RAIS AWATAKA MAJAJI KUTOA HUKUMU KWA HAKI NA KWA WAKATI

Na Lydia Churi-Mahakama

Rais wa Jamhuri ya Muungano wa Tanzania Mhe. Dkt. John Pombe Magufuli amewataka Majaji aliowateua na kuwaapisha leo kufanya kazi kwa haki na kutoa hukumu kwa wakati.

Akizungumza mara baada ya kuwaapisha Majaji 12 wa Mahakama Kuu ya Tanzania pamoja na Viongozi wengine aliowateua, leo Ikulu jijini Dar es salaam, Rais Magufuli amewapongeza Majaji hao na kuwataka kutekeleza wajibu wao ili  wananchi wapate haki kwa wakati.

“Haki hutolewa na Mungu lakini ninyi mmepewa mamlaka makubwa hapa duniani ya kuhukumu hivyo katoeni hukumu kwa haki na msicheleweshe haki”, alisema Mhe. Rais.

Aidha Mhe.Magufuli amewataka Majaji wapya kutimiza wajibu wao kwa haki na kuwatumikia watanzania hasa wale wanyonge ambao haki zao zinapotea. 

Akimzungumzia aliyekuwa Msajili Mkuu wa Mahakama ya Tanzania Mhe. Katarina Revocati, Mhe. Rais alimpongeza kwa kazi nzuri aliyofanya akiwa Mahakama ya Tanzania na kumtaka akasaidie kuusimamia mkoa wa Njombe wenye fursa nyingi ili mkoa huo usonge mbele.  

Awali akizungumza, Jaji Mkuu wa Tanzania Mhe. Prof. Ibrahim Hamis Juma alimshukuru Mhe. Rais kwa kuongeza idadi ya Majaji wa Mahakama Kuu ya Tanzania hatua itakayosaidia mashauri kumalizika kwa wakati. 

Alisema hivi sasa idadi ya Majaji wa Mahakama Kuu ya Tanzania imefikia 78 kutoka Majaji 66 waliokuwepo kabla ya uteuzi wa jana. Alisema Majaji wawili wanatarajia kustaafu mwishoni mwa mwaka huu na idadi yao itabaki kuwa ni Majaji 76 ifikapo mwezi Desemba mwaka huu.

Alisema kulingana na idadi hiyo ya Majaji, kila Jaji hivi sasa ana mzigo wa kusikiliza mashauri zaidi ya 500 wakati uwezo wa Jaji mmoja ni kusikiliza mashauri 220 katika kipindi cha mwaka mmoja. 

Aliwataka Majaji walioapishwa leo kutekeleza wajibu wao kwa mujibu wa sheria kwa kuwa Mahakama ya Tanzania imejiwekea utaratibu wa kujisimamia  katika kazi ambapo kila Jaji anatakiwa kusikiliza na kumaliza mashauri 220 kwa mwaka, kutoa nakala za hukumu ndani ya siku 21 tangu kumalizika kwa shauri na kutoa mwenendo wa shauri ndani ya siku 30. 

“Mnaanza kazi kwa kuaminiwa, Mhe. Rais amewaamini na mmeibeba imani, hivyo iendelezeni imani hiyo kwani ikipungua tutatumia sheria”, alisisitiza Jaji Mkuu.

Akimzungumzia aliyekuwa Msajili Mkuu wa Mahakama ya Tanzania ambaye ameteuliwa kuwa Katibu Tawala wa Mkoa wa Njombe, Jaji Mkuu alimpongeza kwa kazi nzuri aliyofanya ndani ya Mahakama na kumtaka kwenda kuendeleza kazi hiyo nzuri pia katika mkoa wa Njombe. 

Jana Rais Magufuli alifanya uteuzi wa Majaji 12 wa Mahakama Kuu ya Tanzania pamoja na viongozi wengine wakiwemo Mdhibiti na Mkaguzi Mkuu wa Hesabu za Serikali (CAG),   Katibu Tawala Mkoa wa Njombe (RAS), Balozi wa Tanzania nchini Kuwait, Kamishna wa kazi, Mwenyekiti wa Tume ya Haki za Binadamu na Utawala Bora na Makamu wake pamoja na Makamishna wa Tume hiyo.

Rais wa Jamhuri ya Muungano wa Tanzania, Mhe. Dkt. John Pombe Joseph Magufuli akimuapisha Mhe. Elizabeth Mkwizu kuwa Jaji wa Mahakama Kuu ya Tanzania mapema Novemba 04, 2019 Ikulu jijini Dar es Salaam. Kabla ya uteuzi huu Mhe. Mkwizu alikuwa Naibu Msajili Mwandamizi, Mahakama ya Rufani (T). Katika hafla hiyo, Mhe. Rais amewaapisha jumla Majaji wapya 12 pamoja na Viongozi wengine wa Serikali wakimemo Mdhibiti na Mkaguzi Mkuu wa Hesabu za Serikali (CAG) Makamishna wa Tume ya Haki za Binadamu na Utawala Bora, Kamishna wa Kazi pamoja na Balozi wa Kuwait.

 Magufuli akimuapisha Mhe. Joachim Tiganga kuwa Jaji wa Mahakama Kuu ya Tanzania. Kabla ya uteuzi huu Mhe. Tiganga alikuwa Naibu Msajili Mfawidhi wa Mahakama Kuu-Kanda ya Dar es Salaam.

