MTENDAJI WA MAHAKAMA KUU MUSOMA ASTAAFU: AWAASA WATUMISHI KUWA NA UMOJA

Na Francisca Swai, Mahakama Kuu Musoma.

Mtendaji wa Mahakama Kuu ya Tanzania kanda ya Musoma, Bibi Zilliper Achieng’ Geke amestaafu rasmi kazi leo baada ya kutimiza umri wa kustaafu kwa hiari kwa mujibu wa sheria za utumishi wa Umma.

Akizungumza na baadhi ya watumishi wa Mahakama Kuu kanda ya Musoma Musoma kabla ya kustaafu, Mtendaji huyo aliwaasa watumishi kuhakikisha wanakuwa na umoja na mshikamano katika kutekeleza majukumu yao ya kila siku.

“Hakuna jambo linaloshindikana katika umoja, kila mtu akitambua nafasi yake lakini pia akijua kuwa peke yake hawezi bila ya mwenzake hakuna litakaloshindikana”, alisisitiza Mtendaji huyo.

Aidha, bibi Geke pia aliwataka watumishi hao kupendana, kuheshimiana na kushirikiana katika kazi zao hatua itakayowawezesha kutekeleza Mpango Mkakati wa Miaka Mitano (2015/16 hadi 2019/2020) wa Mahakama ya Tanzania vizuri na kufikia lengo kuu la kutoa haki sawa kwa wote na kwa wakati.

Aliwashauri maafisa Tawala na Utumishi wa kanda hiyo kuhakikisha wanaendelea na ukarabati mdogo mdogo wa majengo ya Mahakama hasa zile za Mwanzo licha ya ufinyu wa bajeti. Alisema kwa kufanya hivyo itasaidia kuboresha miundo mbinu hiyo na kuongeza ari ya kazi kwa watumishi lakini pia usalama wao.

Mtendaji huyo ambaye amefanya kazi katika Mahakama Mkoa wa Mara tangu mwezi Octoba 2013 atakumbukwa kwa mengi ikiwemo kuhamasisha ushirikiano baina ya watumishi, usimamizi mzuri wa ofisi, ukarabati wa Mahakama za Mwanzo na wilaya, ujenzi wa vyoo, pamoja na ushirikiano mzuri na wadau.

Mtendaji wa Mahakama Kuu ya Tanzania kanda ya Musoma Bibi Zilliper Achieng’ Geke akifafanua jambo ofisini kwake wakati akiwaaga watumishi wa Mahakama hiyo. Bibi Geke amestaafu rasmi Utumishi wa Umma kwa mujibu wa Sheria.