JAJI MKUU - AWATAKA MAHAKIMU KUWA TAYARI KUSIKILIZA MASHAURI YA ARDHI

Na Magreth Kinabo- Mahakama

Jaji Mkuu wa Tanzania, Mhe. Prof. Ibrahim Hamis Juma amewataka Mahakimu kuwa   na utayari wa kuanza kusikiliza mashauri yanayohusu ardhi ili kutatua changamoto na malalamiko yaliyojitokeza kwenye eneo hilo kupitia Mabaraza ya Ardhi hali iliyosababisha suala hilo kwenda Serikalini.

Akizungumza leo mara baada ya   kumuapisha Hakimu Mkazi, Mhe. Olivia Towilo ofisini kwake, iliyopo Mahakama ya Rufani Tanzania, Jijini Dar es Salaam. Jaji Mkuu alisema Mahakama imekuwa ikifanya vizuri ndio maana Serikali imeona ikabidhi jukumu hilo katika mhimili huo.

“Kuanzia mwaka wa fedha ujao yaani 2020/2021 Mahakama itaanza kusikiliza mashauri ya ardhi, Hivyo tumeongezewa mzigo Mahakimu watapewa mashauri. eneo hili lina mashauri mengi, changamoto na malalamiko.

“Mimi naona Mahakimu ninyi muwe mstari wa mbele kuhakikisha kwamba changamoto na malalamiko yaliyojitokeza kupitia Mabaraza ya Ardhi hali iliyosababisha suala hili kwenda Serikalini yanatatuliwa,’’ alisema Jaji Mkuu.

Jaji Mkuu aliongeza kwamba anatarajia Mahakama itafanya kazi hiyo kwa ubora na kutenda hakin na kutoa kwa wakati, kutatua migogoro, ikiwemo kutorudia makosa yaliyojitokeza hapo awali.

Aidha Prof. Juma  aliwataka  mahakimu hao, kuwa mstari wa mbele wa utoaji wa haki  kwa kuwa hivi sasa kutokana na janga la ugonjwa wa homa ya mapafu (COVID 19) unaosababishwa na virusi vya Corona utendaji kazi wa Mahakama umebadilika kwa kutumia Teknolojia  ya Habari na Mawasiliano (TEHAMA).

“Mahakimu sasa wako mstari wa mbele  katika mapambano hayo wanapofanya kazi ya  hutoaji haki, hivyo wanachangamoto ya  kuangalia afya zao na watu wanaofika mahakamani ili kuepusha kuenea kwa virusi vya Corona,’’ alisisitiza huku akisema kazi ya uhakimu ni muhimu kwa kuwa asilimia 80 ya mashauri yote yanayosajiliwa na yanasikilizwa katika Mahakama za Mahakimu.

Pia alifafanua kuwa unapozungumzia haki kwa mwananchi wa kawaida anatambua kuwa ni Hakimu,ambapo aliwataka Mahakimu hao  kutoa haki kulingana na viapo vyao.

Aliongeza kuwa Mahakimu wanapaswa kujutumia elimu waliyonayo kujiendeleza kutafuta taarifa mbalimbali bila hata ya kupata cheti kwani katika karne ya 21 ya ushindani na TEHAMA, hivyo wanatakiwa kuwa weledi katika suala hilo, uandishi na lugha ili hukumu zao ziwe zinasomeka na kueleweka.

Hakimu huyo aliyeapishwa ametokea katika Mahakama ya Mwanzo Arusha Mjini (Maromboso).

Jaji Mkuu wa Tanzania, Mhe. Prof. Ibrahim Hamis Juma akimuapisha Hakimu Mkazi, Mhe. Olivia Towilo leo ofisini kwake, iliyopo Mahakama ya Rufani Tanzania, Jijini Dar es Salaam.

Jaji Mkuu wa Tanzania, Mhe. Prof. Ibrahim Hamis Juma akitia saini hati ya kiapo cha Hakimu  Mkazi, Mhe. Olivia Towilo leo ofisini kwake, iliyopo Mahakama ya Rufani Tanzania, Jijini Dar es Salaam baada ya kumuapisha.

Jaji Mkuu wa Tanzania, Mhe. Prof. Ibrahim Hamis Juma akimpatia vitendea kazi Hakimu Mkazi, Mhe. Olivia Towilo leo ofisini kwake, iliyopo Mahakama ya Rufani Tanzania, Jijini Dar es Salaam baada ya kuampisha.

Jaji Mkuu wa Tanzania, Mhe. Prof. Ibrahim Hamis Juma akizungumza mara baada ya kumuapisha Hakimu Mkazi, Mhe. Olivia Towilo leo ofisini kwake, iliyopo Mahakama ya Rufani Tanzania, Jijini Dar es Salaam.

Msajili Mkuu wa Mahakama ya Tanzania, Mhe. Wilbert Chuma (wa kwanza kulia) akizungumza jambo kabla ya uapisho huo.

Msajili wa Mahakama ya Rufani Tanzania, Mhe. Kevin Mhina na Msajili wa Mahakama Kuu ya Tanzania, Mhe. Sharmillah Sarwatt wakihudhuria uapisho huo. Aliyeketi nyuma ni Mtendaji wa Mahakama Kuu ya Tanzania, Bw. Humphrey Paya.

Hakimu huyo akitia saini kiapo chake.

                                   ( Picha na Magreth Kinabo- Mahakama)