MWILI WA JAJI MKUU MSTAAFU RAMADHANI WAAGWA KITAIFA.

Na Innocent Kansha – Mahakama

Aliyekuwa Jaji Mkuu Mstaafu wa Jamhuri ya Muungano wa Tanzania, marehemu Augustino Stephen Lawrence Ramadhani, ameagwa leo Mei, Mosi, mwaka huu katika ukumbi wa Karimjee uliopo Jiji Dar es salaam.

Akitoa salamu za rambirambi kwa familia ya marehemu na Watanzania wote kwa ujumla Jaji Mkuu wa Tanzania Mhe, Prof, Ibrahim Hamis Juma kwa niaba ya Mahakama ya Tanzania alisema anapenda kutoa shukrani tele kwa Rais wa Jamhuri ya Muungano wa Tanzania, Dkt. John Pombe Joseph Magufuli kwa salamu zake za rambi rambi alizotoa mara baada ya kujulishwa kifo cha Jaji Mstaafu Ramadhani.

“Namshukuru sana Mhe. Rais kwa ukaribu aliouonyesha kwa marehemu, tokea wakati alipokuwa akimtembelea alipolazwa Hospitali ya Aga Khan na kumjulia hali. Mahakama ya Tanzania haitasahau msaada wako wa

hali na mali”, alieleza Jaji Mkuu.

Mhe. Prof. Juma alimuelezea marehemu kama mtumishi mahiri, muadilifu, mwadilifu  aliyetakiwa na kila Taasisi ndani na nje ya nchi wasifu wa marehemu Jaji Ramadhani unaonyesha uwezo wake mkubwa na umahiri katika sehemu zote alizopitia, Mtumishi wa Umma wa aina hii hugombewa na taasisi mbali mbali.

“Ni Majaji wachache wanajaaliwa kupata nafasi ya kutoa huduma za utoaji haki katika Mahakama zilizo juu katika kilele kwa kipindi kirefu cha miaka 21. Hivyo basi, jambo lolote alilokuwa akilisema au kuliandikia, lilikuwa limebeba uzoefu wa miaka mingi ya utumishi, bali uliobereshwa kwa uzoefu wa sehemu mbali mbali alizofanya kazi.

“Jaji Ramadhani alianzisha na alishiriki kikamilifu katika maboresho ya Mahakama ya Tanzania yanayoendelea hivi leo ameshiriki katika mageuzi mengi na maboresho ya sekta ya Sheria. Alishiriki katika hatua za mwanzo wakati Rasimu ya Sheria ya Uendeshaji wa Mahakama (Judiciary Administration Act, 2011) ilipokuwa ikitayarishwa kabla ya kuwasilishwa Bungeni, mosi ikiwa ni kutenganisha shughuli za kimahakama na kiutawala”, alifafanua Prof. Juma.

Alitetea sana matumizi ya Teknologia ya Habari na Mawasiliano(TEHAMA) wakati Majaji na Mahakimu walikuwa bado wana sita kutumia teknologia hiyo, dhamira yake na nia kwamba Mahakama ya Tanzania iingie katika matumizi ya TEHAMA kuboresha shughuli zake za kila siku za utoaji haki nchini.

Alifafanua kuwa katika kipindi hiki cha ugonjwa wa COVID 19 inatulazimu kusikiliza mashauri mahakamani kwa kutumia teknologia hiyo.

Hivyo alipenda kutumia hukumu zake kama njia ya kuelimisha, kufafanua na kupendekeza Maboresho, pia alishiriki katika kuamua mashauri mengi ambayo yalisheheni elimu, tafsiri na hata mapendekezo ya mabadiliko ya sheria, siku zote aliwahimiza Mawakili wa Serikali na wananchi kwa ujumla wawe na kawaida ya kusoma hukumu mbali mbali zinazotolewa Mahakamani.

Marehemu Ramadhani alifariki dunia mnamo April 28, 2020 saa moja asubuhi katika Hospitali ya Aga Khan kutokana na maradhi yaliyomsumbua kwa muda mrefu.

Katibu Mkuu Kiongozi, Mhe. Balozi John Kijazi akitoa heshima za mwisho kwa mwili wa marehemu.

Mke wa aliyekuwa Jaji Mkuu Mstaafu wa Tanzania, Marehemu  Augustino Ramadhani,  Saada Ramadhani (katikati)  ambaye  ni Luteni Kanali Mstaafu wa Jeshi la Wananchi  wa Tanzania (JWTZ) akitoa heshima za mwisho kwa mwili wa mumewe leo kwenye viwanja vya Karimjee vilivyoko Jijini Dar es Salaam wakati wa   Mazishi ya Kitaifa.

Watoto wa  aliyekuwa Jaji Mkuu Mstaafu wa Tanzania, Marehemu  Augustino Ramadhani na ndugu wakimsaidia Mke wa marehemu, Saada Ramadhani (katikati)  ambaye  ni Luteni Kanali Mstaafu wa Jeshi la Wananchi  wa Tanzania (JWTZ) kwenda kwenye gari kwa ajili ya kuondoka kwenye viwanja vya Karimjee vilivyoko Jijini Dar es Salaama  leo mara baada ya  Mazishi ya Kitaifa kumalizika.

(Picha na Magreth Kinabo- Mahakama.)