JAJI MKUU AMWAPISHA DKT FELESHI KUWA MJUMBE WA TUME YA UTUMISHI WA MAHAKAMA

 Faustine Kapama na Lydia Churi – Mahakama, Dodoma

Jaji Mkuu wa Tanzania, Mhe. Prof. Ibrahim Hamis Juma, leo Oktoba 4, 2021 amemuapisha Mwanasheria Mkuu wa Serikari, Dkt Eliezer Mbuki Feleshi, kuwa Mjumbe wa Tume ya Utumishi wa Mahakama.

Hafla ya uapisho huo ilifanyika katika Kituo Jumuishi cha Utoaji Haki jijini Dodoma ilihudhuriwa na Waziri wa Katiba na Sheria, Mhe. Palamagamba Kabudi, Kaimu Jaji Kiongozi wa Mahakama Kuu ya Tanzania, Mhe. John Mugeta, Makamishna wa Tume, Katibu wa Tume, Naibu Katibu wa Tume hiyo na Msajili Mkuu wa Mahakama ya Tanzania.

Wengine ni Katibu Mkuu wa Wizara ya Katiba na Sheria, Naibu Katibu Mkuu wa Wizara hiyo, Jaji Mfawidhi wa Mahakama Kuu, Kanda ya Dodoma, Msajili wa Mahakama ya Rufani, Naibu Mwanasheria Mkuu wa Serikali pamoja na watumishi wengine wa Mahakama ya Tanzania.

Akizungumza katika hafla hiyo, Dkt Feleshi alieleza kuwa uapisho huo unamkumbusha namna alivyokuwa akitekeleza majukumu yake katika ngazi mbalimbali kabla na baada ya kuwa mjumbe wa Tume ya Utumishi wa Mahakama. Alieleza kuwa katika miaka 12 kwa madaraja tofauti akiwa Wakili wa Serikali alikuwa mjumbe wa Kamati za Maadili katika ngazi ya Mkoa.

Dkt Feleshi alieleza kuwa alipokuwa Mkurugenzi wa Mashitaka kwa miaka saba na nusu alikuwa na dhamana nyingine lakini kwenye Kamati ya Maadili ya Mawakili, wakati katika kipindi cha miaka mitatu au minne akiwa Jaji wa Mahakama Kuu ya Tanzania alikuwa mjumbe wa Kamati ya Maadili ya Majaji chini ya Kifungu cha 36 na 37 cha Sheria ya Uendeshaji wa Mahakama.

“Miaka mitatu na robo mingine nilikuwa mjumbe wa Tume ya Utumishi wa Mahakama wakati nilipokuwa Jaji Kiongozi. Hivyo, nashukuru kwa dhamana nyingine ya kuwa mjumbe wa Tume hii nikiwa kama Mwanasheria Mkuu wa Serikali, hii ni heshima kubwa kwangu kwa kuaminiwa,” alisema. Hivyo aliahidi kutekeleza jukumu hilo kwa mujibu wa sheria na Katiba na miongozo mingine iliyopo.

Akiozungumza baada ya uapisho huo, Jaji Mkuu wa Tanzania, ambaye ndiye Mwenyekiti wa Tume ya Utumishi wa Mahakama, alielezea umuhimu wa Mwanasheria Mkuu wa Serikali kuapishwa kuwa Mjumbe wa Tume kutokana na nafasi hiyo kutambuliwa kikatiba na kwamba ni matakwa ya kisheria kwa mujibu wa Sheria ya Uendeshaji wa Shughuli za Mahakama ambayo yanamtaka kufanya uapisho huo.

 Kwa mujibu wa Jaji Mkuu, kuapishwa kwa Mwanasheria Mkuu wa Serikali pia kunatokana na majukumu mazito ambayo Tume imepewa Kikatiba, ambapo anatakiwa kuwahakikishia wajumbe wengine kuwa atakuwa tayari kuishi kiapo hicho, ikiwemo kutekeleza kikamilifu majukumu ya Kamishna na kutunza siri ya mambo ambayo yanajadiliwa ndani ya Tume kabla ya kufikia maamuzi.

Prof. Juma aliyataja baadhi ya majukumu ya Makamishna wa Tume kuwa ni Pamoja na kumshauri Rais wa Jamhuri ya Muungano wa Tanzania kuhusu uteuzi wa Jaji Kiongozi na Majaji wa Mahakama Kuu ya Tanzania, kumshauri Rais kuhusiana na masuala ya nidhamu, mishahara na maslahi ya Majaji na pia kushauri kuhusu uteuzi wa Mtendaji Mkuu wa Mahakama ya Tanzania, ambaye ndiye mwajiri wa watumishi wote wa muhimili huo.

