JUDICIARY OF TANZANIA: HUKUMU 12 ZA UHUJUMU UCHUMI ZATOLEWA SIMIYU KIPINDI CHA MWAKA HUU

Na Innocent kansha na Magreth Kinabo – Mahakama,Simiyu

Jumla ya mashauri 28 ya uhujumu uchumi yamefunguliwa na hukumu 12 zimeshatolewa kutokana na makosa ya aina hiyo katika Mahakama ya Hakimu Mkazi Simiyu pamoja na Mahakama ya Wilaya ya Bariadi.

Akifafanua chanzo cha makosa hayo kwa Maafisa Habari wa Mahakama ya Tanzania, ofisini kwake katika mahojiano maalum, Hakimu Mkazi Mfawidhi wa Mahakama ya Hakimu Mkazi Simiyu Mhe. Venance Mlingi alisema yanatokana na wananchi kuingia kwenye Hifadhi za Taifa za Wanyama Pori ya Serengeti na Pori la akiba la Maswa.

“Mashauri mengine tunayoyapokea ni ya dawa za kulevya ikiwemo, bangi na mirungi pamoja na mashauri ya talaka na mirathi, lakini mashauri tunayoyapokea kwa wingi zaidi ni ya kuingia hifadhini na kukutwa na nyara za Serikali na silaha kama vile, visu, panga na rungu ,’’ alisema Mlingi.

Takwimu zilizotolewa na Hakimu huyo zinaonyesha kuwa Desemba mwaka 2019, Mahakama ya Hakimu Mkazi na Mahakama ya Wilaya Bariadi zilibakiwa na mashauri ya uhujumu uchumu 125 na yalibaki kwa sababu mbalimbali ikiwemo kutokamilika kwa upelelezi na mengine kukosa kibali cha kuyasikiliza kutoka kwa Mkurugenzi wa Mashtaka Nchini (DPP).

Mlingi alifafanua kwamba kuanzia Januari mwaka 2020 hadi Juni Mahakama ya Hakimu Mkazi na Mahakama ya Wilaya Bariadi zilifanikiwa kusajili mashauri ya uhujumu uchumi yapatayo 28 na kumaliza mashauri 51,na kubakiwa na mashauri yapatayo 102.

Aliongeza kuwa kutoka na mashauri ya uhujumu uchumi Mahakama ya Hakimu Mkazi na Mahakama ya Wilaya ya Bariadi zilifanikiwa kutoa hukumu 12 za vifungo jela kwa watuhumiwa waliothibitika kutenda makosa hayo visivyopungua kuanzia miaka 20 hadi 30 jela.

Mlingi alizungumzia pia hali ya usikilizaji wa mashauri kwa upande wa Mahakama za Mwanzo katika Mkoa wa Simiyu ambapo alisema wamefanikiwa kumaliza mashauri yote ndani ya miezi sita ikiwa ni utekelezaji wa maelekezo ya viongozi wa Mahakama kwa asilimia 100, licha ya kujiwekea malengo ya kumaliza mashauri yote ndani ya miezi mitatu kwa kila Hakimu.

Aliongeza kwamba katika Mahakama hiyo, wanatoa elimu kuhusu masuala ya kisheria yanayohusu mirathi, ndoa na migogoro ya ardhi kwa wananchi ili kuwapa uelewa zaidi wa masuala hayo.

‘‘Ninaomba wananchi wafike katika Mahakama hii, ili kuweza kapata elimu ya masuala mbalimbali ya kisheria, hili ni jengo lao kwa ajili ya kupata elimu pia, alisisitiza Mhe. Mlingi".

Alisema katika kipindi cha mwaka mmoja, Mahakama ya Hakimu Mkazi Simiyu mashauri husajili wastani wa mashauri 120 na Mahakama ya Wilaya ya Bariadi ni m ashauri 660.

Kwa upande wake Mtendaji wa Mahakama ya Mkoa wa Simiyu, Bw. Leonard Maufi alisema uboreshaji wa miundombinu ya Mahakama umesaidia kwa kiasi kikubwa kupunguza gharama kubwa za ulipaji wa pango kwani ikumbukwe kuwa awali Mahakama ya Mkoa wa Simiyu ilikuwa inatumia jengo la mtu binafsi kuendeshea shughuli zake za utoaji haki.

Alisema kuwepo kwa jengo hilo kutaondoa gharama ya ulipaji kodi katika jengo walilokuwa wamekodi. Aliongeza kuwa kiasi cha shilingi milioni 3 zilizokuwa zikitumika kulipa kodi kila mwezi sasa fedha hizo zinaelekezwa kwenye matumizi mengine ya shughuli za Mahakama.

“Kutokana na maboresho haya, hivi sasa ari ya watumishi ya utendaji kazi ipo juu sana na ufanisi wa kazi umeongezeka kwa kiwango kikubwa na kila mtumishi anafanya kazi kwa nafasi, na vitendea kazi vipo vya kutosha,’’, alisema.

Maufi alisema hali hiyo imeongeza ubora wa utoaji huduma kwa wadau wa Mahakama, utunzaji wa nyaraka na kumbukumbu za mahakama umeboreka.

Hata hivyo, baadhi ya wateja waliofika mahakamani hapo walisema wameridhika na huduma zinazotolewa na kuishukuru Serikali kwa kujenga jengo hilo.

Hakimu Hakimu Mkazi Mfawidhi wa Mahakama ya Hakimu Mkazi Simiyu Mhe. Venance Mlingi, akizungumzia kuhusu usikilizaji wa mashauri baada ya uboreshaji wa miundombinu ya Mahakama.

Mtendaji wa Mahakama ya Mkoa wa Simiyu, Bw. Leonard Maufi akielezea jinsi uboreshaji wa miundombinu ulivyosaidia kuongeza ari utendaji kazi katika huduma za utoaji haki kwenye Mahakama hiyo.

Msaidizi wa Kumbukumbu Mwandamizi wa Mahakama ya Hakimu Mkazi Simiyu, Bw. William Mbeke akizungumza kuhusu utunzaji wa nyaraka na kumbukumbu za Mahakama katika Mahakama hiyo.