MAJAJI WAKUU WATANO WA NCHI ZA KUSINI MWA AFRIKA WAKUTANA DAR ES SALAAM

Na Lydia Churi na Magreth Kinabo-Mahakama

Mkutano wa Kamati ya Uongozi wa Kongamano la Majaji Wakuu wa nchi za Kusini mwa Afrika (Southern African Chief Justice’s Forum) umefanyika jijini Dar es salaam Tanzania chini ya Mwenyekiti wa kongamano hilo ambaye ni Jaji Mkuu wa Malawi Mhe. Andrew Nyirenda.

Mkutano huo pia umehudhuriwa na Majaji wakuu wanne kutoka nchi za Kusini mwa Afrika ambazo ni pamoja na Malawi, Zambia, Namibia, Seychelles na Tanzania ambayo ndiyo ilikuwa mwenyeji wa Mkutano huo.

Akizungumza kuhusu Kongamano la Majaji Wakuu wa nchi za kusini mwa Afrika, Mwenyekiti wa Kamati ya Uongozi wa Kongamano hilo, Jaji Mkuu wa Malawi Mhe. Andrew Nyirenda alisema malengo makuu ya kongamano hilo ni kujadili  maendeleo ya Mahakama za kusini mwa Afrika, kuimarisha na kulinda utawala wa sheria katika  nchi hizo pamoja na kuimarisha ushirikiano kati ya Mahakama za nchi zilizo wananchama wa kongamano hilo.

Alisema kupitia kongamano hilo, ajenda maalum huzungumzwa ikiwemo kuimarisha mawasiliano na majadiliano kati ya Mahakama za nchi zilizo kusini mwa Afrika ili Mahakama hizo ziwe na maendeleo ya pamoja. Alisema kupitia kongamano hilo wanahamasisha kuwepo kwa utawala wa sheria kwa kuwa Mahakama  ndicho chombo chenye jukumu la kusimamia utawala wa sheria.

Kwa mujibu wa Mhe. Jaji Nyirenda, Kongamano hilo pia huboresha ustawi wa watumishi wa Mahakama kazini wakiwemo Majaji, Mahakimu pamoja na  watumishi wengine wa Mahakama zilizo kwenye nchi za kusini mwa Afrika.

Kuhusu mafanikio yaliyofikiwa na Kongamano hilo, Mwenyekiti huyo alisema kumekuwa na maendeleo hasa kwa upande wa Sheria kwani baadhi ya sheria na kanuni zimeweza kufanyiwa mabadiliko katika baadhi ya nchi zilizo kwenye umoja huo. Aliongeza kuwa mafaniko mengine yaliyofikiwa kutokana na kuwepo kwa Kongamano hilo ni pamoja na kuwajengea uwezo watumishi wa Mahakama kwa kuwapatia mafunzo mbalimbali yakiwemo ya uongozi.

Kuhusu umuhimu wa Kongamano la Majaji Wakuu wa nchi za kusini mwa Afrika, Jaji Mkuu Mhe. Nyirenda alisema umuhimu wake umeonekana hasa baada ya  kuimarika kwa kazi za kila siku za Mahakama katika maeneo nchi hizo na pia wameweza kubadilishana uzoefu katika masuala ya sheria na pia kutatua changamoto mbalimbali zinazozikabili Mahakama zao kwa pamoja. 

Wajumbe wa Kamati ya Uongozi wa Kongamano la Majaji Wakuu wa Nchi za Kusini mwa Afrika (Southern African Chief Justice's Forum) wakiwa kwenye Mkutano wao uliofanyika mwishoni mwa wiki chini ya Mwenyekiti wake Jaji Mkuu wa Malawi Mhe. Andrew Nyirenda. Mkutano huo ulifanyika katika hotel ya Hyatt Kilimanjaro jijini Dar es salaam na kuhudhuriwa na Majaji Wakuu kutoka nchi tano za Kusini mwa Afrika ikiwemo Tanzania, Zambia, Namibia, Seychelles, na Malawi.

 Jaji Mkuu wa Tanzania Mhe. Prof. Ibrahim Hamis Juma (wa pili kushoto) akionesha kitu kwa Majaji Wakuu wenzake mara baada ya kumaliza Mkutano wao. Wa kwanza kushoto ni Jaji Mkuu wa Zambia Mhe. Irene Mambilima ambaye pia ni Makamu Mwenyekiti wa Kongamano hilo. Katikati ni Jaji Mkuu wa Malawi Mhe. Andrew Nyirenda akifuatiwa na Jaji Mkuu wa Namibia Mhe. Peter Shivute na wa kwanza kulia ni Jaji Mkuu wa Seychelles Mhe. Mathilda Twomey.

 Wajumbe wa Kamati ya Uongozi wa Kongamano la Majaji Wakuu wa Nchi za Kusini mwa Afrika (Southern African Chief Justice's Forum) wakiwa katika picha ya pamoja na wasaidizi wao mara baada ya kumaliza Mkutano wao. Nyuma wa Kwanza kushoto ni Mratibu wa Kongamano hilo Mhe. Jaji Evaristo Pengele.

   Wajumbe wa Kamati ya Uongozi wa Kongamano la Majaji Wakuu wa Nchi za Kusini mwa Afrika (Southern African Chief Justice's Forum) wakiwa katika picha ya pamoja na wasaidizi wao mara baada ya kumaliza Mkutano wao.

 Majaji Wakuu kutoka nchi tano za Kusini mwa Afrika (Southern African Chief Justice's Forum) wakiwa katika picha ya pamoja mara baada ya kumaliza Mkutano wao.Waliokaa katikati ni Mwenyekiti wa Kongamano hilo ambaye pia ni Jaji Mkuu wa Malawi Mhe. Andrew Nyirenda. Kulia kwake ni Jaji Mkuu wa Tanzania Mhe. Prof. Ibrahim Hamis Juma na kushoto ni Jaji Mkuu wa Zambia Mhe. Irene Mambilima. Waliosimama kutoka kulia ni Jaji Mkuu wa Namibia Mhe. Peter Shivute akifuatiwa na Jaji Mkuu wa Seychelles Mhe. Mathilda Twomey na wa kwanza kushoto ni Mratibu wa Kongamano hilo Jaji Mhe. Evaristo Pengele.