JAMII YATAKIWA KUPIGA VITA VITENDO VYA UKATILI DHIDI YA WANAWAKE NA WATOTO

Na Emmanuel Oguda, Mahakama Kuu-Shinyanga

Jamii Mkoani Shinyanga imetakiwa kupiga vita vitendo vya unyanyasaji wa kijinsia dhidi ya wanawake na watoto. 

Hayo yamebainishwa katika Mkutano maalum uliofanyika katika Kata ya ‘Old’ Shinyanga Manispaa ya Shinyanga Mei 26, 2019 wakati Chama cha Majaji Wanawake Nchini (TAWJA) kilipokutana na wananchi na kutoa elimu kuhusu haki za watoto na unyanyasaji wa kijinsia kwa wanawake na watoto.

Akizungumzia kuhusu vitendo vya ukatili wa kijinsia, Naibu Msajili wa Mahakama Kuu, Kanda ya Shinyanga, Mhe. Eugenia Rujwahuka, amesisitiza kuwa, watoto wana haki ya kupata elimu, pia wana haki ya kutonyanyasika na endapo wataona vitendo vyovyote vinavyoelekea kuvunja haki zao, wachukue hatua mapema ya kutoa taarifa Polisi ama kwa Serikali za Vijiji na Mitaa ili wahusika wachukuliwe hatu za kisheria. 

“Jamii inapaswa kutoa ushirikiano pindi wanapobainia vitendo vya uvunjwaji haki za watoto na waondokane na dhana iliyozoeleka Kanda ya ziwa ya ‘Kutulija’ yaani kumtenga mtu anayetoa ushahidi ama kuripoti juu ya matukio ya uvunjwaji wa haki za binadamu, wanawake na watoto,” alisema Mhe. Rujwahuka.

Naye Hakimu Mkazi Mfawidhi Mahakama ya Hakimu Mkazi Kinondoni, Mhe. Hanipha Mwingira amesisitiza juu ya haki ya kurithi kwa wanawake na watoto wanaoachwa baada ya wapendwa wao kufariki kuwa wana haki ya kusimamia mirathi na kurithi na waondokane na dhana iliyojengeka kuwa mtoto wa kike hana haki ya kurithi.

Katika Mkutano huo wananchi wametoa maoni yao kuhusu haki za wanawake na watoto pamoja na vitendo vya ukatili wa kijinsia dhidi ya wanawake na watoto Mkoani humo na kusisitiza Serikali iendelee kuwachukulia hatua kali za kisheria wale wote wanaobainika kujihusisha na vitendo vya ukatili.

Aidha wananchi hao wameomba elimu iendelee kutolewa maeneo ya vijijini zaidi ambako vitendo hivyo vimeshamiri kwa kiasi kikubwa.

Mada zilizofundishwa ni pamoja na Mirathi, Haki za Watoto na Ukatili wa kijinsia kwa wanawake na watoto.

 Naibu Msajili Mahakama Kuu Kanda ya Shinyanga, Mhe. Sekela Mwaiseje akitoa mada kwenye mkutano na wananchi kuhusu ukatili na unyanyasaji wa kijinsia, Kata ya Old Shinyanga, Manispaa ya Shinyanga.

 Baadhi ya watoto wa Kata ya Old Shinyanga waliofika kwa ajili ya kupata elimu juu ya haki zao.

Mhe, Janeth Elias Massesa, Hakimu Mkazi Mfawidhi Mahakama ya Wilaya Shinyanga akiongea na watoto wa Kata ya Old Shinyanga juu ya haki zao. 

Mhe. Hanifa Mwingira, Hakimu Mkazi Mahakama ya Hakimu Mkazi Kinondoni akisisitiza jambo wakati wa utoaji elimu juu ya haki ya kurithi kwa wanawake na watoto.