WAZIRI MAHIGA APOKEA RIPOTI ZA MAREKEBISHO YA SHERIA

Na Sheiba Bullu-Wizara ya Katiba na Sheria

Waziri wa Katiba na Sheria Mhe. Balozi Dkt. Augustine Mahiga amepokea ripoti zenye mapendekezo ya kurekebisha sheria tatu kutoka Tume ya Kurekebisha Sheria Tanzania.

Ripoti zilizopokelewa ni pamoja na ile ya Kurekebisha Sheria ya Ufilisi, Sheria ya Ushahidi na Sheria ya eneo la Mamlaka ya Hifadhi ya Ngorongoro. Mwenyekiti wa Tume ya Kurekebisha Sheria Tanzania Jaji Mstaafu Mhe. Januari Msoffe aliwasilisha ripoti hizo jana katika ofisi za wizara zilizopo kwenye mji wa Serikali, Mtumba jijini Dodoma.

Aidha, ripoti hizo zimeainisha maeneo ambayo yanahitaji kufanyiwa marekebisho kuwa ni pamoja na eneo la ulipishwaji wa faini ndogo, Lugha ngumu isiyoeleweka kwa urahisi, matumizi yasiyo sahihi ya ardhi ikiwemo usajili wa vijiji kwenye eneo la hifadhi.

Akizungumza baada ya kupokea ripoti hizo, Waziri Mahiga alisema katika eneo la utoaji ushahidi mahakamani ni vizuri kwa sasa Tanzania ikaanza kupokea ushahidi kwa njia ya video ili kurahisisha utoaji wa ushahidi kutoka sehemu mbalimbali pasipo shahidi kuwepo Mahakamani.

“Suala hili linaweza kufanikiwa kwa kushirikiana na balozi mbalimbali ambazo zinaonekana kuunga mkono utawala wa sheria uliopo nchini kwa kuchangia vifaa na kutoa mafunzo kwa watendaji”, alisema Waziri Mahiga.

Aidha, balozi Mahiga aliipongeza Tume ya Kurekeisha sheria kwa kazi kubwa na nzuri wanayofanya ya utafiti wa Sheria kabla ya kutoa mapendekezo ambayo yanawezesha sheria mbalimbali kurekebishwa na kuendana na wakati.

Waziri Mahiga pia alisifu utawala wa sheria uliopo nchini ambao Tume ya Kurekebisha Sheria imesaidia uwepo wa Utawala huo.

“Utawala wa Sheria ili uwe rahisi ni vizuri kuwa na Tume ambayo inapitia na kufanyia tafiti Sheria mbalimbali”, alisema Balozi Mahiga.

Naye Mwenyekiti wa Tume ya Kurebisha Sheria alisema kazi ya utafiti wa sheria nchini ni miongoni mwa majukumu ya Tume yake na kazi hiyo hufanyika ili kuzifanya sheria ziendane na wakati.

Alisema taasisi mbalimbali za Serikali zinazosimamia sheria husika huiomba Tume ya kurekebisha Sheria kuzipitia na baada ya kuzifanyia utafiti na kubaini mapungufu, hutoa mapendekezo ambayo huwasilishwa serikalini na baadaye bungeni kwa ajili ya kuzirekebisha.

 Waziri wa Katiba na Sheria Mhe. Balozi Dkt. Augustine Mahiga akipokea ripoti kutoka kwa Mwenyekiti wa Tume ya Kurekebisha Sheria Jaji Mstaafu Mhe. Januari Msoffe kuhusu Marekebisho ya Sheria jana jijini Dodoma.  

Mwenyekiti wa Tume ya Kurekebisha Sheria Jaji Mstaafu Mhe. Januari Msoffe akimwelezea jambo Waziri wa Katiba na Sheria Mhe. Balozi Dkt. Augustine Mahiga wakati wa makabidhiano ya ripoti tatu kuhusu Marekebisho ya Sheria jana jijini Dodoma.  

 Waziri wa Katiba na Sheria Mhe. Balozi Dkt. Augustine Mahiga akizungumza wakati wa makabidhiano ya ripoti tatu kuhusu Marekebisho ya Sheria jana jijini Dodoma.