MAGEUZI YA MAHAKAMA KUFANIKISHWA NA WATUMISHI WENYE MAADILI

Na Lydia Churi-Mahakama Dodoma

Jaji Mfawidhi wa Mahakama Kuu ya Tanzania kanda ya Dodoma Mhe. Mustapher Siyani amesema, mageuzi makubwa yanayofanywa na Mahakama ya Tanzania  hayatafanikiwa ikiwa watumishi wa Mahakama hawatakuwa waadilifu.

Akizungumza kwenye maadhimisho ya kilele cha Wiki ya Sheria na Siku ya Sheria nchini mjini Dodoma leo, Jaji Mfawidhi amesema Mahakama ya Tanzania hivi sasa inafanya mageuzi ili kuweka mazingira bora ya uwekezaji na biashara na pia kutimiza wajibu wake wa kikatiba wa kutoa haki.

Amewataka watumishi wa Mahakama pamoja na wananchi wanaotumia huduma za Mahakama  kujiweka mbali na vitendo vya aina yoyote ya rushwa na ukosefu wa maadili na kuwataka wananchi wema kutokuwa na hofu kutoa taarifa kwa Mhimili huo au kwenye Taasisi zinazopamabana na vitendo hivyo.

“Kwenye hili hatutakuwa wapole, tutachukua hatua kwa wachache watakaojaribu kutuchafua katika wakati huu ambao tuko kazini kuijenga Taasisi yetu”, alisema Mhe. Siyani.

Amesema Mahakama Kuu ya Tanzania kanda ya Dodoma haitakubali kunyooshewa vidole kwa vitendo viovu kwa kuwa wanataka kuwa mfano bora kwa watoa huduma wengine, vinara na wanaoaminika kwa wananchi.

Jaji Mfawidhi amesema, kwa kutimiza wajibu wake, Mahakama  inatarajia wananchi wataongeza Imani na chombo hicho na hivyo kupeleka migogoro yao mahakamani  jambo ambalo litaimarisha utawala wa sheria na na kuweka mazingira wezeshi ya uwekezaji na biashara.

Amesema maudhui ya Wiki ya Sheria mwaka huu yanakumbusha Mahakama na wadau wake wajibu ilionao katika kuhakikisha Tanzania inakuwa taifa lenye uchumi wenye ushindani wa haki, maisha bora kwa watu wake na umuhimu wa uwekaji na uimarishaji wa mazingira bora na wezeshi, kwa lengo la kuvutia uwekezaji wa mitaji ya kibiashara ya ndani na nje ya nchi.  

Kwa mujibu wa Jaji Mfawidhi, mazingira bora kwa uwekezaji na biashara yanategemea uwepo wa utawala na uongozi bora hasa kwenye eneo la utoaji haki kwa misingi ya sheria. Ameongeza kuwa moja kati ya viashiria vya ubora wa mazingira ya uwekezaji nchini ni uwepo wa chombo imara  cha utatuzi wa migogoro ya kibiashara.

“Mahakama inao wajibu wa kulinda utawala wa sheria, utulivu na ustawi wa nchi kwa kuhakikisha haki inapatikana kwa wakati na kutatua migogoro kwa amani,”alisema. 

Amesema Mahakama zinatakiwa kutenda haki kwa wote bila kujali hali ya mtu kijamii, kiuchumi na kutochelewesha haki bila ya sababu za msingi, kutoa fidia kwa wanaoathirika kutokana na makosa ya mwingine na kwa mujibu wa sheria mahususi zilizotungwa na Bunge na kukuza na kuendeleza usuluhishi kati ya wanaohusika katika migogoro.  

Siku ya Sheria nchini huadhimishwa kila mwaka kuashiria kuanza rasmi kwa shughuli za Mahakama kwa mwaka husika. Siku hii hutanguliwa na wiki ya Sheria ambayo kwa mwaka huu ilianza Januari 31 na kuhitimishwa leo Februari 5, 2020. Katika kipindi cha wiki ya sheria, elimu kuhusu masuala ya sheria na huduma mbalimbali hutolewa na Mahakama kwa kushirikiana na wadau wake. 

 Jaji Mfawidhi wa Mahakama Kuu ya Tanzania kanda ya Dodoma Mhe. Mustapher Siyani akikagua gwaride rasmi kuashiria Maadhimisho ya kilele cha wiki ya Sheria na Siku ya Sheria nchini yaliyofanyika leo kwenye viwanja vya Mahakama Kuu kanda ya Dodoma.   

 Jaji Mfawidhi wa Mahakama Kuu ya Tanzania kanda ya Dodoma Mhe. Mustapher Siyani akipokea salaam wakati wa gwaride rasmi la Maadhimisho ya kilele cha wiki ya Sheria na Siku ya Sheria nchini yaliyofanyika leo kwenye viwanja vya Mahakama Kuu kanda ya Dodoma.   

 Jaji wa Mahakama Kuu ya Tanzania kanda ya Dodoma Mhe. George Masaju  akiwa pamoja na wahgeni waalikwa kwenye Maadhimisho hayo katika  Maadhimisho ya kilele cha wiki ya Sheria na Siku ya Sheria nchini yaliyofanyika leo kwenye viwanja vya Mahakama Kuu kanda ya Dodoma.   

  Jaji Mfawidhi wa Mahakama Kuu ya Tanzania kanda ya Dodoma Mhe. Mustapher Siyani akikagua gwaride rasmi kuashiria Maadhimisho ya kilele cha wiki ya Sheria na Siku ya Sheria nchini yaliyofanyika leo kwenye viwanja vya Mahakama Kuu kanda ya Dodoma.