Kwa upande wake Waziri wa Katiba na Sheria, Mhe. Palamagamba Kabudi alimpongeza Jaji Dkt Feleshi kwa kuteuliwa kuwa Mwanasheria Mkuu wa Serikali na kwa nafasi hiyo kuapishwa kuwa mjumbe wa Tume ya Utumishi wa Mahakama na kupitia kwake atakuwa kiunganishi na mwakilishi muhimu wa Wizara ndani ya Tume na Mahakama kwa ujumla.

“Mhe. Feleshi ulikuwa na jukumu la Jaji Kiongozi, na mamlaka ya uteuzi imeona jukumu la Jaji Kiongozi umelifanya vema na inakuhitaji katika jukumu la Mwanasheria Mkuu wa Serikali. Hivyo hakuna haja ya kuanza kulinganisha ni cheo kipi ni kikubwa na kipi ni kidogo, na ya Mungu ni mengi, utajuaje kesho utakuwa wapi. Mhe. Rais ameona umsaidie katika jukumu hili,” alisema.

Mtendaji Mkuu wa Mahakama ya Tanzania, Prof. Elisante Ole Gabriel, ambaye ndiye Katibu wa Tume ya Utumishi wa Mahakama, aliwashukuru wajumbe na wadau wote waliohudhuria hafla hiyo na pia kumpongeza Mhe. Dkt Feleshi kwa kuapishwa kuwa mjumbe wa Tume hiyo.

Mwanasheria Mkuu wa Serikali, Dkt Eliezer Mbuki Feleshi akiapishwa na Jaji Mkuu wa Tanzania Mhe. Prof. Ibrahim Hamis Juma ambaye pia ni Mwenyekiti wa Tume ya Utumishi wa Mahakama kuwa Mjumbe wa Tume ya Utumishi wa Mahakama, leo katika hafla iliyofanyika kwenye ukumbi uliopo ndani ya jengo jipya la Kituo Jumuishi cha Utoaji Haki jijini Dodoma.

Mtendaji Mkuu wa Mahakama ya Tanzania Prof. Elisante Ole Gabriel (aliyesimama) akizungumza wakati wa hafla ya kumuapisha Mwanasheria Mkuu wa Serikali, Dkt Eliezer Mbuki Feleshi kuwa Mjumbe wa Tume ya Utumishi wa Mahakama, leo jijini Dodoma.

Mwanasheria Mkuu wa Serikali, Dkt Eliezer Mbuki Feleshi akiapa mbele ya Jaji Mkuu wa Tanzania ambaye pia ni Mwenyekiti wa Tume ya Utumishi wa Mahakama Mhe. Prof. Ibrahim Hamis Juma (hayupo pichani) kuwa Mjumbe wa Tume ya Utumishi wa Mahakama. 

Mwanasheria Mkuu wa Serikali, Dkt Eliezer Mbuki Feleshi akisaini hati ya kiapo mara baada ya kuapishwa kuwa Mjumbe wa Tume ya Utumishi wa Mahakama. Kushoto ni Msajili Mkuu wa Mahakama ya Tanzania Mhe. Wilbart Chuma  na katikati ni Mtendaji Mkuu wa Mahakama ya Tanzania, Prof. Elisante Ole Gabriel. Mwanasheria Mkuu wa Serikali, Dkt Eliezer Mbuki Feleshi akipongezwa na Mwenyekiti wa Tume ya Utumishi wa Mahakama Mhe. Prof. Ibrahim Hamis Juma mara baada ya kuapishwa kuwa Mjumbe wa Tume ya Utumishi wa Mahakama. 

Mtendaji Mkuu wa Mahakama ya Tanzania, Prof. Elisante Ole Gabriel akizungumza kwenye hafla hiyo.

Viongozi wa wizara ya Katiba na Sheria wakiwa kwenye hafla ya kuapishwa kwa Mwanansheria Mkuu wa Serikali kuwa Mjumbe wa Tume ya Utumishi wa Mahakama. Kulia ni Waziri wa Katiba na Sheria Mhe. Prof. Palamagamba Kabudi, katikati ni Katibu Mkuu wa wizara hiyo, Prof. Sifuni Mchome na kulia ni Naibu Katibu Mkuu wa wizara hiyo Bw. Amon Mpanju.

Waziri wa Katiba na Sheria Mhe. Prof. Palamagamba Kabudi, akizungumza wakati wa hafla hiyo.