MASHAURI 1519 YASIKILIZWA KATI YA MACHI NA APRILI KWA MAHAKAMA MTANDAO

Na Magreth Kinabo- Mahakama

Mahakama ya Tanzania imesikiliza jumla ya mashauri 1,519 kupitia Mahakama Mtandao (Video Conferencing) kati ya Machi 23 hadi Aprili 21mwaka huu ikiwa ni utekelezaji wa agizo la Jaji Mkuu wa Tanzania alilolitoa Machi 23 mwaka huu.

Akizungumza na Waandishi wa habari Machi 23, 2020 jijini Mwanza, Jaji Mkuu wa Tanzania Mhe. Prof. Ibrahim Hamis Juma aliitaka Mahakama kuongeza kasi ya matumizi ya Teknolojia ya Habari na Mawasiliano (TEHAMA) ikiwa ni hatua  ya kupambana na ugonjwa wa COVID 19 unaosababishwa na virusi vya Corona.

Mkurugenzi Msaidizi  wa Teknolojia ya Habari na Mawasiliano wa Mahakama ya Tanzania (TEHAMA), Bw. Machumu Essaba amesema Mashauri hayo yamesikilizwa katika Mahakama za Hakimu Mkazi za Kisutu na Kinondoni pamoja na Mahakama za wilaya za Ilala, Temeke na Kigamboni jijini Dar es Salaam.

Akitaja idadi ya mashauri yaliyosikilizwa na Mahakama hizo, Bw. Essaba alisema Mahakama ya Hakimu Mkazi Kisutu ilisikiliza na mashauri 424 na Mahakama ya Hakimu Mkazi Kinondoni ilisikiliza  mashauri 324. Aidha, Mahakama za wilaya za Ilala, Temeke na Kigamboni zilisikiliza  mashauri kama ifuatavyo; Ilala mashauri 465, Temeke 230. Mashauri hayo yalisikilizwa kutoka magereza ya Keko na Segerea.

Katika hatua nyingine, Essaba alisema Mahakama imeanza  kutumia teknolojia maalumu inayomuwezesha Jaji kusikiliza kesi akiwa ofisini  bila ya kufika katika chumba cha Mahakama ya wazi  au cha  chenye vifaa vya  Mahakama Mtandao ‘Video Conference’.

Alisema teknolojia hiyo imeanza kutumiwa na Mahakama ya Tanzania  ikiwa ni njia mojawapo ya  kuepuka kuenea kwa maambukizi ya Virusi vya Corona.

‘‘Teknolojia hii  inamwezesha Jaji kusikiliza kesi  akiwa ofisini huku mhusika wa kesi akiwa katika chumba maalumu.

‘‘Utaratibu huu hauruhusu watu wengine kuwa katika vyumba hivyo, isipokuwa wahusika wa kesi, ambao ni Jaji na mleta maombi,’’alisema Essaba. Aliongeza kuwa teknolojia hiyo inamuwezesha Jaji kutumia  kompyuta mpakato.

Mahakama imeanza kutumia teknolojia hiyo Aprili 21, mwaka huu katika Mahakama ya Rufani Tanzania, ambapo Jaji wa Mahakama hiyo, Mhe. Dkt. Gerald Ndika alisikiliza kesi, akiwa ofisini kwake jijini Dar es salaam huku mleta maombi akiwa Mahakama Kuu Kanda Mwanza. Hivyo teknolojia hiyo itakuwa inaendelea kutumiwa na Mahakama.

Uongozi wa Mahakama katika  kuunga mkono juhudi za  Serikali kukabiliana na virusi vya Corona tayari imekabidhi  vifaa vya TEHAMA  kwa Maafisa TEHAMA wa kanda 16 za Mahakama Kuu  Aprili 21, mwaka huu ili kuziwezesha Mahakama nyingine kuanza kusikiliza  kesi kwa njia ya Mahakama  Mtandao.

Jaji wa Mahakama ya Rufani Tanzania, Mhe. Dkt. Gerald Ndika akiendesha shauri kwa kutumia teknolojia maalumu bila ya  kufika chumba cha mahakama ya wazi au Mahakama Mtanado Video Conference'. 

Vifaa vya TEHAMA vikipakiwa   kwenye gari kwa ajili ya kusambazwa  katika kanda mbalimbali za Mahakama .