JAJI MKUU AWASHAURI MAJAJI WA MAHAKAMA YA RUFANI KUTUMIA MBINU ZA KIUTAMADUNI KATIKA UTOAJI WA HAKI

Na Lydia Churi na Dennis Buyekwa-Mahakama

Jaji Mkuu wa Tanzania Mhe. Prof. Ibrahim Hamis Juma amesema kuwa uelewa wa sheria, ujuzi na tabia ni mambo matatu muhimu wanayotakiwa kuwa nayo Majaji wa Mahakama ya Rufani ili yaweze kuwasaidia katika kutoa maamuzi kwenye mashauri. 

Akifungua Mkutano wa mwaka wa Majaji wa Mahakama ya Rufani wa kutathmini utendaji kazi wa Mahakama hiyo  wa mwaka 2018 na  kuweka mikakati ya kazi kwa mwaka 2019, Jaji Mkuu alisema Majaji kuwa na uelewa wa sheria na ujuzi   haitoshi pasipo kujenga tabia ya kufanya kazi kwa kasi na kwa weledi.

“Uvivu, uchonganishi, kulalamika pamoja na ubishi usio na mwelekeo ni tabia za kibinadamu zinazoweza kuathiri utendaji kazi kwa kuchelewesha upatikanaji wa haki”, alisema Jaji Mkuu.

Alisema Majaji wanao umuhimu wa kipekee katika jamii hivyo hawana budi kutoa haki kwa kufuata sheria ili wananchi waweze kuwa na imani na mfumo wa utoaji haki pamoja na utawala wa sheria.  

“Kupitia mkutano huu mtapata fursa ya kubadilishana uzoefu wa namna ya kumaliza mashauri kwa kasi kwani utoaji haki uko katika utamaduni ambao haujaandikwa popote hivyo naamini mtaibua tamaduni zitakazorahisha utoaji wa haki”.

Akizungumzia ongezeko la idadi ya Majaji wa Mahakama ya Rufani, Jaji Mkuu alisema kuongezeka kwa Majaji hao kutasaidia Mahakama kupunguza changamoto ya mlundikano wa mashauri ya muda mrefu yaliyopo Mahakamani. Hivi sasa kuna Majaji 21 wa Mahakama ya Rufani ambapo awali kulikuwa na Majaji 15.

Kuhusu changamoto, Jaji Mkuu alisema Mahakama inakabiliwa na upungufu wa bajeti kwa ajili ya vikao vya kusikiliza mashauri. Alisema endapo kungekuwa na bajeti ya kutosha vikao vingi Zaidi vya mashauri vingefanyika na kumaliza mlundikano wa mashauri ya muda mrefu.

Alisema sheria imerekebishwa na kuwapa mamlaka Mahakimu na Manaibu Wasajili kusikiliza mashauri ya Mahakama Kuu hususan yale yanayohusu migogoro ya Ardhi ambapo hatua hii itasaidia kupunguza mashauri mahakamani. Aliongeza kuwa ili Mahakama iweze kuwatumia inahitaji kuongezewa bajeti Zaidi ya iliyopo sasa.

Mkutano wa Mwaka huu wa Majaji wa Mahakama ya Rufani pia umewashirikisha Manaibu Wasajili, wasaidizi wa kisheria wa Majaji, Makarani na watunza kumbukumbu ili waweze kusaidiana na Majaji kupanga mikakati ya kumaliza mashauri kwa wakati.

 Jaji Mkuu wa Tanzania Mhe. Prof. Ibrahim Hamis Juma akifungua Mkutano wa Majaji wa Mahakama ya Rufani ya Tanzania wa kutathmini utendaji kazi wa Mahakama hiyo katika mwaka 2018 na kupanga mikakati ya kazi ya mwaka 2019 unaofanyika katika ukumbi wa Mwalim Julius Nyerere jijini Dar es salaam

 Majaji wa Mahakama ya Rufani ya Tanzania wakiwa kwenye Mkutano wao wa kutathmini Utendaji Kazi wa Mahakama hiyo katika mwaka 2018 na kupanga mikakati ya kazi ya mwaka 2019 unaofanyika katika ukumbi wa Mwalim Julius Nyerere jijini Dar es salaam. Kulia ni Mhe. Jaji Shaaban Lila na kushoto ni Mhe. Jaji Rehema Mkuye.

 Jaji Mkuu wa Tanzania Mhe. Prof. Ibrahim Hamis Juma akiwa katika picha ya pamoja na Majaji Wanawake wa Mahakama ya Rufani ya Tanzania mara baada ya kufungua Mkutano wao.

 

  Jaji Mkuu wa Tanzania Mhe. Prof. Ibrahim Hamis Juma akiwa katika picha ya pamoja na Majaji wa Mahakama ya Rufani ya Tanzania mara baada ya kufungua mkutano wao wa kutathmini utendaji kazi wa Mahakama hiyo katika mwaka 2018 na kupanga mikakati ya kazi ya mwaka 2019 unaofanyika katika ukumbi wa Mwalim Julius Nyerere jijini Dar es Salaam.

  Jaji Mkuu wa Tanzania Mhe. Prof. Ibrahim Hamis Juma pamoja na Majaji wastaafu wakiwa katika picha ya pamoja na watumishi wa Mahakama ya Tanzania wakiwemo Manaibu wasajili. Wa kwanza kushoto waliosimama ni Jaji wa Mahakama Kuu ya Tanzania na Mkuu wa Chuo cha Uongozi wa Mahakama Lushoto (IJA) Mhe. Jaji Dkt. Paul Kihwelo na wa nne kutoka kushoto ni Mtendaji wa Mahakama ya Rufani Bwn. Solanus Nyimbi.