Rais wa Jamhuri ya Muungano wa Tanzania, Mhe. Dkt. John Pombe Joseph Magufuli akimuapisha Mhe. Augustine Rwizile kuwa Jaji wa Mahakama kuwa Jaji wa Mahakama Kuu ya Tanzania. Mhe. Rwizile alikuwa Naibu Msajili na pia alikuwa Hakimu Mkazi katika Mahakama ya Hakimu Mkazi Kisutu.

Rais wa Jamhuri ya Muungano wa Tanzania, Mhe. Dkt. John Pombe Joseph Magufuli akimuapisha Mhe. Dkt. Deo John Nangela kuwa Jaji kuwa Jaji wa Mahakama Kuu ya Tanzania, kabla ya uteuzi huu Mhe. Jaji Nangela alikuwa katika Ofisi ya Tume ya Ushindani (Fair Competition Commission-FCC)

Baadhi ya Viongozi walioshiriki katika hafla ya kuapishwa kwa Viongozi mbalimbali, wa kwanza kulia ni Makamu wa Rais wa Jamhuri ya Muungano wa Tanzania, Mhe. Samia Suluhu Hassan, wa pili kulia ni Waziri Mkuu wa Jamhuri ya Muungano wa Tanzania, Mhe. Kassim Majaliwa Majaliwa, wa kwanza kushoto ni Jaji Mkuu wa Tanzania, Mhe. Prof. Ibrahim Hamis Juma na wa pili kushoto ni Spika wa Bunge la Jamhuri ya Muungano wa Tanzania, Mhe. Job Ndugai.

Rais wa Jamhuri ya Muungano wa Tanzania, Mhe. Dkt. John Pombe Joseph Magufuli akimuapisha Mhe. Angela Antony Bahati kuwa Jaji wa Mahakama Kuu, kabla ya uteuzi alikuwa Katibu Msaidizi wa  Tume ya Kurekebisha Sheria,

Jaji Mteule wa Mahakama Kuu ya Tanzania, Mhe. Kassim Ngukali Robert akila kiapo mbele ya Rais wa Jamhuri ya Muungano wa Tanzania, Mhe. Dkt. John Pombe Joseph Magufuli, kabla ya uteuzi Mhe. Robert alikuwa Ofisi ya Kitengo cha Kudhibiti Fedha Haramu cha Wizara ya Fedha na Mipango.

 Rais wa Jamhuri ya Muungano wa Tanzania, Mhe. Dkt. John Pombe Magufuli akimuapisha Katibu Tawala wa Mkoa wa Njombe, Mhe. Katarina Revocati, kabla ya uteuzi huu Mhe. Revocati alikuwa Msajili Mkuu- Mahakama ya Tanzania.

Jaji Mkuu wa Tanzania, Mhe. Prof. Ibrahim Hamis Juma akizungumza katika hafla hiyo.

Baadhi ya Viongozi mbalimbali wa Serikali, Majaji na wageni waalikwa walioshiriki katika hafla ya kuapishwa iliyofanyika Ikulu jijini Dar es Salaam, Novemba 04, 2019.

Mhe. Rais akizungumza mara baada ya kuapisha

 Spika wa Jamhuri ya Muungano wa Tanzania, Mhe. Job Ndugai akizungumza katika hafla hiyo.

Rais wa Jamhuri ya Muungano wa Tanzania, Mhe. Dkt. John Pombe Joseph Magufuli katika picha ya pamoja na Viongozi mbalimbali aliowaapisha, wanne kushoto ni Makamu wa Rais wa Jamhuri ya Muungano wa Tanzania, Mhe. Samia Suluhu Hassan, wa nne kulia ni Waziri Mkuu wa Jamhuri ya Muungano wa Tanzania, Mhe. Kassim Majaliwa Majaliwa, wa tatu kushoto ni Jaji Mkuu wa Tanzania, Mhe. Prof. Ibrahim Hamis Juma, wa tatu kulia ni Spika wa Bunge la Jamhuri ya Muungano wa Tanzania, Mhe. Job Ndugai, wa pili kulia ni Katibu Mkuu Kiongozi, Eng. John Kijazi, wa pili kushoto ni Waziri wa Katiba na Sheria, Mhe. Augustine Mahiga, wa kwanza kulia ni Waziri wa Mambo ya Nje na Ushirikiano wa Kimataifa na wa kwanza kushoto ni Waziri wa Fedha na Mipango, Mhe. Dkt. Phillip Mpango.

Meza kuu katika picha ya pamoja na Viongozi walioapishwa pamoja na Wahe. Majaji wa Mahakama ya Rufani (T).

Meza kuu katika picha ya pamoja na Viongozi walioapishwa pamoja na Wahe. Majaji wa Mahakama Kuu ya Tanzania.

Picha ya pamoja, meza kuu, Viongozi walioapishwa pamoja na Watumishi mbalimbali wa Mahakama walioshiriki katika hafla hiyo. Aliyesimama mstari wa kwanza (wa kwanza kushoto) ni Mtendaji Mkuu wa Mahakama ya Tanzania, Bw. Mathias Kabunduguru.