JUDICIARY OF TANZANIA: KUWENI VIONGOZI KATIKA NAFASI ZENU; JAJI MKUU

Na Mary Gwera, Mahakama

Jaji Mkuu wa Tanzania, Mhe. Prof. Ibrahim Hamis Juma ametoa rai kwa Watumishi wanawake wa Mahakama kusimama katika nafasi zao kama Viongozi ili kuhakikisha usawa wa kijinsia unazingatiwa katika mfumo mzima wa utoaji haki nchini.

Akizungumza na baadhi ya Watumishi wanawake wa Mahakama Machi 08, 2021 katika hafla fupi ya Maadhimisho ya siku ya Wanawake Duniani iliyoandaliwa na Chama cha Majaji Wanawake Tanzania (TAWJA), Mhe. Jaji Prof. Juma alisema kuwa kila mwanamke katika nafasi yake ni Kiongozi.

“Kila Mwanamke ni kiongozi, kiongozi ni mtu ambaye katika nafasi yake anayo nafasi ya maamuzi, hivyo maamuzi yenu yaonyeshe njia kwa wengine kufuata: kila mmoja wenu hapa, na wenzenu katika nafasi mbali mbali za Mahakama, ni viongozi,” alieleza Mhe. Jaji Mkuu.

Aidha, Mhe. Jaji Mkuu alisema kuwa katika mapambano ya kutafuta usawa, safari iliyopo mbele bado ni ndefu na ngumu kuliko mafanikio yanayoweza kuyaorodheshwa.

“TAWJA, kama Chama cha Majaji na Mahakimu Wanawake ni kiongozi, na kipo katika mstari wa mbele kuhakikisha usawa wa kijinsia unazingatiwa katika mfumo mzima wa utoaji haki nchini na kuwezesha wanawake kupewa fursa sawa katika nyanja zote ili tuwe na Taifa ambalo ubaguzi na ukatili wa kijinsia haupewi nafasi yoyote,” alisema Mhe. Jaji Mkuu.

Akirejea Ripoti ya Katibu Mkuu wa Umoja wa Mataifa kwa kikao cha 65 cha Kamisheni ya nafasi ya wanawake (COMMISSION ON THE STATUS OF WOMEN) kuhusu ushiriki kamilifu wa wanawake katika kufikia maamuzi kuhusu masuala ya umma, na kuhimiza usawa wa kijinsia na uwezeshaji wa wanawake na wasichana wote itakayokutana Machi 15 hadi 16, 2021, Mhe. Jaji Mkuu amebaini ya kuwa safari bado ni ndefu hadi kufikia Usawa wa Jinsia.

“Nitawaomba muisome hiyo ripoti ili itusaidie kupanga mikakati ya safari hiyo ndefu iliyo mbele yetu,” alisema Mhe. Jaji Mkuu.

Aidha Mhe. Jaji Mkuu aliainisha baadhi ya maeneo hayo ambayo ni Wanawake kuwa na uwakilishi mdogo katika sehemu zote za utoaji maamuzi katika taasisi za umma na Ukatili dhidi ya wanawake bado umeenea.

Aliongeza kuwa Wanawake wengi zaidi ya wanaume, bado wanaishi kwenye umasikini mkubwa, na wanayo nafasi chache za kupata mikopo, wanabeba mzigo mkubwa zaidi wa kutunza familia, na sheria na taratibu za kisheria bado haziwapi nafasi sawa kupata haki na unafuu.

Mhe Jaji Mkuu alishauri kuwa ili wanawake waweze kufikia daraja la usawa katika ushiriki na utoaji maamuzi katika maswala ya umma, nchi lazima zikubali kwa dhati kutekeleza yale yote yaliyoahidiwa na nchi katika Mikataba ya Haki za Binadamu na katika Sheria na Kanuni za nchi husika ikiwa ni pamoja na kuweka mazingira na mifumo ambayo itapunguza ukatili dhidi ya wanawake.

Kwa upande wake, Mwenyekiti wa TAWJA, Mhe. Jaji Joaquine De Mello alisema anaishukuru Serikali pamoja na Mahakama kwa jitihada za kuhakikisha kuwa Mwanamke anakuwa katika nafasi za maamuzi.

Akitoa baadhi ya takwimu za uwiano wa Wanawake na wanaume, Mhe. Jaji De-Mello alisema katika ngazi ya Mahakama ya Rufani kuwa jumla ya Majaji wanawake saba (7) kati ya Majaji wanaume nane (8), Mahakama Kuu, Majaji Wanawake 23 kati ya wanaume 48, Mahakimu Wakazi wanawake 486 kati ya wanaume 507.

“Safari ya kuwa na usawa kati ya wanaume na wanawake bado ni ndefu, ila tunashukuru Serikali na Mahakama kwa kuendeleza jitihada za kuhakikisha kuwa usawa unafikiwa,” alisema Jaji De Mello.

Jaji Mkuu wa Tanzania, Mhe. Prof. Ibrahim Hamis Juma akizungumza na baadhi ya Watumishi wanawake wa Mahakama ya Tanzania katika hafla fupi ya Maadhimisho ya Siku ya Wanawake Duniani ‘Women day’ 2021. Hafla hiyo fupi ilifanyika katika kiwanja cha Mahakama kilichopo Chimala-Dar es Salaam. Kulia ni Mwenyekiti wa Chama cha Majaji Wanawake Tanzania (TAWJA), Mhe. Jaji Joaquine De Mello.

Mwenyekiti wa Chama cha Majaji Wanawake Tanzania (TAWJA), Mhe. Joaquine De Mello akizungumza na baadhi ya Watumishi wanawake wa Mahakama walioshiriki katika hafla hiyo.

Baadhi ya Majaji wa Mahakama ya Tanzania wakiwa katika hafla hiyo.

Sehemu ya Watumishi wa Mahakama wakiwa katika hafla hiyo.

Waheshimiwa Majaji pamoja na baadhi ya watumishi wanawake wa Mahakama ya Tanzania wakiwa katika hafla hiyo. Mwenyekiti wa Chama cha Majaji Wanawake Tanzania (TAWJA), akimpatia tuzo Mhe. Jaji Mkuu kama ishara ya kumshukuru kwa mchango wake katika maendeleo ya wanawake ndani ya Mahakama.