MAHAKAMA KUU KANDA YA SHINYANGA YATOA DHAMANA YA MBUNGE KIMTANDAO

 Na Emmanuel Oguda –Mahakama Kuu, Shinyanga

Mahakama Kuu ya Tanzania Kanda ya Shinyanga, leo tarehe 15/5/2020 imetoa maamuzi madogo ya   maombi ya dhamana ya Mbunge wa Kishapu Mhe. Seleman Masoud Seleman, maarufu kwa jina la Nchambi na Mkewe Aisha Soud.  Maombi hayo yalisikilizwa na kusomwa maamuzi yake kwa njia ya Mahakama Mtandao (video conference).

Maamuzi hayo yamesomwa kwa njia hiyo na Jaji wa Mahakama Kuu ya Tanzania Kanda ya Shinyanga, Mhe. Cyprian Mkeha ambaye ametoa dhamana kwa waombaji hao kwa masharti matatu, yakiwa ni kusaini hati ya dhamana ya shilingi milioni 50 kwa kila mtuhumiwa na kuwa na mdhamini mmoja atayekusaini dhamana ya milioni 10 kwa  kila mmoja. Sharti la tatu ni wote wawili kukabidhi polisi hati zao za kusafiria na kutoruhusiwa kusafiri nje ya nchi.

Masharti hayo ya dhamana yatathibitishwa na Mahakama ya Wilaya Shinyanga mbele ya Hakimu aliyewasomea mashitaka. Hata hivyo Mbunge huyo alirudi gerezani na taratibu za dhamana zitaendelea.

Maombi haya ya dhamana yalifunguliwa mahakamani hapo baada ya Mahakama ya Wilaya Shinyanga ambako washitakiwa walisomewa mashitaka hapo awali yanayowakabili kuamua kuwa haina mamlaka kisheria ya kuwapa dhamana watuhumiwa wanaotuhumiwa kwa makosa ya uhujumu uchumi ambayo thamani yake haikutajwa kwenye hati ya mashitaka.

Mbunge huyo na Mkewe walishitakiwa katika Mahakama ya Wilaya Shinyanga mnamo Mei 8, mwaka huu wakikabiliwa na mashitaka 12 ya Uhujumu Uchumi, ikiwemo kumiliki silaha za moto kinyume na sheria za nchi.

Mahakama Kuu Shinyanga ilisikiliza shauri hilo kwa njia hiyo kufuatia uzinduzi wa mfumo wa kidijitali wa kusikiliza mashauri bila wahusika kufika mahakamani moja kwa moja.  Uzinduzi huo uliofanyika  Mei 13, mwaka huu katika ukumbi wa Mahakama Kuu Shinyanga.

Aidha katika uzinduzi   huo, usikilizwaji wa mashauri mengine mawili  ulifanyika kwa njia ya hiyo, ambayo yalihusu maombi namba 34/2019 la mfungwa Juma Masunga dhidi ya Jamhuri kuomba kuongezewa muda wa kukata rufaa na shauri la rufaa namba 9/2020 la mfungwa Kulwa Ndaki dhidi ya Jamhuri yaliyosikilizwa na Jaji Mfawidhi wa Mahakama hiyo, Mhe. Gerson Mdemu.

Wafungwa hao, walifuatilia usikilizwaji wa mashauri  hayo kwa njia ya hiyo wakiwa gereza la Mhumbu Wilaya ya Shinyanga, huku Waendesha Mashitaka wa Serikali Pamoja na Mawakili wa kujitegemea wakiwa katika ukumbi wa mahakama na  Majaji wakiwa kwenye chemba  zao.

Wakati huo huo, Festor Sanga, anaripoti kuwa Kaimu Jaji Mfawidhi wa Mahakama Kuu Kanda ya Kigoma Mhe.  Athumani  Kirati  amewataka  waandishi wa habari kusaidia kuuhabarisha Umma juu ya Usikilzaji wa Mashauri kwa njia ya Video Conference na Usajili wa Mashauri kwa njia ya mtandao (Electronic filling) ili kuweza kuondokana na msongomano usiokuwa wa lazima katika kipindi hiki changamoto ya ugonjwa huo.

‘‘Tumewezeshwa vifaa ambavyo vimefungwa katika Gereza la Bangwe na Mahakama Kuu vinavyowezesha usikilizaji wa mashauri kwa njia ya Video’’ alisema Jaji Kirati.

Kwa upande wake Naibu Msajili wa Mahakama Kuu Kanda ya Kigoma Mhe. Arnold Kirekiano alieleza kwamba tangu kuanza kwa mfumo huo Mahakama Kuu Kigoma, Mahakama ya Hakimu Mkazi na Mahakama za Wilaya Kibondo na Kigoma wameanza kutumia mfumo huo. Hivyo kwa wiki hii mashauri mawili yalisikilizwa Mahakama Kuu ambapo mawakili walikuwa Dar es salaam, Kigoma na Tabora.

Hatua hiyo imekuja wakati Mahakama ya Tanzania ikiendelea kuimarisha matumizi ya mifumo ya kisasa ya Teknolojia ya Habari na Mawasiliano (TEHAMA), katika kusikiliza na usimamizi wa mashauri. Mfumo huu Pamoja na faida nyinginezo unasaidia kupunguza msongamano wa watu wanaofika kupata huduma mahakamani katika kipindi hiki cha kukabiliana na kuenea kwa virusi vya Corona vinavyosababisha  ugonjwa wa homa kali ya mapafu (COVID  – 19).

Jaji Mfawidhi wa Mahakama Kuu ya Tanzania Kanda ya Shinyanga, Mhe. Gerson Mdemu akizindua usikilizaji wa mashauri kwa njia ya mtandao Mei 13, mwaka huu.

 Jaji wa Mahakama Kuu ya Tanzania Kanda ya Shinyanga, Mhe.Cyprian Mkeha akisikiliza shauri kwa njia ya mtandao.

Kaimu Jaji Mfawidhi wa Mahakama Kuu Kanda ya Kigoma Mhe. Jaji Athumani Kirati  akifafanua jambo kwa waandishi wa habari waliofika mahakamani hapo kuhamu  namna inavyotoa huduma katika kipindi hiki cha  janga la ugonjwa wa homa kali ya mapafu COVID 19.

 Baadhi ya waandishi wa habari wakipata maelezo kutoka kwa Kaimu Jaji Mfawidhi wa Mahakama Kuu Kanda ya Kigoma Mhe. Jaji Athumani Kirati.