MAHAKIMU KANDA YA KIGOMA WAPEWA MAFUNZO

 Na Festor Sanga- Mahakama Kigoma

Jumla ya Mahakimu 29 wa Mahakama Kuu Kanda ya Kigoma wamepatiwa mafunzo   kwa ajili ya kuwajengea uwezo wa kutekeleza majukumu mbalimbali.

Mafunzo hayo yametolewa kwa  Mahakimu wa ngazi zote katika kanda hiyo,Novemba Mosi, mwaka huu, ikiwa ni  muendelezo wa utekekezaji wa mpango wa mafunzo ya ndani kwa watumishi  wa Mahakama kwa mwaka wa fedha 2019/2020 yaliyoandaliwa na kanda  hiyo  kwa awamu tatu.

Akifungua mafunzo hayo, Jaji Mfawidhi wa Mahakama Kuu Kanda ya Kigoma Mhe. Jaji Ilvin Mugeta aliwataka Mahakimu kama viongozi kuyatambua vema majukumu yao na mwelekeo wa Mahakama.

Alisema juu ya umuhimu wa kuimarisha maadili na utendaji kazi kwa kuwa na mwelekeo unaofanana. “tumekutana ili tuwe na mtazamo na mwelekeo wa pamoja katika kutekeleza majukumu yetu ya Utoaji Haki kwa mujibu wa Sheria, Kanuni,Taratibu na Miongozo ya utoaji Haki”, alisisitiza.

Mada zilizofundishwa katika mafunzo hayo, ni  Mpango Mkakati wa Mahakama wa Miaka Mitano 2015/2016 hadi 2019/2020, kwa kuoanisha na majukumu ya kila siku ya Mahakimu, ujazaji sahihi wa rejesta za mashauri, makosa yanayojirudia katika Uendeshaji wa Mashauri ya Jinai na Maadili ya Maafisa wa Mahakama na ya Utumishi wa Umma. 

Mafunzo hayo yalitolewa na Mhe. Mugeta na Jaji wa Mahakama Kuu Kigoma, Mhe. Jaji Athman Kirati.

Pamoja na Mafunzo hayo, siku hiyo pia ilitumika kufanya Kikao cha  Wanachama wa Chama cha Majaji na Mahakimu (JMAT) Tawi la Kigoma, kilicholenga kujadili Mustakabali na Ustawi wa Chama sambamba na kufanya uchaguzi wa Viongozi wa Chama hicho.

Awali, akitoa maelezo mafupi ya mafunzo hayo, Mtendaji wa Mahakama Kuu Kanda ya Kigoma Bw. Moses Mashaka alisema ni mkakati wa kutatua changamoto zilizobainika wakati wa Kaguzi za Mahakama na Magereza, ambapo yatahusisha watumishi 66 na yataendeshwa kwa awamu tatu, awamu ya kwanza imehusisha Mahakimu wote na awamu zinazofuata zilihusisha watumishi wasio Mahakimu hususani wanaofanya kazi zaidi ya walizoajiriwa kuzifanya. 

Mafunzo hayo yalihitimiswa kwa wajumbe wote kuwa na maazimio ya pamoja na kuahidi kutekeleza majukumu yao kwa ufanisi na uadilifu katika kuifanya kanda ya Kigoma kuwa ya mfano bora wa usimamizi na uendeshaji wa majukumu ya Mahakama na kutekeleza Mpango Mkakati kwa ufanisi. 

Jaji Mfawidhi wa Mahakama Kuu Kanda ya Kigoma (aliyesimama) Mhe. Ilvin Mugeta akifungua Mafunzo ya Mahakimu Mapema Novemba 01, mwaka huu. Kulia ni Jaji Athuman Kirati, Jaji wa Mahakama Kuu Kigoma.

Mtendaji wa Mahakama Kuu Kanda ya Kigoma Bw. Moses Mashaka (aliyesimama) akitoa taarifa fupi kuhusu Mafunzo yaliyofanyika katika Ukumbi wa Mahakama Kuu Kigoma.

Jaji Mfawidhi wa Mahakama Kuu Kanda ya Kigoma Mhe IIlvin Mugeta akitoa ufafanuzi kuhusu Mpango Mkakati wa Mahakama kwa Mahakimu waliohudhuria mafunzo hayo.

Wajumbe wa kundi mojawapo lilioundwa wakijadiliana jambo katika mafunzo yaliyofanyika mnamo Novemba 01, mwaka huu.

Mwenyekiti wa Chama cha Majaji na Mahakimu Tawi la Kigoma aliyechaguliwa, Mhe. Imani Batenzi akisoma taarifa ya Chama mbele ya wajumbe.

Baadhi ya wajumbe wa Chama cha Majaji na Mahakimu Tawi la Kigoma wakiwa katika picha ya pamoja.

(Picha na Festor Sanga- Mahakama, Kigoma)