MAKUBALIANO YA UKOO KUSAJILIWA ILI KUPUNGUZA MIGOGORO YA MIRATHI

Na Lydia Churi- Mahakama Njombe

Jaji Mkuu wa Tanzania Mhe. Prof. Ibrahim Hamis Juma ameagiza kuanzishwa kwa utaratibu wa kusajili makubaliano ya ukoo ili kupunguza migogoro inayoweza kutokea katika mashauri ya Mirathi.

Akizungumzia dhana ya usuluhishi wa migogoro, Jaji Mkuu alisema kuwa Katiba ya Jamhuri ya Muungano wa Tanzania inahimiza migogoro kutatuliwa nje ya Mahakama hivyo ameshauri mashauri ya Mirathi nchini yapatiwe suluhu nje ya Mahakama. 

Akizungumza wakati wa ziara yake ya kikazi mkoni Njombe, Mhe. Prof. Juma alisema kuwepo kwa utaratibu wa kusajili makubaliano ya ukoo kutasaidia kumaliza migogoro ya mirathi ambayo imekuwa ikichukua muda mrefu Mahakamani wakati wasimamizi wa mirathi wakiendelea kufaidika na mali za marehemu. 

Alisema utaratibu mwingine ulioanzishwa na Mahakama jijini Dar es salaam ni ule wa kufanya malipo ya mirathi kupitia benki na hivyo ameshauri mahakama nyingine kuiga utaratibu huo.

“Ni vizuri malipo hayo yakapitia benki na si kugawana ofisini kwa hakimu kwani siku zote hicho huwa ni chanzo cha migogoro” alisema Jaji Mkuu.

Alisema changamoto hii pamoja na nyingine zinazoikabili Mahakama ya Tanzania wameziona kwenye vikao vya Mahakama ya Rufani vinavyoendelea katika Mahakama Kuu ya Tanzania kanda ya Iringa.

Alisema mikoa ya Njombe na Iringa ina jumla ya mashauri ya mirathi 577 yaliyodumu Mahakamani kwa zaidi ya miaka miwili tangu kusajiliwa ambapo kati ya hayo, mashauri 183 ni ya mkoa wa Njombe na mashauri 394 ni ya mkoa wa Iringa.

“Mashauri ya mirathi kukaa Mahakamani kwa kipindi cha zaidi ya miaka miwili ni muda mrefu sana kwa kuwa ukizungumzia mirathi maana yake ni mali inayoshikiliwa hadi mgogoro utakapoisha”, alifafanua.

Jaji Mkuu anaendelea na ziara ya kikazi katika mkoa wa Iringa baada ya kukamilisha ziara katika mkoa wa Njombe ambapo alitembelea mahakama zilizopo katika wilaya za Makete, Ludewa na Njombe mjini.

 Jaji Mkuu wa Tanzania Mhe. Prof. Ibrahim Hamis Juma akisikiliza hoja za Watumishi wa Mahakama ya Hakimu Mkazi mkoa wa Njombe (hawapo pichani) alipofika kukagua shughuli za Mahakama akiwa kwenye ziara ya kikazi katika mikoa ya Njombe na Iringa. Kushoto ni Jaji Mfawidhi wa Mahakama Kuu ya Tanzania kanda ya Iringa Mhe. Panteine Kente na kulia ni Mkurugenzi wa Ukaguzi wa Huduma za Kimahakama wa Mahakama ya Tanzania Mhe. Happiness Ndesamburo.

 Mkurugenzi wa Ukaguzi wa Huduma za Kimahakama wa Mahakama ya Tanzania Mhe. Happiness Ndesamburo akifafanua jambo kwa Watumishi wa Mahakama ya Hakimu Mkazi Njombe walipokuwa wakizungumza na Jaji Mkuu.

 Watumishi wa Mahakama ya Hakimu Mkazi Njombe walipokuwa wakizungumza na Jaji Mkuu.

 Afisa Utumishi wa Mahakama ya Tanzania Bibi. Rose Tengu akitoa ufafanuzi juu ya masuala mbalimbali yanayohusu Utumishi kwa Watumishi wa Mahakama ya Hakimu Mkazi Njombe walipokuwa wakizungumza na Jaji Mkuu.