RAIS SAMIA AMUAPISHA MTENDAJI MKUU WA MAHAKAMA

·       Aahidi kushughulikia changamoto ya Magereza nchini

Na Mary Gwera, Mahakama

Rais wa Jamhuri ya Muungano wa Tanzania, Mhe Samia Suluhu Hassan ameahidi kushughulikia changamoto ya Magereza nchini.

Akizungumza leo Agosti 21, 2021 Ikulu Dar es Salaam mara baada ya kumuapisha rasmi Mtendaji Mkuu mpya wa Mahakama ya Tanzania pamoja na Mabalozi wapya, Rais Samia alisema kuwa Magereza zina hali mbaya.

“Suala la changamoto ya Magereza nchini kama alivyotangulia kulizungumzia Mhe. Jaji Mkuu lipo, na sisi Serikali tumesikia na tunaahidi kulifanyia kazi,” alisema Mhe. Samia.

Kwa upande mwingine, Mhe. Rais Samia amewataka Viongozi wote aliowaapisha kufanya kazi kwa bidii, maarifa, weledi na nidhamu ya hali ya juu kwakuwa majukumu yaliyopo mbele yao ni makubwa na vilevile wanategemewa na wananchi.

Akizungumzia upande wa Mahakama, Rais Samia amemtaka Mtendaji Mkuu wa Mahakama ya Tanzania, Prof. Elisante Ole Gabriel kuendeleza maboresho ya Mahakama yaliyopo ikiwa ni pamoja na kuboresha mazingira mazuri ya kufanyia kazi.

“Mahakama ndio mamlaka ya utoaji haki nchini, hivyo una kazi kubwa ya kuhakikisha unaendeleza maboresho ili kuwezesha huduma ya utoaji haki inatolewa kwa wakati,” alisisitiza.

Kwa upande wake, Jaji Mkuu wa Tanzania, Prof. Ibrahim Hamis Juma ameeleza azma ya Mahakama ya Tanzania ya kuwa Mahakama mtandao ifikapo mwaka 2025.

“Mhe. Rais, napenda kushukuru kwa kututeulia Mtendaji Mkuu na nimefanikiwa kupitia wasifu wake, hivyo ni imani yangu kuwa ataisaidia Mahakama kufikia azma yake ya kuwa Mahakama mtandao,” alisema Mhe. Jaji Mkuu.

Mhe. Jaji Mkuu aliongeza kwa kuwataka Wadau wote wa Sekta ya sheria nchini kushirikiana pamoja na Mahakama ili kufikia Mahakama mtandao.

Hali kadhalika katika hafla hiyo, Mhe. Rais amewaapisha pia Mabalozi watatu ambao ni Lt. Jen. Yakub Hassan Mohamed kuwa Balozi wa Tanzania nchini Uturuki, Mahmoud Thabit Kombo kuwa Balozi wa Tanzania nchini Italia na Elsie Sia Kanza kuwa Balozi wa Tanzania nchini Marekani.

Mhe. Rais aliwataka Mabalozi hao wapya kuendeleza ushirikiano  baina ya Tanzania na nchi hizo, kuendeleza ushirikiano na Mashirika ya Kimataifa ikiwa ni pamoja na kuendeleza diplomasia ya uchumi.

Rais wa Jamhuri ya Muungano wa Tanzania, Mhe Samia Suluhu Hassan akimuapisha Prof. Elisante Ole Gabriel kuwa Mtendaji Mkuu wa Mahakama ya Tanzania, hafla hiyo fupi ya uapisho imefanyika Ikulu jijini Dar es Salaam leo Agosti 21, 2021.

Prof. Elisante akila kiapo.

Mhe. Rais akisaini hati ya kiapo mara baada ya kumuapisha rasmi Prof. Elisante kuwa Mtendaji Mkuu wa Mahakama.

Mtendaji Mkuu wa Mahakama ya Tanzania, Prof. Elisante Ole Gabriel pamoja na Mabalozi wakifuatilia hotuba mbalimbali zilizotolewa na Viongozi mara baada ya kuapishwa kwao rasmi.

Picha ya pamoja mara baada ya uapisho: Walioketi (katikati) ni Rais wa Jamhuri ya Muungano wa Tanzania, Mhe. Samia Suluhu Hassan, (wa tatu kushoto) ni Makamu wa Rais wa Jamhuri ya Muungano wa Tanzania, Mhe. Dkt. Phillip Mpango, (wa pili kushoto) ni Jaji Mkuu wa Tanzania, Mhe. Prof  Ibrahim Hamis Juma, (wa tatu kulia) ni Waziri Mkuu wa Tanzania, Mhe. Kassim Majaliwa, (wa kwanza kulia) ni Jaji Mkuu wa Zanzibar, Mhe Omar Othman Makungu, (wa kwanza kushoto) ni Balozi Hussein Kattanga, Katibu Mkuu Kiongozi na (wa pili kulia) ni Naibu Spika wa Bunge la Tanzania, Mhe. Dkt. Tulia Ackson Mwansasu.

Picha ya pamoja na Viongozi wa Vyombo vya Ulinzi na Usalama.

Mtendaji Mkuu wa Mahakama, Prof Elisante Ole Gabriel akiwa katika picha ya pamoja na sehemu ya familia yake.