JAJI BONGOLE ATAKUMBUKWA KWA UTIIFU NA UCHAPAKAZI WAKE

Na Innocent Kansha-Mahakama Rombo

Jaji Kiongozi wa Mahakama Kuu ya Tanzania Mhe. Dkt. Eliezer Feleshi amemuelezea aliyekuwa Jaji Mfawidhi wa Mahakama Kuu ya Tanzania kanda ya Tabora Marehemu Jaji Salvatory Bongole kuwa alikuwa ni mtu mnyenyekevu, mtiifu na mchapakazi katika utumishi wake siku zote wakati wa uhai wake.

Jaji Kiongozi jana aliwaongoza Majaji wa Mahakama Kuu ya Tanzania, Watumishi wengine wa Mahakama, viongozi mbalimbali wa Serikali na wananchi wa wilaya ya Rombo katika mazishi ya Jaji Bongole yaliyofanyika kijijini kwao Shimbi Kati wilayani Rombo mkoani Kilimanjaro.

Akitoa salaam za rambirambi kwa niaba ya Mahakama ya Tanzania, Dkt. Feleshi alisema maisha ni kama kitabu ambacho kawaida huwa na mwanzo na mwisho wake hivyo umefika wakati wa kusherehekea mwisho wa maisha ya Jaji Bongole.

“Natoa salaam za pole kutoka kwa Jaji Mkuu wa Tanzania Mhe. Prof. Ibrahim Hamis Juma ambaye kutokana na majukumu mengine hakuweza kuhudhuria mazishi haya”, alisema Jaji Kiongozi.

Alisema kama wanadamu hatuna budi kujifunza kuhesabu siku za maisha yetu tuwapo hai na kutenda matendo ya uadilifu katika majukumu ya kila siku. Alisema Marehemu Jaji Bongole, alikuwa ni rasilimali kubwa na muhimu kwa Mahakama kwa kuwa katika vituo mbalimbali alivyohudumu alishiriki katika mageuzi makubwa kwa maslahi ya mhimili na taifa kwa jumla.

Alisema, kutokana na kuaminiwa kwake, alipokuwa Hakimu Mkazi Mfawidhi alishiriki kikamilifu katika ujenzi wa Mahakama kuu Iringa, Mahakama ya Hakimu Mkazi na Mahakama ya wilaya ya Iringa, maarufu kama (Iringa Judiciary Square) ambayo kwa sasa ni sehemu ya mfano katika Mahakama kwani imesaidia kwa kiasi kikubwa katika suala zima la utoaji haki kwa wananchi.

Jaji Kiongozi alisema Jaji Bongole pia alishiriki katika ujenzi wa Mahakama Kuu kanda ya Sumbawanga, Mahakama za wilaya ya Ludewa za Mbarari Sumbawanga Njombe na Mahakama za Mwanzo za Iringa, Rujewa na Mlowo. Pia alisimamia ujenzi wa majengo ya Mahakama Kuu Shinyanga, Mahakama ya wilaya ya Bukombe na Mahakama za Mwanzo za Mwandiga, Mabamba Ilolangulu na Mwadui.

Naye Mkuu wa Chuo cha Uongozi wa Mahakama Lushoto (IJA) na Jaji wa Mahakama Kuu ya Tanzania Mhe. Dkt. Paul Kihwelo alimuelezea Jaji Bongole kuwa alikuwa ni mtumishi mwenye moyo wa kujituma, msikivu, mnyenyekevu na aliyependa kushirikiana katika kazi zake siku zote. Aliongeza kuwa Jaji Bongole pia alikuwa hodari, mchapakazi, mcheshi na mshika dini aliyemtanguliza  Mungu katika kazi zake na mwenye sifa za  kuigwa katika jamii iliyokuwa inamzunguka.

Wakati huo huo, Kaimu Jaji Mfawidhi wa Mahakama Kuu ya Tanzania kanda ya Tabora Mhe. Khamis Amour alimuelezea Jaji Bangole kuwa ni mtu aliyekuwa mahiri na kutanguliza mbele maslahi ya watu aliowahudumia na kuwa Mahakama imepoteza mwalimu, rafiki na mlezi mzuri.

Jaji Amour alisema marehemu alikuwa ni mwenye utashi aliyechukua changamoto na kuzigeuza kuwa fursa na kuzitatua ili kazi ziweze kufanyika kwa njia bora ya na kisuluhishi kwa kuwa alikuwa ni mtaalamu wa eneo hilo.

Jaji Salvatory Bongole alifariki dunia siku ya Jumatano Julai 15, 2020 usiku baada ya kuugua ghafla nyumbani kwake.

 Jaji Kiongozi wa Mahakama Kuu ya Tanzania Mhe. Dkt. Eliezer Feleshi akizungumza wakati wa Mazishi ya aliyekuwa Jaji Mfawidhi wa Mahakama Kuu ya Tanzania kanda ya Tabora Marehemu Jaji Salvatory Bongole.

 Waheshimiwa Majaji wa Mahakama Kuu ya Tanzania wakiwa kwenye Mazishi ya aliyekuwa Jaji Mfawidhi wa Mahakama Kuu ya Tanzania kanda ya Tabora Marehemu Jaji Salvatory Bongole.

 Jaji Kiongozi wa Mahakama Kuu ya Tanzania Mhe. Dkt. Eliezer Feleshi akiweka shada la Maua kwenye kaburi la aliyekuwa Jaji Mfawidhi wa Mahakama Kuu ya Tanzania kanda ya Tabora Marehemu Jaji Salvatory Bongole baada ya mazishi yake.

 Watoto wa Marehemu  Jaji Salvatory Bongole wakiweka shada la Maua kwenye kaburi la baba yao mara baada ya mazishi yake.

Waheshimiwa Majaji wa Mahakama Kuu ya Tanzania wakishuhudia mazishi ya aliyekuwa Jaji Mfawidhi wa Mahakama Kuu ya Tanzania kanda ya Tabora Marehemu Jaji Salvatory Bongole. Pichani Jeneza lenye mwili wa Marehemu likiwa tayari kushushwa kaburini.