WADAU WA MAHAKAMA WAASWA KUSHIRIKIANA KUTATUA CHANGAMOTO ZA HAKI ZA WATOTO

Na Magreth Kinabo

Msajili wa Mahakama Kuu ya Tanzania, Mhe. Sharmillah Sarwatt amewataka wadau mbalimbali wanaohusika na mashauri na haki za watoto kushirikiana ili kutatua changamoto zilizopo katika mahabusu na baadhi ya Magereza kwa lengo la hakikisha mtoto anapewa haki kwa wakati na kwenye mazingira bora, ikiwemo kulindwa.

Mhe. Sarwatt amezungumza hayo leo wakati akifungua kikao kazi cha wadau wa Mahakama kilichofanyika baada ya ukaguzi wa mahabusu za watoto na baadhi ya magereza uliofanyika kati ya  Machi 16 na 25, mwaka huu.

Alisema moja ya jukumu la Mahakama Kuu Masjala Kuu ni kukagua Mahakama zote za chini, magereza na mahabusu za watoto nchini ili kuboresha huduma za Mahakama kwa kuhakikisha haki inapatikana kwa wote na kwa wakati.

Msajili huyo alisema kila mdau ana wajibu wa kuhakikisha anafanikisha upatikanaji wa haki ya mtoto kwa wakati, ikiwemo kutafuta suluhisho la changamoto zilizojitokeza katika ukaguzi huo kwa haraka.

“Miongoni mwa changamoto iliyojitokeza katika ukaguzi huu ni pamoja na baadhi ya watoto kukutwa kwenye gereza la watu wazima kwa sababu ya kushindwa kutathimini umri wao wakati wa kuandaa hati zao za mashtaka na hivyo kusomeka ni watu wazima. Katika suala hili ni jukumu la kila mdau kuweza kuangalia jinsi ya kulitatua,” alisema Mhe. Sarwatt.

Kwa upande wake, Naibu Msajili wa Mahakama wa Kuu ya Tanzania Dawati la Watoto, Mhe. Nyigulila Mwaseba alizitaja changamoto nyingine zilizotokana na ukaguzi huo, kuwa ni  watoto waliokinzana na sheria  kupigwa wakati wa kukamatwa hali inayowasababishia baadhi yao kupata ulemavu wa kudumu hasa katika mkoa wa Dare es Salaam,  kutokuwepo kwa mahabusu za watoto hali inayosababisha watoto kuchanganywa na watu wazima katika magereza.

Changamoto nyingine ni Maafisa Ustawi wa Jamii kutohusishwa katika hatua za ukamataji wa watoto ili haki zao za msingi zifuatwe, baadhi ya majengo ya mahabusu ni chakavu na yana maeneo finyu hivyo kuwanyima watoto uhuru na nafasi ya kujifunza kwa vitendo,ikiwemo kuwabadilisha tabia, upungufu wa Maafisa Ustawi wa Jamii, kutokuwepo kwa fungu la kuwahudumia watoto waliokinzana na sheria magerezani( watoto waliopo gerezani baada ya mama zao kutuhumiwa kwa kosa la jinai au kufungwa) na kutokuwepo kwa usafiri katika mahabusu za watoto na kusababisha kutofikishwa mahakamani kwa wakati.

Akichangia hoja kuhusu kuwepo kwa bajeti au fungu la kuwahudumia watoto wanaoishi  magerezani  na mama zao(waliopo gerezani baada ya mamazao kutuhumiwa na kosa la jinai au kufungwa na kuwarekebisha watoto waliokinzana na sheria, ikiwemo kuwepo kwa mazingira wezeshi ya kusomea. Mrakibu Mwandamizi wa Jeshi la Magereza, Amina Kavirondo alisema kuna haja ya kupaza sauti ili  taasisi zinazohusika  zitenge bajeti kwa ajili hiyo.

Wadau hao, pia walipendekeza kuwepo kwa mikakati ya kuanzisha mahabusu za watoto waliokinzana na sheria.

Ukaguzi huo ulifanyika baada ya Jaji Kiongozi kuteua timu ya watu sita, ambayo ilifanya kazi hiyo kwenye mahabusu nne za watoto.zilizopo mikoa ya Dar es Salaam, Tanga, Moshi, Arusha na Mbeya, Shule ya Maadilisho iliyopo Irambo – Mbeya na baadhi ya magereza ambayo ni gereza la Maweni, Karanga, Ruanda, Kisongo, Chumbageni.Jumla vituo 13 na watoto 131 walihusika katika ukaguzi huo.

Msajili wa Mahakama Kuu ya Tanzania, Mhe. Sharmillah Sarwatt akionesha ripoti ya ukaguzi wa mahabusu za watoto na baadhi ya magereza ulifanyika kuanzia Machi 16 hadi Machi 25, mwaka huu wakati wa kikao kazi cha kujadili changamoto zilizojitokeza baad ya kufanyika ukaguzi wa mahabusu za watoto na baadhi ya magereza uliofanyika Machi 16 hadi 25, mwaka huu  kilichofanyika leo kwenye Kituo cha Habari cha Mahakama ya Tanzania (JMC, kilichopo Mahakama Kuu ya Tanzania, Dar es Salaam.

Naibu Msajili wa Mahakama wa Kuu ya Tanzania Dawati la Watoto, Mhe. Nyigulila Mwaseba, akizungumza jambo leo wakati kikao kazi kikao kazi cha wadau wa Mahakama cha kujadili changamoto zilizopo baada ya kufanyika ukaguzi wa mahabusu za watoto na baadhi ya magereza ulifanyika kuanzia Machi 16 hadi Machi 25, mwaka huu kilichofanyika kwenye Kituo cha Habari cha Mahakama ya Tanzania (JMC, kilichopo Mahakama Kuu ya Tanzania, Dar es Salaam.

Mrakibu Mwandamizi wa Magereza, Amina Kavirondo akichangia jambo kwenye kikao hicho.

Baadhi ya wadau hao wakiwa katika kikao hicho.

Wakili wa Serikali Mwandamizi kutoka Ofisi ya Taifa ya Mashtaka Dodoma, Beatrice Mpembo akifafanua jambo.

Mrakibu Msaidizi wa Magereza Justine Kipeta akichangia jambo wakati wa kikao hicho.