VIKAO VYA MAHAKAMA YA RUFANI VYAANZA KUFANYIKA SHINYANGA

 Emmanuel Oguda-Mahakama, Shinyanga

Vikao vya Mahakama ya Rufani, kwa mara ya kwanza vimeanza kufanyika Shinyanga  baada ya kufunguliwa rasmi kwa huduma hizo na Jaji Mkuu wa Tanzania Mhe. Prof. Ibrahim Hamis Juma jana mjini Shinyanga.

Ufunguzi huo umefanyika kwenye ofisi za Mahakama Kuu ya Tanzania Kanda ya Shinyanga kupitia gwaride maalum lililoandaliwa na Jeshi la Polisi mkoani Shinyanga na kukaguliwa na Mhe. Jaji Mkuu.

Kufuatia ufunguzi huo, wananchi wa Mkoa wa Shinyanga sasa wataanza kupata huduma za Mahakama ya Rufani. Kupitia Tangazo la Gazeti la Serikali No. 579 la tarehe 24/7/2020, jengo la Mahakama Kuu Shinyanga, limetangazwa kuwa ni Masjala Ndogo ya Mahakama ya Rufani.  Kila mwaka, Mahakama ya Rufani itakuwa na vikao katika jengo la kanda ya Shinyanga.  

Katika vikao hivyo Jumla ya mashauri 29 yanatarajiwa kusikilizwa na Majaji wa Mahakama ya Rufani akiwemo Jaji Mkuu wa Tanzania, Mhe Prof. Ibrahim Hamis Juma pamoja na Majaji wengine ambao ni Mhe. Jacobs Mwambegele, Mhe. Augustine Mwarija na Mhe. Rehema Kerefu.

Aidha, kikao hicho cha kwanza cha Mahakama ya Rufani kitasikiliza mashauri ya aina mbalimbali yakiwemo; Maombi ya Madai 5, Rufaa ya Madai moja, na Rufaa za Jinai 23.

Jengo la Mahakama kanda ya Shinyanga lilizinduliwa rasmi Agosti 7 mwaka huu na Jaji Mkuu wa Tanzania Mhe. Prof. Ibrahim Hamis Juma baada ya kukamilika kujengwa Mwaka 2015 kwa gharama za shilingi bilioni 3.9 ambazo ni fedha za ndani.

Jaji Mkuu wa Tanzania Mhe. Prof. Ibrahim Hamis Juma akikagua gwaride maalum lililoandaliwa na Jeshi la Polisi mkoani Shinyanga kwa ajili ya ufunguzi rasmi wa Vikao vya Mahakama ya Rufani vilivyoanza jana Mahakama Kuu ya Tanzania Kanda ya Shinyanga.

Jaji Mkuu wa Tanzania Mhe. Prof. Ibrahim Hamis Juma akipokea salaam za  gwaride maalum lililoandaliwa na Jeshi la Polisi mkoani Shinyanga kwa ajili ya ufunguzi rasmi wa Vikao vya Mahakama ya Rufani vilivyoanza jana Mahakama Kuu ya Tanzania Kanda ya Shinyanga.

Majaji wa Mahakama ya Rufani wakiwa pamoja na Majaji wa Mahakama Kuu Kanda ya Shinyanga wakishuhudia gwaride maalum lililoandaliwa na Jeshi la Polisi mkoani Shinyanga kwa ajili ya ufunguzi rasmi wa Vikao vya Mahakama ya Rufani vilivyoanza jana Mahakama Kuu ya Tanzania Kanda ya Shinyanga. Katikati ni Jaji wa Mahakama ya Rufani Mhe. Augustine Mwarija, wa pili kulia ni Mhe. Jacobs Mwambegele (Jaji Mahakama ya Rufani) na wa pili kushoto ni Mhe. Rehema Kerefu (Jaji wa Mahakama ya Rufani).