MAHAKIMU WAKAZI WAPATIWA MAFUNZO KUHUSU HAKI MILIKI

Mahakama ya Tanzania kwa kushirikiana na Shirika la Haki Miliki Duniani (WIPO), imeendesha mafunzo yenye lengo la kuwajengea uwezo Mahakimu kuwa na uelewa wa sheria za haki miliki ili kutatua migogoro mbalimbali.

Akizungumza wakati wa ufunguzi wa mafunzo hayo mapema Juni 27, 2019, Jaji wa Mahakama ya Rufani Tanzania, Mhe. Barke Sahel amesema kuwa mafunzo hayo ni ya kipekee kwani yanafanyika mara ya kwanza nchini hivyo yatasaidia Mahakimu hao kuendesha mashauri yanayohusiana na Hakimiliki kwa weledi hatua itakayosaidia kutoa haki kwa wakati.

Aidha Mhe Jaji huyo ameongeza kuwa mafunzo hayo pia yatawasadia Mahakimu hao kupata uelewa wa ujumla katika mambo yote yanayohusiana na Hakimili hasa katika kipindi hiki ambacho Tanzania inapiga hatua kubwa katika sekta ya viwanda.

“Sasa hivi tunapoelekea kwenye nchi ya viwanda watu wengi wanakuwa wameendeleza mawazo yao (Patent Rights) kwa maana hiyo changamoto au migogoro lazima itajitokeza, hivyo ni vyema waheshimiwa Mahakimu kupatiwa uelewa wa kutosha utakaowasaidia kushughulikia migogoro hiyo kwa haki na kwa wakati”. Alisema Mhe Jaji Saleh.

Akizungumzia uamuzi wa Mahakama ya Tanzania kuendesha mafunzo hayo, Jaji Mstaafu wa Mahakama Kuu Mhe. Robert Makaramba amesema kuwa mafunzo haya ni muhimu kwa kuzingatia ukweli kuwa eneo hili la Haki miliki ni eneo ambalo halieleweki kwa watu wengi sana ikiwa ni pamoja na Mahakimu.

“Sasa hivi mashauri ya Hakimiliki yanaanza kuongezeka hasa baada ya Tanzania kuanza kutekeleza sera yake ya kuwa nchi ya viwanda na uchumi wa kati ifikapo mwaka 2025, hatua hii itapelekea kuwepo kwa mashauri ya kugombea Hakimiliki za uandishi, za viwanda na zile za alama za kufanyia biashara, hivyo kupitia mafunzo haya Mahakimu wataweza kutatua migogoro hiyo kwa urahisi. Alieleza Jaji huyo.

Katika hatua nyingine Mwakilishi wa Shirika la Haki Miliki Duniani (WIPO), Mheshimiwa Alexandra Bhattacharya, amesema kuwa baada ya mafunzo haya Mahakama itakuwa kiungo muhimu katika kuhakikisha  Haki Miliki za wananchi zinalindwa kwani itawezesha  kutatua migogoro yote kwa usawa na haki pasipo na upendeleo.

Naye Mratibu wa mafunzo,  Hakimu Mkazi ambaye pia ni Msaidizi wa Msajili Mkuu wa Mahakama ya Tanzania Mhe. Upendo Ngitiri amesema uwepo wa Haki Miliki ni muhimu kwani utaongeza chachu katika ukuaji wa tekinolojia hata katika ukuaji wa sekta ya viwanda nchini hatua itakayosaidia ukuaji wa uchumi kwa ujumla katika Nyanja mbalimbali.

Katika Mafunzo hayo Washiriki watapata pia fursa ya kubadilishana uzoefu na kujifunza zaidi juu ya mfumo wa haki miliki Kimataifa, mfumo wa kimataifa wa ulinzi wa hakimiliki na jukumu la Mahakama katika kulinda na kuimarisha haki miliki na uzoefu juu ya utatuzi wa haki hizo.

Mafunzo hayo ya siku mbili yanafanyika katika Kituo cha mafunzo kilichopo katika viwanja vya Mahakama ya Hakimu Mkazi kisutu na yamewahusisha Mahakimu kutoka katika vituo vya mikoa ya Dar es Salaam, Pwani pamoja na Morogoro.

 Jaji wa Mahakama ya Rufani ya Tanzania ambaye pia alikuwa Mgeni rasmi, Mhe. Barkel Sahel akifungua rasmi Mafunzo ya siku mbili ya Haki Miliki yanayofanyika katika Kituo cha Mafunzo cha Mahakama kilichopo eneo la Mahakama ya Hakimu Mkazi Kisutu jijini  Jijini Dar es Salaam.

Sehemu ya Waheshimiwa Mahakimu wakifuatilia hotuba ya ufunguzi wa mafunzo hayo.

Msajili Mkuu-Mahakama ya Tanzania, Mhe.  Katarina Revocati akitoa neno kabla ya kumkaribisha rasmi Mgeni rasmi kufungua Mafunzo hayo.

Mwakilishi wa Shirika la Haki Miliki Duniani (WIPO), Mheshimiwa Alexandra Bhattacharya akitoa mada ya haki miliki kwa washiriki wa Mafunzo.

Jaji wa Mahakama ya Rufani (T) ambaye alikuwa mgeni rasmi, Mhe Barke Sahel (aliyeketi katikati) akiwa katika picha wa pamoja na Washiriki wa Mafunzo ya siku mbili (2) ya Haki Miliki (waliosimama), aliyeketi wa pili kulia ni Jaji Msataafu wa Mahakama Kuu, Mhe. Robert Makaramba, wa pili kushoto ni Msajili Mkuu wa Mahakama ya Tanzania, Mhe. Katarina Revocati, wa kwanza kulia ni Naibu Msajili kutoka BRELA, Bi. Loy Mhando na wa kwanza kushoto ni Mwakilishi wa Shirika la Haki Miliki Duniani (WIPO), Bi. Alexandra Bhattacharya.