KESI ZA UCHAGUZI ZITUMIKE KUIMARISHA TASWIRA CHANYA YA MAHAKAMA

 Na Innocent Kansha – Mahakama Dodoma.

Msajili wa Mahakama Kuu ya Tanzania Mhe. Sharmillah Sarwatt amewakumbusha Naibu Wasajili wa Mahakama Kuu ya Tanzania kutumia mamlaka waliyopewa kurejesha taswira chanya na imani ya wananchi na wadau kwa Mahakama hasa katika kipindi cha Uchaguzi Mkuu unaotarajiwa kufanyika Oktoba mwaka huu.

Akitoa kuhusu Uongozi kwenye mafunzo ya namna bora ya uendeshaji wa mashauri ya uchaguzi Jijini Dodoma kwa baadhi ya Wasajili na Naibu Wasajili wa Mahakama, Msajili wa Mahakama Kuu amesema kiongozi aliyeaminiwa siku zote ni lazima atumie busara katika kutekeleza majukumu yake na hasa katika kipindi hiki cha uchaguzi kwa kuonyesha umahiri katika kuitumikia nafasi ya kiutawala.

“Tuchunge kauli zetu zisije kukinzana na viapo vyetu vya utumishi kwenye suala zima la utawala wa sheria, tumeaniniwa katika nafasi hizi za uongozi wasajili ndiyo injini ya Mahakama katika suala zima la kuratibu shughuli zote za mashauri”, alisisitiza Mhe. Sarwatt.

Alisema wasajili wanapaswa kutekeleza majukumu yao katika kiwango cha hali ya juu na kwa weledi uliotukuka kwa maslahi mapana ya Taifa kwani uchaguzi siyo jambo dogo, linagusa ustawi wa Taifa na maisha ya wananchi wote.

Aliongeza kuwa hatima ya Mahakama ipo mikononi mwa watumishi hao katika  kusimamaia chombo hiki muhimu cha utoaji haki, kwa kipindi hiki cha uchaguzi ni muhimu kufanya kazi bila woga, ujasiri na kuisaidia Mahakama kufikia lengo.

“Kama viongozi mnapaswa kuzingatia maadili ya kazi katika maeneo mnayoyaongoza ni jambo la msingi hasa katika kipindi hiki cha uchaguzi yapaswa kuonyesha mfano kwa watumishi wengine, alisisitiza.

Kwa ujibu wa Mhe. Sarwatt, majukumu ya Msajili kwa kuzingatia na kufuata kanuni za uchaguzi, kanuni ya 9(1) zimetoa mamlaka ya kukutaka baada ya kupokea nyaraka za shauri la uchaguzi kabla ya yote kufanya mambo makuu matatu ambayo ni kupokea na kusajili shauri endapo tu limekidhi vigezo vya kisheria kwa taratibu za kikanuni, kurudisha kwa maana ya kuwasiliana na mleta nyaraka hizo mahakamani kwa nia ya kushauriana namna bora ya kuwasilisha nyaraka husika na mwisho ni kutopokea na kusajili hati hizo za shauri kwa kutoa sababu zenye mashiko ya kisheria au kwa kuzingatia kanuni ya kutozipokea na kuzisajili kama shauri Mahakamani.

“Tunatakiwa kuwa bora kuliko jana kwa kuongeza bidii katika majukumu yetu na kutambua maeneo ambayo hatupo vizuri ili kuongeza juhudi lengo ikiwa ni kupata matokeo chanya ya utekelezaji wa jukumu la kikatiba kwa Mahakama”, alisema Msajili huyo.

Mgeni rasmi kwenye mafunzo ya Namna bora ya uendeshaji wa Mashauri ya Uchaguzi, Jaji Mfawidhi wa Mahakama Kuu ya Tanzania kanda ya Dodoma Mhe. Mustapher Siyani akiwa kwenye picha ya pamoja  na Wasajili na Naibu Wasajili. Wa kwanza kulia ni Jaji mstaafu wa Mahakama Kuu ya Tanzania Mhe. Robert Makaramba na wa kwanza kushoto ni Mkuu wa Chuo cha Uongozi wa Mahakama Jaji Mhe. Dkt. Paul kihwelo na wa pili kutoka kushoto ni Msajili wa Mahakama Kuu ya Tanzania Mhe. Sharmillah Sarwatt. 

Mkuu wa chuo cha Uongozi wa Mahakama Lushoto (IJA) ambaye pia ni Jaji wa Mahakama Kuu ya Tanzania Mhe. Dkt. Paul Kihwelo (mwenye tai nyekundu) akitoa ufafanuzi wa jambo wakati mafunzo hayo.

Msajili wa Mahakama Kuu ya Tanzania, Mhe. Sharmillah Sarwatt akitoa mada kwenye mafunzo ya Wasajili na Naibu Wasajili wa Mahakama Kuu ya Tanzania ya namna bora ya uendeshaji wa mashauri ya Uchaguzi.