MAHAKAMA YAKUPUNGUZA SIKU ZA USIKILIZWAJI WA SHAURI

Na Lydia Churi- Mahakama

Mahakama ya Tanzania imefanikiwa kupunguza wastani wa muda wa kusikiliza shauri kutoka siku 515 na kufikia siku 345 kati ya mwaka 2015 na mwaka 2019.

Mtendaji Mkuu wa Mahakama ya Tanzania Bw. Mathias Kabunduguru amewaambia waandishi wa Habari leo kuwa wastani huo umepungua kutokana na Mahakama kujiwekea mikakati mbalimbali ikiwemo kuongeza idadi ya watumishi. 

Kwa mujibu wa Mtendaji Mkuu, Mahakama ya Tanzania pia imefanikiwa kupunguza Mashauri ya Mlundikano kutoka asilimia 16 mwaka 2015 na kufikia asilimia 4 mwaka 2019.

 

Alisema pamoja na maboresho yaliyo fanyika na yanayoendelea katika kipindi cha miaka mitano, serikali imetoa vibali vya kuajiri jumla ya watumishi wa kada mbalimbali 1414 wakiwemo Mahakimu 430.

Aidha, ili kuhakikisha huduma ya utoaji haki inasonga mbele, kati ya mwaka 2016 na sasa, Tume ya Utumishi wa Mahakama kwa mamlaka iliyopewa na Ibara ya 113 (1) (a) ya Katiba ya Jamhuri ya Muungano wa Tanzania imemshauri Mheshimiwa  Rais juu ya uteuzi wa Majaji wa Mahakama  Kuu 39 na kufanya idadi ya Majaji kuwa 78.  Aliongeza kuwa kati ya mwaka 2016 hadi sasa jumla ya Majaji 28 wa Mahakama Kuu wamestaafu utumishi.

Alisema ongezeko la idadi ya watumishi linalenga kutekeleza nia ya Mahakama ya kufupisha muda wa usikilizwaji wa mashauri. Mahakama imejipangia utaratibu wake ambapo shauri katika Mahakama za Rufani na Mahakama Kuu linapaswa kumalizika ndani ya miaka miwili, Mahakama za Hakimu Mkazi na za wilaya mwaka na katika Mahakama ya Mwanzo halitakiwi kuzidi miezi 6. 

Mtendaji Mkuu wa Mahakama ya Tanzania Bw. Mathias Kabunduguru (katikati) akiwa kwenye Mkutano na Waandishi wa habari (hawapo pichani). Wa pili kushoto ni Kaimu Msajili Mkuu wa Mahakama ya Tanzania Mhe. Eva Nkya, wa pili kulia ni Mtendaji wa Mahakama ya Rufani Bw. Solanus Nyimbi na kulia ni Mkurugenzi wa Tehama wa Mahakama ya Tanzania Bw. Kalege Enock. Kushoto ni Mkuu wa Kitengo cha Usimamizi wa Majengo cha Mahakama, Mhandisi Khamadu Kitunzi. 

 Mtendaji Mkuu wa Mahakama ya Tanzania Bw. Mathias Kabunduguru (katikati) akizungumza. 

 

 Mtendaji wa Mahakama ya Rufani Bw. Solanus Nyimbi na Mkurugenzi wa Tehama wa Mahakama ya Tanzania Bw. Kalege Enock wakifuatilia jambo wakati wa Mkutano na Waandishi wa habari.