MICHE YA MITI 564 YAPANDWA ENEO LA MAHAKAMA KUU MUSOMA: JAJI MFAWIDHI AONGOZA ZOEZI HILO

Na Francisca Swai, Mahakama ya Hakimu Mkazi Musoma

Katika kutekeleza agizo la Makamu wa Rais wa Jamhuri ya Muungano wa Tanzania, Mhe. Samia Suluhu Hassan la kuhifadhi mazingira, Jaji Mfawidhi wa Mahakama Kuu, Kanda ya Musoma, Mhe. John Kahyoza, pamoja na Viongozi wa Serikali- mkoani Mara wameshiriki kupanda jumla ya miche 564 ya miti katika eneo la Mahakama Kuu Musoma.

Viongozi hao wamepanda miti ikiwa ni uzinduzi wa kampeni ya upandaji miti katika wilaya ya Musoma inayosimamaiwa na Ofisi ya Mkuu wa Wilaya ya Musoma, Ofisi ya Mkurugenzi pamoja na Ofisi ya Idara ya Misitu.

Akizungumza na viongozi mbalimbali walioshiriki katika zoezi hilo Aprili 12, 2019, Mhe. Jaji Kahyoza alisema kuna umuhimu mkubwa na faida nyingi katika utunzaji wa mazingira hasa kwa kupanda miti mfano kupata hewa safi, mvua za kutosha, kivuli, kutumika kama mipaka n.k. 

Mhe. Jaji Mfawidhi huyo aliwaasa washiriki kujali mazingira ya sehemu wanazofanyia kazi na kuahidi kuwa  miti hiyo iliyopandwa itatunzwa na kulindwa ipasavyo kwa kushirikiana na uongozi na wananchi wa eneo la Bweri ambako ndiko Mahakama ilipo.

Kwa upande wake Mkuu wa wilaya ya Musoma, Bw. Vicent Naano alimshukuru Mh. Jaji Kahyoza kwa kukubali kuhudhuria uzinduzi huo katika eneo lake la Mahakama na kuongeza kuwa miti ipo mingi na inagawiwa bure na hii ni awamu ya pili ya upandaji miti, ambapo awamu ya kwanza miche 500,000 ilipandwa. 

“Natoa wito kwa mamlaka zote pamoja na watendaji wote wa Kata, Wenyeviti wa mitaa kuhakikisha miti inapandwa angalau kwa kila kaya mbele ya nyumba zao, katika kampeni hii kauli mbiu ni “Misitu ni mali, ni uhai, panda miti kwa maendeleo yetu” alisema Mkuu huyo wa Wilaya.  

Naye Katibu Tawala wa Wilaya ya Musoma, Bw. Justine Manko alisema zoezi la upandaji miti ni agizo la Mhe. Makamu wa Rais, na wao kama Wilaya wanakusudia kupanda miti mingi katika manispaa ya Musoma na wilaya kwa ujumla kwani licha ya kuwa ni agizo pia ni faida kwa kwa vizazi vijavyo. 

Afisa Misitu, Bw. Anderson Mbaga alisema hadi sasa kuna miche 10,000,000 ambayo inatazamiwa kupandwa maeneo mbalimbali lakini hasa katika Taasisi, mabonde, barabara, n.k na kuwa hadi ifikapo 2025 maeneo yote katika mji wa Musoma yawe kijani. 

 Jaji Mfawidhi, Mahakama Kuu-Kanda ya Musoma, Mhe. John Kahyoza akimwagilia mti alioupanda katika uzinduzi wa kampeni ya upandaji miti uliofanyika katika eneo la Mahakama kuu Musoma.

 Mkuu wa wilaya ya Musoma,  Bw. Vicent Naano akipanda mti.