mkoa yaliyofanyika Ofisini kwa Mkuu wa Mkoa wa Iringa Aprili 05, 2019, Mhe. Jaji Kiongozi alipata wasaa wa kutoa elimu kuhusu mpango Mkakati wa Mahakama ambapo aliizungumzia nguzo namba tatu (3) ya Kurejesha imani ya jamii na ushirikishwaji wa wadau.

“Mahakama ya Tanzania inaendelea kuboresha huduma zake, ambapo kupitia Mpango Mkakati wetu, nguzo namba tatu (3) inatuelekeza kushirikiana na Wadau katika ufanyaji kazi,” alieleza Mhe. Jaji Kiongozi.

Mbali na nguzo hiyo, Mhe. Jaji Kiongozi alimueleza Mhe. Hapi kuwa Mahakama inaendelea na maboresho ya huduma zake ikiwa ni pamoja na kumaliza mashauri kwa wakati huku akitoa ombi kwa Mkuu huyo wa Mkoa ambaye ni Mwenyekiti wa Kamati ya Ulinzi na Usalama ya Mkoa huo kuelekeza Jeshi la Polisi kuharakisha kumaliza upelelezi.

“Mahakama inaendelea kushughulikia suala la mlundikano ambapo imejiwekea malengo yake kwa kujiwekea kiwango cha idadi na muda wa mashauri kumalizika kwa kila ngazi ya Mahakama, hivyo hili haliwezi kufanikiwa bila ushirikiano na Wadau,” alieleza.

Hata hivyo; Mhe. Jaji Kiongozi alieleza changamoto ya ukosefu wa Gereza la kuhifadhi mahabusu na wafungwa katika Wilaya ya Kilolo na kumuomba Mkuu huyo wa Mkoa kunusuru hali hiyo.

Aidha; Jaji Kiongozi, Mhe. Dkt. Feleshi aliongeza kuwa suala la maboresho linaenda sambamba na ushughulikiaji wa maadili ya Mahakimu na Watumishi wa Mahakama kwa ujumla kwa kuchukua hatua stahiki kwa wale wanaojihusisha na vitendo vya Rushwa na mienendo ya ukiukwaji wa maadili kwa ujumla.

“Mahakama ya Tanzania haina simile na Maafisa wake wanaojihusisha na vitendo vya rushwa na vitendo vya ukiukwaji wa maadili, mbali na Kamati za Maadili za Mahakimu, Mhe. Jaji Mkuu ameelekeza Majaji Wafawidhi kushughulikia masuala ya rushwa na kutoa taarifa pale inapotokea viashiria vya rushwa ili hatua stahiki ziweze kuchukuliwa,” alisisitiza Mhe. Jaji Dkt. Feleshi.

Akizungumzia suala la maadili ya Mahakimu, Mhe. Jaji Kiongozi alieleza kuwa kwa ngazi ya mkoa, Mahakama hutegemea kupata taarifa kutoka katika Kamati za Maadili za Mahakama za mikoa ili kufanya maamuzi stahiki ikiwa ni pamoja na kufukuzwa kazi, kusimamishwa kazi au kuonywa.

“Mara zote tunasisitiza Kamati hizi ambazo Mwenyekiti wake ni Mkuu wa Mkoa kukaa na kuwasilisha taarifa katika Mahakama za Mahakimu wake wanaotuhumiwa na makosa mbalimbali ikiwa ni pamoja na rushwa katika Mkoa husika ili kuchukua hatua zinazostahili kwa mujibu wa sheria,” alieleza Mhe. Jaji. Dkt. Feleshi.

Kwa upande wake Mkuu wa Mkoa wa Iringa, Mhe. Ally Hapi alimueleza Mhe. Jaji Kiongozi kuwa ofisi yake inafanya kazi kwa kushirikiana na Viongozi wa Mahakama katika mkoa huo na alimhakikishia kuwa wataendelea kushirikiana katika utekelezaji wa majukumu mbalimbali.

“Kuhusu suala la Kamati ya Maadili ya Mahakama ya Mkoa, tumepanga kukaa mwezi Mei na tayari nimeshawasiliana na Mahakama Iringa kuhusu kikao hicho na taarifa itatolewa,” alisema Mhe. Hapi.

Jaji Kiongozi, Mahakama Kuu ya Tanzania, Mhe. Jaji Dkt. Eliezer Mbuki Feleshi (kulia) akizungumza jambo na Mkuu wa Mkoa wa Iringa, Mhe. Ally Hapi (Kushoto), wanaosikiliza (mbele kushoto) ni Jaji Mfawidhi, Mahakama Kuu Kanda ya Iringa, Mhe. Jaji Panterine Kente, kulia ni Jaji wa Mahakama Kuu Kanda ya Iringa, Mhe. Jaji Immaculata Kajetan Banzi.

Mkuu wa Mkoa wa Iringa, Mhe. Ally Hapi (kushoto) akisoma nakala ya kitabu cha Mpango Mkakati wa miaka mitano wa Mahakama ya Tanzania (2015/2016-2019/2020) alichopewa na Mhe. Jaji Kiongozi.