TANZANIA YA KWANZA KUTOA HUDUMA, MAHAKAMA INAYOTEMBEA

Na Mary Gwera, Mahakama

Tanzania imetajwa kuwa nchi ya kwanza Barani Afrika kuanzisha huduma ya Mahakama inayotembea ‘Mobile Court’ lengo likiwa ni kusogeza huduma za Mahakama karibu zaidi na wananchi.

Mtaalam Mwelekezi kutoka Benki ya Dunia, Bw. Waleed Malik alibainisha hayo Septemba 02, 2019 katika Kituo cha Mafunzo na Habari kilichopo eneo la Mahakama ya Hakimu Mkazi Kisutu-Dar es Salaam wakati akitoa Mada katika Mafunzo kwa vitendo kwa baadhi ya Watumishi wa Mahakama wa jijini Dar es Salaam wanaohudumu katika Mahakama hiyo.

“Kwa kuwa Tanzania ni nchi ya kwanza katika Bara la Afrika kuanzisha huduma hii ni vyema mkatoa huduma bora zenye viwango ili nchi nyingine zivutiwe na kuja kujifunza kutoka kwenu,” alieleza Bw. Malik.

Aidha; Mwezeshaji huyo wa Mafunzo hayo kutoka Benki ya Dunia, aliwasisitiza Watumishi hao kufanya kazi kwa ushirikiano ‘team work’ kwa kuwa ndio nguzo kuu ya mafanikio.

“Nawaomba kufanya kazi kwa pamoja ili kuleta matokeo chanya ya huduma hii,” alisema Bw. Malik.

Aidha; Mtaalam huyo pia alisisitiza juu ya utoaji elimu kwa umma kuhusu Mahakama hiyo ili jamii iwe na uelewa wa jinsi inavyofanya kazi na huduma inazotoa.

Akifungua rasmi Mafunzo hayo, naye Msajili Mkuu, Mahakama ya Tanzania, Mhe. Katarina Revocati amewaasa Watumishi wanaofanya kazi katika Mahakama hiyo kutojihusisha na vitendo vya rushwa pindi wanapotekeleza majukumu yao.

 “Mahakama imewaamini ninyi, na mpo katika historia ya kuwa sehemu ya Watumishi wa kwanza kutoa huduma katika aina hii ya Mahakama, hivyo ni rai yangu kwenu kutojihusisha na vitendo hivyo kwakuwa vitaidhoofisha Mahakama kwa ujumla,” alisisitiza Mhe. Revocati.

Mbali na vitendo vya rushwa, Mhe. Msajili Mkuu vilevile alisisitiza juu ya kutoa huduma nzuri kwa wateja ‘customer care’ ili lengo kuu linalokusudiwa na Mahakama ya Tanzania la utoaji huduma bora kwa wananchi liweze kufikiwa.

Jumla ya Washiriki 50 ambao ni Mahakimu, Dereva, Washauri wa Mahakama, Makarani wa Mahakama, Maafisa Utumishi na Utawala, Maafisa Habari, Makatibu Muhtasi pamoja na baadhi ya Wajumbe wa Menejimenti ya Mahakama ya Tanzania wameshiriki katika mafunzo kwa vitendo kuhusiana na utoaji huduma ya Mahakama inayotembea ikiwa ni kuwawezesha kutoa huduma kwa ufanisi zaidi.

 Kwa sasa Mahakama zinazotembea zipo mbili na zinatoa huduma katika mikoa miwili ya Dar es Salaam na Mwanza, hata hivyo; Mahakama ya Tanzania ina mpango wa kutanua wigo wa utoaji huduma hii kwa kuanzisha vituo vingine katika mikoa iliyosalia kwa awamu tofauti kulingana na upatikanaji wa fedha.

Baadhi ya nchi nyingine zinazotoa huduma ya Mahakama inayotembea ni pamoja na Guatemala, Brazil na Pakistan.

