BARAZA LA WAFANYAKAZI WA CHUO CHA MAHAKAMA LAPONGEZWA KWA UFANISI

Na Innocent Kansha – Mahakama Tanga

Jaji Kiongozi wa Mahakama Kuu ya Tanzania Mhe. Dkt. Eliezer Mbuki Feleshi amepongeza Baraza la Wafanyakazi wa Chuo cha Uongozi wa Mahakama Lushoto kwa kusimamia utekelezaji wa majukumu waliyopewa kisheria na miongozo iliyopo kwa ufanisi.

Akifungua kikao cha tatu cha Baraza la tatu la Wafanyakazi wa Chuo cha Uongozi wa Mahakama Lushoto (IJA), Jaji Kiongozi alisema Mahakama ya Tanzania inaona fahari inapopata mrejesho chanya wa namna ambavyo Chuo kinatekeleza majukumu yake kwa weledi.

Kwa mujibu wa Jaji Feleshi, Chuo kimekuwa kikifanya vizuri katika eneo la utafiti na kimekuwa msaada mkubwa kwa Mahakama katika masuala ya mafunzo na utafiti hivyo kuisaidia Mahakama ya Tanzania kutekeleza kikamilifu wajibu wake wa kutoa haki sawa kwa wote na kwa wakati.

Aliwaambia wajumbe wa baraza hilo kuwa Uongozi wa Mahakama unayo matarajio makubwa kwa chuo hicho chenye dhamana ya kutekeleza sera ya mafunzo ya Mahakama ya Tanzania ya mwaka 2019 na mpango wake wa miaka mitatu. Aliongeza kuwa Sera hiyo imeeleza bayana kuwa masuala yote ya mafunzo kwa watumishi na tafiti zote zinazohusu Mhimili zitafanywa na Chuo cha Uongozi wa Mahakama Lushoto.

“Nawakumbusha watumishi ambao hamjajiunga na chama chenu cha wafanyakazi mjiunge wakati ni huu ili kwenda pamoja, mfaidike kwani lengo lenu ni moja tambueni hakuna haki bila wajibu na haya mambo mawili yanaendana”, alisisitiza Jaji Kiongozi.

Jaji Feleshi aliwataka wajumbe kutumia utaratibu wa kujadili mipango ya kuboresha miundombinu na kushirikiana na wadau wa ndani na nje ya nchi katika kuendesha mafunzo na tafiti ikiwemo mafunzo kwa njia ya mtandao ambayo yamekifanya Chuo kuwa mfano kwa ukanda wa Afrika Mashariki na Kati.

Awali akimkaribisha mgeni rasmi, Mwenyekiti wa Baraza hilo ambaye ni Mkuu wa Chuo cha Uongozi wa Mahakama Lushoto, Jaji wa Mahakama Kuu ya Tanzania Mhe. Dkt Paul Kihwelo alisema baraza hilo limejumuisha watumishi wa kada zote walioajiriwa na chuo na limeundwa kisheria na kwa kuzingatia matakwa ya Sheria za Kazi na Mahusiano Kazini ya mwaka 2004.

“Baraza hili ndiyo chachu ya kuimarisha na kuongeza tija sehemu ya kazi kiutendaji, mafanikio ya Chuo yanatokana na jitihada za Baraza hili katika kuboresha majukumu ya taasisi ya kila siku, hii inatokana na lengo la ushirikishaji wa watumishi katika uendeshaji wa Chuo”, alisema Jaji Kihwelo.

Baraza la Wafanyakazi wa Chuo cha Uongozi wa Mahakama Lushoto lilizinduliwa rasmi na Jaji Mkuu wa Tanzania Mhe. Prof. Ibrahim Hamis Juma, Desemba 10 mwaka 2018 Mjini Dodoma.

 Jaji Kiongozi wa Mahakama Kuu ya Tanzania Mhe. Dkt. Eliezer Feleshi akihutubia wakati wa uzinduzi wa Kikao cha tatu cha Baraza la tatu la Wafanyakazi wa Chuo cha Uongozi wa Mahakama Lushoto (IJA), Kushoto kwake ni Jaji Mfawidhi wa Mahakama Kuu ya Tanzania Kanda ya Tanga Mhe. Amiri Mruma, wa pili kulia ni Mwenyekiti wa Baraza na Mkuu wa Chuo cha IJA Mhe. Dkt. Paul Kihwelo na wa kwanza kulia ni Jaji wa Mahakama Kuu ya Tanzania Kanda ya Tanga Mhe.Edson Mkasimongwa.

 Mwenyekiti wa Baraza na Mkuu wa Chuo cha IJA Mhe. Dkt. Paul Kihwelo akizungumza wakati wa Baraza la wafanyakazi wa IJA, Kulia ni Jaji wa Mahakama Kuu ya Tanzania Kanda ya Tanga Mhe.Edson Mkasimongwa na wa kwanza kushoto ni Jaji Mfawidhi wa Mahakama Kuu ya Tanzania Kanda ya Tanga Mhe. Amiri Mruma.

Baadhi ya wajumbe wa Baraza la tatu la Wafanyakazi wa Chuo cha Uongozi wa Mahakama Lushoto (IJA) wakiwa kwenye picha ya pamoja na mgeni rasmi wakati wa uzinduzi.