WASAIDIZI WA SHERIA WA MAJAJI WAAPISHWA KUWA MAHAKIMU

Na Waandishi, Mahakama

Jaji Mkuu wa Tanzania, Mhe. Prof. Ibrahim Hamis Juma leo amewaapisha Wasaidizi wa Sheria wa Majaji kuwa Mahakimu Wakazi na kuwataka kutoa maamuzi yatakayoielimisha jamii.

Akizungumza baada ya kuwaapisha Mahakimu Wakazi 53 Juni 18 mwaka huu  Jaji Mkuu pia amewataka Mahakimu hao kuandika hukumu zinazoeleweka, zinazosomeka, zenye lugha nyepesi, pamoja na kutoa hukumu hizo kwa wakati.

“Uamuzi wowote mtakaoutoa kuanzia siku ya kwanza Mahakamani utagusa Uhai, Mali na Hali ya wanadamu wengine, hivyo kosa lolote la kimaamuzi mtakalotoa litakuwa na gharama pamoja na gharama ya muda kwa nchi, kwa watu, na kwa familia kwa ujumla”, alisema.

Aidha, Jaji Mkuu amewataka Mahakimu wapya kufanya kazi kwa kuzingatia maadili, umakini na unyenyekevu kwa kuwa kazi hiyo inahitaji uangalizi wa hali ya juu. Aliwataka Mahakimu hao pia kuwasaidia watanzania kuhusu masuala ya kisheria hususan wanawake na watoto.

Akizungumzia vitendo vya rushwa Mahakamani, Prof. Juma alisema bado Mahakama haizungumziwi vizuri katika suala hilo hivyo aliwataka Mahakimu hao kutoogopa kulizungumzia tatizo hilo, na kupanga mikakati ya kukabiliana nayo.

 “Rushwa ni kitu kinachojificha, pangeni mikakati ya kupambana nayo. Someni ripoti ya Jaji Warioba ya mwaka 1996 ili muelewe ni wapi rushwa imejificha”, alisema.

Aidha, Jaji Mkuu alivitaja viashiria vya rushwa ndani ya Mahakama kuwa ni katika maeneo ya kufungua mashauri, kupanga tarehe za mashauri, utafutahji wa majalada, na utoaji wa nakala za hukumu. Aliwataka Mahakimu hao kuhakikisha wanatoa nakala za hukumu kwa wakati ili wasihusishwe na dhana ya rushwa.

Alisema Mahakimu ni nyara ya Mahakama hivyo hawana budi kujenga taswira nzuri ya Mahakama kwani kwa kutofanya hivyo nchi nzima itachafuka. Aliongeza kuwa ni muhimu kwa Mahakimu kuheshimiana na kuheshimu kada nyingine kwa kuwa hakuna kada muhimu zaidi ya nyingine.

“Sauti yako ni sauti ya umma lazima itoke kwa juu, usimfokee mtu Mahakamani,” alisisitiza.

Nao Mahakimu walioapishwa kwa ujumla wao wameonyesha kufurahishwa na hatua hiyo na kuahidi kufanya kazi kwa uadilifu na kuahidi kutoa huduma bora kwa wananchi.

Kabla ya kuapishwa rasmi, Mahakimu hawa walikuwa wakihudumu katika ngazi ya Mahakama ya Rufani na Mahakama Kuu kama Wasaidizi wa Sheria wa Majaji kwa takribani miaka tisa (9).

Mahakimu hawa ambao tayari wameshapangwa katika vituo mbalimbali wataongeza nguvu kazi ya kupunguza mlundikano wa mashauri.

 Jaji Mkuu wa Tanzania, Mhe. Prof. Ibrahim Hamis Juma (aliyesimama) akiwaapisha rasmi waliokuwa Wasaidizi wa Sheria wa Wahe. Majaji kuwa Mahakimu Wakazi mara ya kubadilishwa Kada. Hafla ya uapisho imefanyika mapema Juni 18, 2019 katika Ukumbi namba moja (1) wa Mahakama Kuu- Dar es Salaam. Kushoto ni Jaji Kiongozi-Mahakama Kuu ya Tanzania, Mhe. Dkt. Eliezer Mbuki Feleshi na kulia ni Jaji Mfawidhi, Mahakama Kuu-Kanda ya Dar es Salaam, Mhe. Beatrice Mutungi.

  Pichani ni Wahe. Mahakimu wakila kiapo mbele ya Mhe. Jaji Mkuu (hayupo pichani).

 Utiaji saini ukiendelea mara baada ya kiapo.

Mhe. Jaji Mkuu (katikati) akimzungumza na Wahe. Mahakimu wapya mara baada ya kuwaapisha rasmi.

Wahe. Mahakimu walioapishwa wakimsikiliza Mhe. Jaji Mkuu alipokuwa akizungumza nao mara baada ya kuwaapisha rasmi.

Baadhi ya Watendaji, Wasajili, Watumishi pamoja wageni waliohudhuria katika hafla hiyo iliyofanyika mapema Juni 18, 2019.

 Jaji Mkuu wa Tanzania, Mhe. Prof. Ibrahim Hamis Juma (aliyeketi katikati) akiwa katika picha ya pamoja na Wahe. Mahakimu wapya walioapishwa, kushoto waliokaa ni Jaji Kiongozi wa Mahakama Kuu ya Tanzania, Mhe. Dkt. Eliezer Mbuki Feleshi, na kulia ni Jaji Mfawidhi wa Mahakama Kuu ya Tanzania Kanda ya Dar es Salaam na wa kwanza kushoto ni mmoja wa Mahakimu wapya walioapishwa, Mhe. Amos Rweikiza.