Msajili Mkuu wa Mahakama Tanzania, Mhe. Katarina Revocati  akifungua rasmi mafunzo kwa vitendo kuhusu Mahakama Inayotembea  kwa baadhi ya watumishi wa Mahakama ya Tanzania, yaliyofanyika Septemba 02 katika Kituo cha Mafunzo  na Habari  kilichopo, Mahakama  ya Hakimu Mkazi Kisutu, jijini Dar es Salaam.

Mtaalam  kutoka Benki ya Dunia ambaye pia alikuwa Mwezeshaji wa Mafunzo kwa vitendo juu ya ufanyaji kazi katika Mahakama inayotembea 'mobile court' , Bw. Waleed Malik (wa kwanza kulia) akitoa maelezo kwa sehemu ya Wajumbe wa Menejimenti ya Mahakama ya Tanzania. (Wa pili kulia) ni Msajili Mkuu wa Mahakama ya Tanzania, Mhe Katarina Revocati, (wa  kwanza kushoto) ni Naibu Msajili Mwandamizi, Mahakama Kuu ya Tanzania, Mhe. Messeka Chaba, (wa pili kushoto) ni Mtendaji wa Mahakama Kuu ya Tanzania, Bw. Leonard Magacha, (wa tatu kushoto) ni Naibu Msajili  Mfawidhi, Mahakama Kuu Kanda ya Dar es Salaam, Mhe. Joachim Tiganga, (wa nne kushoto) ni Mkurugenzi wa Usimamizi wa Mashauri, Mahakama ya Tanzania, Mhe. Eva Nkya na (wa tano kushoto) ni Katibu wa Msajili Mkuu wa Mahakama ya Tanzania, Mhe. Upendo Ngitiri.

Mkurugenzi wa Teknolojia ya Habari na Mawasiliano (TEHAMA), Bw. Kalege Enock (aliyenyoosha kidole) akiwaonyesha baadhi ya viongozi wa Mahakama ya Tanzania na watumishi wanaofanya kazi katika Mahakama inayotembea moja ya vifaa kilichopo ndani ya gari la Mahakama hiyo, wakati wa mafunzo kwa vitendo yaliyofanyika leo katika Kituo cha Mafunzo na Habari kilichopo katika Mahakama Hakimu Mkazi Kisutu, jijini Dar es Salaam.

Hakimu Mfawidhi wa Mahakama ya Wilaya ya Ilala, Mhe. Martha Mpaze akiuliza jambo(aliyesimama) wakati wa mafunzo kwa vitendo kwa watumishi wa Mahakama ya Tanzania, jijini Dar es Salaam, yaliyofanyika leo katika Kituo cha Mafunzo na Habari kilichopo Mahakama ya Hakimu Mkazi Kisutu.

Mkurugenzi wa Menejimenti ya Mashauri-Mahakama ya Tanzania, Mhe. Eva Nkya akifafanua jambo kuhusu Mahakama inayotembea wakati wa mafunzo kwa vitendo kwa watumishi wa Mahakama ya Tanzania, jijini Dar es Salaam, yaliyofanyika leo katika Kituo cha Mafunzo na Habari kilichopo Mahakama ya Hakimu Mkazi Kisutu.

Baadhi ya Watumishi wa Mahakama ya Tanzania, wanaofanya kazi katika Mahakama Inayotembea jijini Dar es Salaam wakiwa kwenye mafunzo kwa vitendo yaliyofanyika leo kwenye Kituo cha Mafunzo  na Habari kilichopo Mahakama ya Hakimu Mkazi Kisutu.

Mkuu wa Kitengo cha Maboresho ya Mahakama ya Tanzania (JDU), Mhe. Zahra Maruma akizungumza jambo, wakati wa mafunzo kwa vitendo yaliyofanyika katika Kituo cha Mafunzo na Habari kilichopo katika Mahakama Hakimu Mkazi Kisutu jijini Dar es Salaam.

