WATUMISHI WA MAHAKAMA ARUSHA WAASWA KUFANYA KAZI KWA KUFUATA MAADILI

Na Catherine Francis – Mahakama Kuu, Arusha

Mtendaji Mkuu wa Mahakama ya Tanzania Bw. Mathias Kabunduguru amewaasa watumishi wa Mahakama Kuu ya Tanzania kanda ya Arusha kufanya kazi kwa kufuata kanuni na sheria za utumishi wa Umma ili waweza kutekeleza majukumu yao kwa ufanisi.

Akiwa kwenye ziara yake ya kikazi mkoani Arusha hivi karibuni, Mtendaji Mkuu 

Aliwataka watumishi kuachana na tabia zinazoashiria rushwa na badala yake wawahudumie wateja pasipokuwa na malalamiko na ucheleweshwaji wa huduma.

“Njia pekee ya kujiepusha na vitendo vya rushwa na ukosefu wa maadili ni kutoa huduma bora pasipo upendeleo wala ubaguzi wowote kwa wateja wote wa Mahakama ambao ni wananchi”, alisema.

Aidha, aliwakumbusha kuwa ili kuweza kufanya kazi vizuri ni muhimu kuelewa asili ya maeneo wanayofanyia kazi ili kuepusha migogoro isiyokuwa ya lazima kati ya wateja wa Mahakama na watumishi wa Mahakama wanaotoa huduma. Aliongezakuwa kuna baadhi ya migogoro hutokea kwa kutokuelewa uhalisia wa jamii inayokuzunguka na mazingira yao.

Pamoja na hayo aliwahamasisha watumishi kujiendeleza kielimu kutokuridhika na viwango vya elimu walivyoingia navyo kwenye ajira.

Wakati huo huo, Msajili Mkuu wa Mahakama ya Tanzania Mhe. Wilbert Chuma amewahimiza waheshimiwa Mahakimu kutoa hukumu zilizo bora pasipo woga kwa kuwa wamepewa mamlaka hayo na wanapaswa kuyatumia kwa ujasiri kwenye kutoa maamuzi yao.

“Lakini pamoja na kuwa na ujasiri wa kutoa hukumu mnapaswa kuzingatia haki na sheria za nchi katika kufanya maamuzi hayo kwasababu Mahakama ni Mhimili unachangia katika usalama wa nchi.

Msajili Mkuu aliwapongeza Mahakimu hao kwa kasi ya kusikiliza na kumaliza mashauri yaliyoko mahakamani na kuwasisitiza kuhakikisha wanatoa nakala za hukumu kwa wakati ili kupunguza malalamiko kwa wananchi. 

Mtendaji Mkuu wa Mahakama ya Tanzania pamoja na Msajili Mkuu wa Mahakama ya Tanzania walifanya ziara ya kikazi Mahakama Kuu ya Tanzania kanda ya Arusha Julai 15, 2020 ambapo pia walipata wasaa wa kuzungumza na watumishi.

 Mtendaji Mkuu wa Mahakama ya Tanzania Bw. Mathias Kabunduguru  (wa pili kulia) akisalimiana na baadhi ya watumishi wa Mahakama Arusha mjini mara baada ya kuwasili. 

 Mtendaji Mkuu wa Mahakama ya Tanzania Bw. Mathias Kabunduguru (kulia), Msajili Mkuu wa Mahakama ya Tanzania Mhe. Wilbert Chuma (katikati) na Mtendaji wa Mahakama Kuu Kanda ya Arusha Bw. Edward Mbara wakisikiliza hoja za watumishi.

Baadhi ya watumishi wa Mahakama Kuu ya Tanzania kanda ya Arusha waliohudhuria kikao baina yao na Mtendaji Mkuu wa Mahakama ya Tanzania pamoja na Msajili Mkuu wa Mahakama ya Tanzania.