MAHAKAMA KUU DIVISHENI YA MAKOSA YA RUSHWA NA UHUJUMU UCHUMI YAKUTANA NA WADAU

Na Mary Gwera & Denis Buyekwa,  Mahakama

Jaji Kiongozi wa Mahakama Kuu ya Tanzania, Mhe. Dkt. Eliezer Mbuki Feleshi, amesema Mahakama ya Tanzania inatambua umuhimu wa wadau wake katika kufanikisha huduma ya utoaji Haki nchini.

Mhe. Jaji Kiongozi aliyasema hayo Juni 10 alipokuwa akifungua rasmi warsha ya siku tatu (3) ya Wadau kuhusu uhamasishaji wa sheria, kanuni, taratibu na utendaji wa Mahakama Kuu Divisheni ya Makosa ya Rushwa na Uhujumu Uchumi, inayofanyika katika ukumbi wa mafunzo wa Mahakama  uliopo katika viwanja vya Mahakama ya Hakimu Mkazi  Kisutu-Dar es Salaam.

“Kwa kuzingatia umuhimu wa Wadau Mahakama ya Tanzania kupitia Mpango Mkakati wake wa miaka mitano (5) 2015/2016-2019/2020 chini ya nguzo namba tatu ambayo inasema Kurejesha imani ya jamii na ushirikishwaji wa wadau  inalenga katika kuweka mfumo wa utoaji haki sawa kwa wote wenye kuaminiwa na jamii,” alisema Mhe. Jaji Kiongozi. 

Akizungumzia mafunzo hayo Mhe. Jaji Kiongozi amewataka wadau hao kutoa mawazo yatakayosaidia Mahakama Kuu Kitengo cha Makosa ya Rushwa na Uhujumu Uchumi kujua namna bora zaidi ya kuendesha mashauri yanayohusiana na vitendo vya makosa ya rushwa na uhujumu uchumi ili iweze kuwasaidia kutoa haki kwa wakati.

Aidha; Mhe Jaji Dkt. Feleshi aliongeza kwa kuwataka wadau hao kuibua changamoto mbalimbali zinazopelekea ucheleweshaji wa kesi Mahakamani na kuja na mbinu ya namna ya kukabiliana na changamoto hizo zitakazosaidia uendeshaji na umalizwaji wa mashauri kwa wakati.

Katika hatua nyingine; naye Mkuu wa Chuo Cha Uongozi wa Mahakama (IJA)-Lushoto, Mhe. Jaji Dkt. Paul Kihwelo amesema lengo la mafunzo hayo ni kuwapa uelewa wadau kuhusiana na suala zima la utendaji wa Mahakama ikiwa ni pamoja na kujadili changamoto zinazowakabili ili waweze kuzitafutia ufumbuzi hasa zile zinazohusiana na masuala ya upelelezi. 

“Mafunzo haya  ni mwendelezo wa mafunzo mengine yaliyokwishafanyika huko nyuma yakiwa na lengo la kutafuta namna bora ya uendeshaji wa Mashauri yanayohusu  makosa ya Rushwa  na uhujumu uchumi, taratibu za kutoa hukumu na jinsi ya kusimamia utekelezaji wa maadili kwa maafisa wa Mahakama” Alisema Mhe. Jaji Dkt. Kihwelo.

Mkuu huyo wa Chuo cha (IJA) aliongeza kuwa mafunzo hayo yatasaidia kuleta uelewa wa pamoja kati ya Mahakama na wadau wake hatua itakayopelekea kuongeza tija ya utendaji kazi baina ya pande zote mbili.

Mafunzo hayo yameandaliwa na Mahakama ya Tanzania kwa kushirikiana Chuo cha Uongozi wa Mahakama (IJA) chini ya udhamini wa Programu ya kitaifa ya kuzijengea uwezo Taasisi za Umma zinazohusika  kuzuia na kupambana na Rushwa  (BSAAT).

Washiriki wa Mafunzo hayo ni Waheshimiwa Majaji kutoka Mahakama Kuu, Divisheni ya Makosa ya Rushwa na Uhujumu Uchumi, Wadau kutoka Ofisi ya Mwanasheria Mkuu wa Serikali, Ofisi ya Mwendesha Mashtaka wa Serikali (DPP), TAKUKURU, TCRA, Ofisi ya Wakili wa Serikali, na Wizara ya Katiba na Sheria.

 Jaji Kiongozi, Mahakama Kuu ya Tanzania, Mhe. Dkt. Eliezer Mbuki Feleshi akifungua rasmi Warsha ya siku tatu (3) ya Wadau kuhusu uhamasishaji wa Sheria, Kanuni, taratibu na utendaji wa Mahakama Kuu, Divisheni ya Makosa ya Rushwa na Uhujumu Uchumi yanayofanyika katika Ukumbi wa Mafunzo wa Mahakama uliopo katika Viwanja vya Mahakama ya Hakimu Mkazi Kisutu jijini Dar es Salaam.

Jaji Mfawidhi, Mahakama Kuu-Divisheni ya Makosa ya Rushwa na Uhujumu Uchumi, Mhe. Dkt. Lilian Mashaka (aliyesimama kulia) akitoa neno la utangulizi kabla ya kumkaribisha Mhe. Jaji Kiongozi kufungua rasmi warsha hiyo. Walioketi kushoto ni Jaji Kiongozi, Mahakama Kuu ya Tanzania, Mhe. Dkt. Eliezer Mbuki Feleshi na katikati ni Mkuu wa Chuo cha Uongozi wa Mahakama (IJA) Lushoto, Mhe. Jaji Dkt. Paul Kihwelo.

Sehemu ya Washiriki wa Warsha wakimsikiliza Mhe. Jaji Kiongozi alipokuwa akitoa nasaha za ufunguzi wa warsha.

Washiriki wakimsikiliza mgeni rasmi.

Mhe. Jaji Kiongozi akitoa mada kwa washiriki.

 Mmoja wa wadau wa  kutoka Wizara ya Katiba na Sheria (aliyesimama) akichangia jambo.

Mhe. Jaji Kiongozi (katikati) akiwa katika picha ya pamoja na Washiriki wa Mafunzo, kushoto ni Jaji Mfawidhi- Mahakama Kuu Divisheni ya Makosa ya Rushwa na Uhujumu Uchumi, Mhe. Dkt. Lilian Mashaka na kulia ni Mkuu wa Chuo cha Uongozi wa Mahakama (IJA) Lushoto, Mhe. Jaji Dkt. Paul Kihwelo.

Washiriki wa Warsha hiyo wametoka Mahakama ya Tanzania, Ofisi ya Mwanasheria Mkuu wa Serikali, Ofisi ya Mwendesha Mashtaka wa Serikali (DPP), TAKUKURU, TCRA, Ofisi ya Wakili wa Serikali, na Wizara ya Katiba na Sheria.