Msajili Mkuu wa Mahakama ya Tanzania, Mhe. Katarina Revokati (katikati)akiwa katika picha ya pamoja na baadhi ya watumishi wa Mahakama ya Tanzania wanaofanya kazi katika Mahakama Inayotembea (Temeke) mara baada ya kufungua mafunzo kwa vitendo kwa watumishi hao. (wa kwanza kushoto) ni Mkuu wa Kitengo cha Maboresho ya Mahakama ya Tanzania (JDU), Mhe. Zahra Maruma, (wa pili kushoto) ni Mkurugenzi wa Menejimenti ya Mashauri wa Mahakama ya Tanzania, Mhe. Eva Nkya na (Wa tatu kushoto) ni Mtaalam Mwezeshaji kutoka Benki ya Dunia, Bw. Waleed Malik. Wa tatu kulia ni Mtendaji wa Mahakama Kuu ya Tanzania, Bw. Leonard Magacha, wa pili kulia ni Naibu Msajili Mwandamizi wa Mahakama Kuu ya Tanzania, Mhe. Messeka Chaba na wa kwanza kulia ni Hakimu Mkazi Mfawidhi wa Mahakama ya Hakimu Mkazi Kisutu, Mhe. Kevin Mhina. 

Msajili Mkuu wa Mahakama ya Tanzania, Mhe. Katarina Revokati (katikati)akiwa katika picha ya pamoja na baadhi ya watumishi wa Mahakama ya Tanzania wanaofanya kazi katika Mahakama Inayotembea(Ilala) mara baada ya kufungua mafunzo kwa vitendo kwa watumishi hao. (Kushoto wa kwanza) ni Mkuu wa Kitengo cha Maboresho ya Mahakama ya Tanzania (JDU), Mhe. Zahra Maruma, (wa pili kushoto) ni Mkurugenzi wa Menejimenti ya Mashauri wa Mahakama ya Tanzania,Mhe. Eva Nkya na (Watatu kushoto) ni Mtaalam Mwezeshaji kutoka Benki ya Dunia, Bw. Waleed Malik. Kulia wa kwanza ni Hakimu Mfawidhi wa Mahakama ya Hakimu Mkazi Kisutu, Mhe. Kelvin Mhina, wa pili kushoto ni Naibu Msajili Mwandamizi wa Mahakama Kuu ya Tanzania, Mhe. Messeka Chaba na (wa tatu kulia) ni Mtendaji wa Mahakama Kuu ya Tanzania, Bw. Leonard Magacha.

Meza kuu katika picha ya pamoja na baadhi ya watumishi wa Mahakama ya Tanzania wanaofanya kazi katika Mahakama Inayotembea-Kinondoni.

Msajili Mkuu wa Mahakama ya Tanzania, Mhe. Katarina Revokati (katikati)akiwa katika picha ya pamoja na baadhi ya watumishi wa Mahakama ya Tanzania wanaofanya kazi katika Mahakama Inayotembea(Makao Makuu) mara baada ya kufungua mafunzo kwa vitendo kwa watumishi hao. (Kushoto wa kwanza) ni Mkuu wa Kitengo cha Maboresho ya Mahakama ya Tanzania (JDU), Mhe. Zahra Maruma, (wa pili kushoto) ni Mkurugenzi wa Menejimenti ya Mashauri wa Mahakama ya Tanzania, Mhe. Eva Nkya na (Wa tatu kushoto) ni Mtaalam Mwezeshaji kutoka Benki ya Dunia, Bw. Waleed Malik. Kulia wa kwanza ni Hakimu Mfawidhi wa Mahakama ya Hakimu Mkazi Kisutu, Mhe. Kelvin Mhina, wa pili kulia ni Naibu Msajili Mwandamizi wa Mahakama Kuu ya Tanzania, Mhe. Messeka Chaba na (wa tatu kulia) ni Mtendaji wa Mahakama Kuu ya Tanzania, Bw. Leonard Magacha.

(Picha na Magreth Kinabo, Mahakama)