WATUMISHI WA MAHAKAMA WATAHADHARISHWA KUHUSU UGONJWA WA CORONA

Na, Francisca Swai- Mahakama, Musoma

Watumishi wa Mahakama Kuu Kanda ya Musoma  wameaaswa kuchukua tahadhari  wanapotoa  huduma kwa wananchi ili  kuepukana  na virusi  vya Corona vinavyosababishwa  ugonjwa wa COVID-19, ukiwemo ugonjwa wa  Homa ya Ini (HEPATITIS B).

Tahadhari hiyo ilitolewa hivi karibuni na Mwenyekiti wa Kamati ya COVID – 19, Elimu ya Afya kwa Jamii Mkoa wa Mara, Dkt. Theophil Kayombo alipokuwa akitoa elimu juu ya hatari ya magonjwa mawili yanayosababishwa na virusi ambayo ni ugonjwa wa COVID-19 na Homa ya Ini.

‘‘Vema katika kipindi hiki kuchukua tahadhari ya hali ya juu wakati wa kutoa huduma kwa wananchi. Daktari huyo alisema, huwezi  kujua unamhudumia mteja aliye katika hali gani ya kiafya,’’alisema Dkt. Kayombo.

Aliongeza kwamba  ingawa dalili zote zinaeleweka za ugonjwa wa COVID-19  ambazo ni kuwa  homa kali, mafua makali, kuumwa na koo pamoja na kikohozi kikali lakini bado sio watu wote wanaonyesha dalili hizo kwa haraka.

‘Tunachotakiwa kufanya ni kuzingatia maelekezo yanayotolewa na  Wizara ya Afya Maendeleo ya Jamii, Jinsia, Wazee na Watoto,  ikiwa ni pamoja na kuvaa barakoa (mask) na  kunawa mikono mara kwa mara.’’alisisitiza.

Daktari huyo aliwaasa watumishi pamoja na jamii kwa ujumla kuepuka mikusanyiko isiyoyalazima, kuepuka kukaa sehemu zenye mikusanyiko kwa muda mrefu kama vile sokoni na kuzingatia mashart yanaelekezwa na Serikali, ili kujilinda wenyewe, familia zetu na Taifa kwa ujumla.

Akizungumzia kuhusu ugonjwa wa  HEPATITIS B , Dkt.  Kayombo alisema ini lina  kazi nyingi  mwili na moja wapo ya kazi kubwa  ni kuchuja sumu mwilini,  Hivyo inapotokea kiungo hicho kushindwa kufanya kazi hiyo inamaana mwili wako uko katika hatari kubwa.

Dkt, Kayombo   alisema ugonjwa huo unasambaa kwa kupitia majimaji yanayotoka katika mwili pamoja na damu. Na Takwimu za Shirika la Afya Duniani (WHO) zinaonyesha takriban watu 600, 000  hufariki kila mwaka kutokana na ugonjwa huo.

Alisema njia pekee ya kuepuka ugonjwa huo ni kupata chanjo zake ambazo ziko tatu na kuzimaliza zote hapo utakuwa salama maana ni kinga ya maisha. Na kama katika vipimo vya awali vikionyesha mtu ana dalili za ugonjwa huo basi azingatie tiba na maelekezo ya wataalamu wa afya ili aweze kuwa salama.

Kwa  upande wake, Mtendaji wa Mahakama Kuu  Kanda ya Musoma Bw, Festo Chonya alimshukuru muwezeshaji huyo kwa kutoa elimu hiyo muhimu kwa watumishi na huku akiwapamoyo katika kutekeleza majukumu yao ya kila siku.

Aliahidi kuweka utaratibu wa  watumishi wote waweze kupima  ugonjwa wa homa ya Ini kwa kuwa  mtumishi anapokuwa na afya bora basi na mwajiri anakuwa na uhakika wa kupata matokeo mazuri katika kazi zake.

Mwenyekiti wa Kamati ya COVID – 19, Elimu ya Afya kwa Jamii Mkoa wa MaraDkt. Theophil Kayombo, akitoa juu ya hatari ya magonjwa mawili yanayosababishwa na virusi ikiwemo ugonjwa wa COVID-19 na Homa ya Ini.