SIMAMIENI UONDOSHAJI MASHAURI YA MLUNDIKANO: MSAJILI MKUU

Na Lydia Churi- Mahakama

Msajili Mkuu wa Mahakama ya Tanzania, Mhe. Wilbert Chuma ametoa wito kwa viongozi wa Mahakama kusimamia kikamilifu suala la kukutana na wadau wa haki jinai na haki madai ili kuondoa mlundikano wa mashauri mahakamani.

Akizungumza kwa nyakati tofauti na watumishi wa Mahakama katika Mahakama ya Hakimu Mkazi Simiyu na Mahakama ya Wilaya ya Maswa, Mhe. Chuma aliwataka Viongozi hao kuweka msisitizo katika matumizi ya Teknolojia ya Habari na Mawasiliano (TEHAMA) ili kurahisisha usikilizaji wa mashauri hayo.

Aidha, Msajili Mkuu pia amewahimiza Viongozi wa Mahakama kuendelea kutoa elimu kuhusu taratibu za kushughulikia mashauri mbalimbali yanayosajiliwa mahakamani, hususani yale yanayohusu masuala ya mirathi.

Amewataka viongozi hao kuwaelimisha watumishi wa Mahakama taratibu mbalimbali na miundo ya kiutumishi ili waweze kufahamu haki zao za msingi pamoja na majukumu yao katika utumishi. Alisema kuwa viongozi hawana budi kuyapa kipaumbele maslahi ya watumishi wao.

Kuhusu suala la kuongeza ujuzi, Msajili Mkuu amewashauri watumishi hao kujenga utamaduni wa kujiendeleza kielimu kupitia fursa mbalimbali za muda mfupi na mrefu, hasa zile zinazotolewa na Chuo cha Uongozi wa Mahakama Lushoto (IJA) kwa njia ya mtandao ili kuongeza tija na ufanisi katika kazi.

Katika juhudi za mapambano dhidi ya ugonjwa wa UVIKO 19, Mhe. Chuma amewataka watumishi wote wa Mahakama kuchukua tahadhari na kujikinga dhidi ya ugonjwa huo huku wakiendelea kuchapa kazi kwa bidii na kwa ufanisi na kuwashauri wanaopenda kuchanjwa chanjo ya UVIKO 19 kufanya hivyo.

Msajili Mkuu alifanya ziara katika Mahakama ya Hakimu Mkazi Simiyu pamoja na Mahakama ya Wilaya ya Maswa kwa lengo la kukagua utendaji kazi na utekelezaji wa shughuli za Mahakama. Katika ziara hiyo, Mhe. Chuma pia alipata nafasi ya kukagua ujenzi wa jengo la Mahakama ya Wilaya ya Busega unaoendelea.

 

Msajili Mkuu wa Mahakama ya Tanzania Mhe. Wilbert Chuma akikagua ujenzi wa jengo la Mahakama ya wilaya ya Busega ulioanza hivi karibuni wakati wa ziara yake ya kukagua shughuli za Mahakama mkoani Shinyanga.

Msajili Mkuu wa Mahakama ya Tanzania Mhe. Wilbert Chuma akiangalia tofali wakati alipofanya ukaguzi katika mradi wa ujenzi wa jengo la Mahakama ya Wilaya Busega ulioanza hivi karibuni.

 

Msajili Mkuu wa Mahakama ya Tanzania Mhe. Wilbert Chuma akiwa katika picha ya pamoja na watumishi wa Mahakama ya Wilaya ya Maswa Mkoani Simiyu mara baada ya kuzungumza nao hivi karibuni.

Msajili Mkuu wa Mahakama ya Tanzania Mhe. Wilbert Chuma akizungumza na watumishi wa Mahakama ya Hakimu Mkazi Simiyu hivi karibuni.

 Jaji wa Mahakama Kuu ya Tanzania kanda ya Shinyanga Mhe. Seif Mwinshehe Kulita (katikati) akiwa katika picha ya pamoja na Msajili Mkuu wa Mahakama ya Tanzania Mhe. Wilbert Chuma (mbele kulia) na  Watumishi wa Mahakama ya Hakimu Mkazi Simiyu mara baada ya kuzungumza nao hivi karibuni.